Maj senkis titetapouikan iTekiuajyo Dios
1. Itech semana 14 metsti marzo, ¿toni amaix peuas tikitaskej itech Nemachtil ika Biblia itech Nechikol?
1 Itech semana 14 metsti marzo xiuit 2011, peuas timomachtiskej amaix “Testimonio cabal” del Reino de Dios itech Nemachtil ika Biblia itech Nechikol. Nejin ika tajtoua nochi amaix Hechos, uan semi techyolchikaua uan tel kualtsin techtapouia tein panok nejon tonalmej. Amo kimelaua sejse versículo, ta itech sejse tanojnots tein kipia amaix Hechos kinextia toni techmachtia uan techpaleuia maj tikitakan keniuj uelis tikuiskej itech tonemilis (Rom. 15:4).
2. Xikonijto seki taman tein kipia amaix “Testimonio cabal”.
2 Tein kipia amaix. Itech página 2 moajsi se carta tein kijkuilojkej Oloch Taojtokaltianij ika miak netasojtalis. Ompa kijtouaj keniuj kichiaj maj techpaleui nejon amaix. Itech capítulo ome peua kiualkui ome eyi tajtolmej itech sejse capítulo, kampa kijtoua toni ika motajtos uan kinextia itech katiyejua versículos tein kipia Hechos motaksaltia. Miak capítulos kipia recuadros kampa okachi ika tajtoua taltikpakneminij, altepemej oso tachiualismej. Inakastan páginas takaujtok kampa uelis se tajkuilos. Itech nochi amaix kipia kualtsitsin taixkopimej kampa nesi tein kijtoua Biblia, uan nejon techpaleuis maj timonemilikan tein mochiuak ne uejkauj. Uan no, itech itamian amaix moajsi se lista kampa moijtoua seki taman tein moita itech seki taixkopimej. Itech ipaneuayoijtik amaix, kipia mapas kampa uelis tikitstiyaskej kani yekinika itatojtokakauan Cristo kitetapouijtiyajkej kuali tanauatilmej itech “nochi senmanauak” taltikpak (Hech. 1:8).
3. ¿Toni netajtanilmej tein motelnekij monankiliskej keman timomachtiskej amaix tein ika tajtoua Hechos?
3 Monankiliskej netajtanilmej tein motelnekij. Keman timomachtiskej amaix tein ika tajtoua Hechos, techpaleuis maj tiuelikan tiknankilikan netajtanilmej tein mouika iuan tanojnotsalis kemej nejin: ¿Ika toni tekit uan tamachtilis moteixmatiltiaj yekmelauj imomachtijkauan Cristo? ¿Akoni kiixyekana tanojnotsalis tein mouikatok noyampa taltikpak uan keniuj? ¿Toni ueli mochiua keman kinixnamikij uan kintajyouiltiaj tanojnotsanij? ¿Keniuj yektikatsin espíritu tapaleuia itech tanojnotsalis?
4. ¿Keniuj uelis senkis techpaleuis nemachtil ika nejin amaix?
4 Uelis senkis tikseliskej nepaleuil tein kitemakas nemachtil komo achto timomachtiaj amaix uan tiktemouaj keniuj titanankiliskej itech nechikol. Moneki tiyaskej nochi nechikolmej uan timonemiliskej keniuj uelis tikuiskej itech tanojnotsalis tein timomachtiaj. Keman timomachtiskej nejin kualtsin amaix tikchiaj maj techolini maj senkis titetapouikan iTekiuajyo Dios (Hech. 28:23).