Carta tein kijkuilojkej Oloch Taojtokaltianij
Tokniuan tein no nanitaixpantijkauan Jiova:
¡Axkan itech inechikol Dios mochiujtok miak taman tein semi techyolpaktia! Yekmelauj kuali timomachiliaj namouan tikteixmatiltiskej itokay toTajtsin Jiova tein yetok iluikak kemej amo keman ijkon mochiujtoya (Sof. 3:9; Juan 14:12).
Maj tiyolpaktokan porin tiktekitiliaj Jiova, amo kijtosneki ke amo tikpanouaj uejueyi ouijkayomej. Itech xiujtekit tein tiualpanokej, nansekimej nankipiakej uejueyi ouijkayomej porin talolinik, tel kiouik, kiouajekak uan mochiuak okseki tetsaujmej (Mat. 24:7). Miakej no mojmostaj tajyouiaj porin mokokouaj oso xiuejkejya. Uan tinochin moneki tikixnamikiskej “ueyi tajyouilis” tein okachi momiakilia (Mat. 24:8). Uan no, itech seki uejueyi altepemej, kemej Armenia, Corea del Sur uan Eritrea, miakej tokniuan tsaktokej porin kitekitiliaj Jiova (Mat. 24:9).
¿Toni techpaleuia maj tikpiakan se kuali tanemilil maski tikpanouaj ouijkayomej? Texto tein mokuik itech xiuit 2010 techelnamiktij se taman tein okachi techpaleuia: ‘Netasojtalis nochi kixikoua. Netasojtalis amo keman tapoloua’ (1 Cor. 13:7, 8). Kemaj, netasojtalis tein timopialiaj se iuan okse —uan tein tikpialiaj Jiova— techpaleuia maj titaxikokan.
Miakej tein kijtouaj kichiuaj kemej Cristo kimoujkaitaj keniuj tiolochmej tiksentokaj noyampa titanojnotsaj. Sekin maski amo kiseliaj tein tikneltokaj uan tein titamachtiaj, kinolinia maj techiluikan: “Namejuan nankichiujtokej tekit tein tejuan monekia tikchiuaskej”. ¿Toni kinpaleuia itaixpantijkauan Jiova maj tanojnotsakan mojmostaj? Kemej tikitakejya, yejua netasojtalis. Ijkon kemej toTajtsin tein moajsi iluikak, amo tiknekij maj nion akin ixpoliui (2 Ped. 3:9). Itech xiujtekit tein tiualpanokej okachi momiakilijkej tanojnotsanij, ajsik 7,508,050. Nejin kinextia ke tiknekij maj nochin moyolnonotsakan. ¿Moajsi okse taneltokalis kampa yetokej tel miakej tekitinij tein motemakaj ika miak pakilis yaskej uan kiteixmatiltiskej iTajtol Dios?
Semi techyolchikaua tikitaskej ke mochiujtok nejin tajtolmej tein Isaías kijtojka: “Itech itamian tonalmej, tepet kampa yetok ichan Jiova, moneki nochipaya ompa moajsis, okachi ajko ke imin kuapan tepemej, uan yekmelauj yetos okachi ajko ke okseki tepemej; uan ompa moneki yaskej nochin tein seseko kayomej” (Isa. 2:2-4). Yekmelauj axkan tel miakej yajtokej ichan Jiova. Uan 294,368 tein moauijkej itech xiujtekit tein tiualpanokej no imiuan youij. Semi techyolpaktia maj no moajsikan itech inechikol Dios. Moneki maj timotasojtakan ijkon kemej tanauatij Cristo, ta nejon techolinis maj tiksentokakan tikinpaleuikan maj kiixnamikikan tayejyekolis tein kitalia Amokuali Satanás akin techtauelita (1 Ped. 5:8, 9).
Itech martes 30 metsti marzo xiuit 2010, keman moelnamikik imikilis Jesús moajsikej 18,706,895 taltikpakneminij. Nejin tapoual amo keman ijkon ajsitoya. Nejin kinextia ke moajsijok tel miakej tein no kiueyichiuaskej Jiova. Uelis tiyolpakiskej maj Jiova ayamo kiixpolo nochi tein amo kuali tein mochiujtok nikan taltikpak. Sayoj ke netasojtalis techpaleuis maj titaxikokan hasta keman ualas nejon tonal (2 Tes. 3:5).
Uejueyi nechikolmej tein uejkauaj eyi tonal “Maj tiksentokakan timotokikan iuan Jiova” —tein miak mochiuak noyampa taltikpak itech xiuit 2010— kichikauak toyekuikalis iuan Jiova. Yekmelauj mochiuak kemej kijtoj salmista: “¡Yolpakij akin kiitaj Jiova kemej imin Dios!” (Sal. 144:15). Senkis titakuaujtamatij ke maski tikpiaskej okachi ueyi ouijkayot, amo onkak keyej timomoujtiskej porin Jiova touan yetok (Sal. 23:4). Amo uejkaua, Jiova kinauatis iKonetsin maj ‘kinuejuelo in chikaualismej den amokuali Satanás’ (1 Juan 3:8). ¡Tel senka tiknejnekij maj ejko nejon tonal! Sayoj ke axkan tikpiaj miak tekit tein moneki tikchiuaskej (1 Cor. 15:58).
Uelis senkis nankineltokaskej ke ‘nochipa’ tamechelnamikij keman tikchiuaj netataujtil (Rom. 1:9). Tamechtataujtiaj “xiksentokakan itech inetasojtalis Dios, axkan ke nankichixtokej iteiknelilis toTekotsin Jesucristo ika nemilis nochipaya tein nankiitstiyouij” (Jud. 21, NM).
Tamechtajkuilouiliaj ika ueyi netasojtalis.
Namokniuan,
Oloch Taojtokaltianij tein kinixyekanaj iTaixpantijkauan Jiova