¿Kimatijya mokoneuan toni kichiuaskej?
1. ¿Keyej semi moneki maj mokoneuan kimatikan toni kichiuaskej?
1 Amo uejkaua konemej peuas yaskej tamachtiloyan. Telpochmej uan ichpochmej tein kichiuaj kemej Cristo kiixnamikiskej tataman ouijkayomej, sayoj ke nejon no uelis tapaleuis maj kitematiltikan oso ‘kijtokan ten melauj’ kijtoua Dios (Juan 18:37). Uan mokoneuan, ¿kimatijya toni kichiuaskej?
2. ¿Toni moneki kimatiskej mokoneuan tein kinpaleuis maj tanankilikan kemej moneki?
2 ¿Kuali kimatij mokoneuan toni tachiualis kiueyitalia altepet oso ualeua itech tamachtilis tein amo melauak? ¿Kiajsikamatij keyej amo kuali yetok? ¿Uelis kiixnamikiskej keman kinchikaujkauiskej maj kiselikan okachi ueyi nemachtil? ¿Kimatij toni kichiuaskej keman kiniluiskej maj kisakan iuan aksa, maj tayikan tayil tein teiuintij oso maj kikuikan droga? ¿Ueli kimelauaj tein kineltokaj oso sayoj kijtouaj ke amo uelis kichiuaskej tein kiniluiaj porin amo kinkaua imin taneltokalis? (1 Ped. 3:15.)
3. ¿Keniuj tetatmej uelis kinmachtiskej imin koneuan itech Youak keman tiTaueyichiuaj kemej Kalyetouanij?
3 Xikinmachtikan itech Youak keman tiTaueyichiuaj kemej Kalyetouanij. Itech xiuit keman yajtoskej tamachtiloyan, nankiitaskej imiuan namokoneuan keniuj kiixnamikiskej kuejmolmej ijkon kemej nestiyaskej. Sayoj ke komo namomachtiaj achto ke peuas yaskej, okachi kimatiskej toni kichiuaskej. Yejua ika semi kuali xikitakan nejon itech se oso seki tonalmej keman titaueyichiuaj kemej kalyetouanij. Uelis nankintajtaniskej toni kinemiliaj ke uelis kinpanos keman yaskej tamachtiloyan. Uan no uelis ika nantajtoskej imiuan namokoneuan tein seki xiujmej achto nankisenitakaj porin xa axkan uelis okachi kiajsikamatiskej (Sal. 119:95). No uelis nankipiaskej se nemachtil kampa namejuan namochiuaj kemej se tamachtijkej, se tayolmajxitijkej oso se momachtijkej. Xikinmachtikan namokoneuan maj tanankilikan ika Biblia uan maj kitekitiltikan tapaleuilmej kemej amaix Razonamiento uan ome amaixmej Los jóvenes preguntan. Se tokniuj siuat momamachtiaya imiuan ikoneuan keniuj uan toni kiniluiskiaj imin yankuik tamachtijkauan keman moteixmatiltiskiaj kemej itaixpantijkauan Jiova ijkuak peuaskiaj yaskiaj tamachtiloyan. (Xikonita La Atalaya 15 de diciembre de 2010, páginas 3 a 5.)
4. ¿Toni kichiuaj tetatmej tein kinextiaj tamatilis?
4 Itech nejin itamian tonalmej keman onkak “ueyi tajyouilis”, telpochmej uan ichpochmej kiixnamikij okachi uejueyi ouijkayomej (2 Tim. 3:1). Sayoj ke tetatmej tein kinextiaj tamatilis kiniluiaj imin koneuan toni ouijkayomej uelis kipiaskej uan kinnextiliaj keniuj kiixnamikiskej (Pro. 22:3). Yejika achto ke yaskej tamachtiloyan, xikinpaleuikan namokoneuan maj kimatikan toni kichiuaskej.