Tein okachi moneki kipias se kuali tamachtijkej
1. ¿Toni moneki kipias se kuali tamachtijkej?
1 ¿Toni moneki kipias se kuali tamachtijkej ika Biblia? ¿Se ueyi nemachtil? ¿Maj kiuika miak xiujmej kemej itekitikauj Dios? ¿Maj tel ueli tamachti? Tein melauj, motelneki maj kipia netasojtalis: se kualneskayot tein kichiuak maj motakamatini nochi Tanauatil tein kiselij Moisés, tein ika moteixmatiltiaj imomachtijkauan Cristo, okachi ueyi kualneskayot tein kipia Jiova uan tein techolinia maj iuan timotokikan (Juan 13:35; Gál. 5:14; 1 Juan 4:8). Kemaj, moneki tiknextiskej netasojtalis uan ijkon timochiuaskej kuali titamachtianij.
2. ¿Keyej motelneki maj tikintasojtakan taltikpakneminij?
2 Maj tikintasojtakan taltikpakneminij. Ueyi Tamachtijkej, Jesús, kintasojtaya taltikpakneminij uan nejon tapaleuij maj kikakinij (Luc. 5:12, 13; Juan 13:1; 15:13). Komo tiktasojtaj taltikpaknenkej, tiktematiltiskej iTajtol Dios nochipa keman uelis. Amo techtsakuilis komo amo kinekij techyekkakiskej, techtajyouiltiaj oso tikpanouaj okse ouijkayot. Tiknextiskej ke ika timotekipachouaj akin tiknojnotsaskej uan ika titajtoskej tamachtilis tein kipaleuis itech netekipacholismej tein kipias. Uan no, ika miak pakilis tikxeloskej tonal keman toselti timomachtiskej tein tikitaskej iuan taltikpaknenkej uan keman iuan timomachtiskej.
3. Komo tiktasojtaj tamachtilis tein kipia Biblia, ¿keniuj techpaleuis itech tanojnotsalis?
3 Maj tiktasojtakan tamachtilis tein kipia Biblia. Jesús no kitasojtaya tamachtilis tein kipia Biblia uan kiitaya ke amo onkaya okse taman kemej nejon (Mat. 13:52). Komo tiktasojtaj tamachtilis tein kipia Biblia, tiktematiltiskej ika yolpakilis uan akin techkakij no ijkon kiseliskej tamachtilis. Nejin netasojtalis techpaleuis maj amo semi tiuiuiyokakan keman titanojnotsaskej, porin okachi tikitaskej nepaleuil tein kitemaka tamachtilis, uan amo sayoj tiknemilijtoskej tein amo ueli tikchiuaj.
4. ¿Keniuj uelis tikiskaltiskej netasojtalis?
4 Keniuj tikiskaltiskej netasojtalis. Uelis tikiskaltiskej netasojtalis komo tiknemiliaj ke taltikpakneminij semi amo kuali moajsij iixpan Dios, uan titanemiliaj itech netasojtalis tein techpialiaj Jiova uan iKonetsin (Mar. 6:34; 1 Juan 4:10, 11). Uan no, okachi tiktasojtaskej tamachtilis tein kipia Biblia komo tiksentokaj timomachtiaj uan itech titanemiliaj ika nejmachkayot. Maj tikelnamikikan ke netasojtalis yejua semej kualneskayomej tein kipia itakilo espíritu (Gál. 5:22). Yejua ika, moneki tiktataujtiskej Jiova maj techmaka iespíritu uan maj techpaleui maj tikiskaltikan nejon netasojtalis (Luc. 11:13; 1 Juan 5:14). Maski amo tikpiaskej ueyi nemachtil, ayamo miak xiujmej tiktekitilijtokej Dios oso amo semi tiuelij titamachtiaj, tinochin uelis timochiuaskej kuali titamachtianij ika iTajtol Dios komo tiknextiaj netasojtalis.