Maj titanojnotsakan ika yolchikaualis kampa tanamakaj
1. ¿Keyej moneki maj amo timoyolkokokan komo tiuiuiyokaj keman titanojnotsaj kampa tanamakaj?
1 ¿Tionuiuiyoka keman tiontanojnotsa kampa tanamakaj? Komo ijkon, amo xionmotekipacho, ta hasta Pablo akin katka se tanojnotskej yolchikauak, monekik okachi moyolchikauas uan ijkon kichiuaskia itekiuj (1 Tes. 2:2). Axkan tikitaskej eyi ouijkayomej tein tetsakuilisneki, uan no seki tayolmajxitilis tein kuali techpaleuis.
2. ¿Keyej amo moneki tikonnemilis ke mokuejmoloskej tekitinij komo tikonnojnotsa?
2 ¿Mokuejmoloskej tekitinij komo nikintakotonaltia? Miakkan, itech tanamakaloyamej, tekitinij kinpaleuiaj nochin akin youij ompa, uan moneki kikauaskej tein kichiujtokej. Yejuan mitsonpoujkaitaskej, porin mitsonitaskej kemej se kuali takoujkej. Uan komo kuali tiontakentiuj uan tionkualtakat, okachi kuali mitsonpoujkaitaskej.
3. ¿Keniuj uelis tikchiuaskej maj amo mokuejmolokan takouanij?
3 ¿Moneki nitanojnotsas ininixpan miak takouanij? Okachi kuali, xionyoui keman amo tel miakej yetoskej itech tanamakaloyan, kemej keman yekin tatapouaj. Xionmochia hasta keman taixyekankej oso tekitikej iselti moajsis, uan moneki amo uejkaua tikonnojnotstos.
4. ¿Toni uelis tikijtoskej keman titanojnotsaskej kampa tanamakaj?
4 ¿Toni uelis nikijtos? Komo itech tanamakaloyan onkakej miakej tekitinij, xiontajto iuan akin taixyekana ompa. Uelis tikonijtos: “Ouij se kinajsis tanamakanij ininchan, yejua ika tikinkalpanouaj kampa tekitij. Uan kemej tejuatsin tiontekititok, amo niuejkauati”. Xa monekis maj amo xikonilui ke uelis kitemakas tomin kemej netetayokolil porin uelis mitsonitaskej kemej se tanamakakej. Okachi kuali tikonijtos nejon keman tajtaniskej ika toni mopaleuia totekiuj. Komo tikonita ke itech se tanamakaloyan ueli, uelis tikontajtanis taixyekankej maj mitsonkaua xiontajto iniuan okseki tekitinij. Tein tikoniluis taixyekankej no yejua xikonilui okseki tekitinij. Komo se tekitikej tel amo kemanti, okachi amo xionuejkaua uan xikonkauili se tratado. Komo amo ueli tiontajtoua iniuan okseki tekitinij, xiontajtani ox uelis tikonkauas amaixmej kampa yejuan moseuiaj oso okseko kampa uelis kiitaskej.
5. ¿Toni techpaleuis maj titanojnotsakan ika yolchikaualis kampa tanamakaj?
5 Jesús uan Pablo tanojnotsayaj ika yolchikaualis kampa tekitiaj taltikpakneminij, uan tejuatsin no uelis ijkon tikonchiuas (Mat. 4:18-21; 9:9; Hech. 17:17). Xikontajtani Jiova maj mitsonpaleui uan ijkon tionyolseuis uan tionmoyolchikauas (Hech. 4:29). Uelis tikonselis miak taman tein kuali komo tiontanojnotsa kampa tanamakaj, porin nochipa onkas akin iuan tiontajtos. ¿Uelis tikonyejyekos?