Carta tein kijkuilojkej Oloch Taojtokaltianij
Tokniuan akin no nanitaixpantijkauan Jiova:
¡Techmaka miak pakilis tamechtajkuilouiliskej nanitekitikauan Jiova tein nanmoajsijya panoua chikome millón itech nochi taltikpak! ¿Keniuj nanmomachiliaj keman nankiixmatij se tokniuj akin uejka kayot? ¿Melauj ke ijsiujka kuali iuan nanmomachiliaj? (Juan 13:34, 35.) Ijkon nanmomachiliskej ijkuak nankiixtajtoltiskej Anuario, kampa ixnesi tein tokniuan kinextiaj itech tataman altepemej ke takuaujtamatij iuan Dios uan amo kikauaj.
Tikselianij tajtolmej tein kinextiaj ke nanmiakej, nochipa nankipiaj Youak keman nanTaueyichiuaj kemej Kalyetouanij. Tetatmej akin kinpiaj konemej tein nojnelmejok kichiuanij miak taman ika tamatilis tein kinpaleuia maj kuali takaktokan ininkoneuan (Efe. 6:4). Namikuanij okachi kuali mouikaj keman mosenmachtiaj (Efe. 5:28-33). Kemaj, nochin namikuanij uan akin ininselti, semi kinpaleuijtok ijkuak kixelouaj tonal uan kuali momachtiaj iTajtol Dios (Jos. 1:8, 9).
Techyolkokoua tikmatiskej ke nanmiakej nantajyouianij itech tetsaujmej tein yankuixtok mochiuani. Uan no tamechtasojkamatiliaj nannochin akin ijsiujka nantapaleuianij kampa mochiuaj tetsaujmej (Hech. 11:28-30; Gál. 6:9, 10). Uan no, nanmoajsij sekin akin kemej Dorcas ne uejkauj, nankinextiaj ‘kualtagayot uan nankinpaleuijtinemij nochi tagayot ten kinpoloa tensa tenika ixpanoskej’, ta nankiitaj tein kinpoloua tokniuan itech nechikol uan nankinpaleuiaj (Hech. 9:36). Xikelnamikikan ke Jiova kiita nochi nejin tein nankichiuaj uan yekmelauj namechtatiochiuis (Mat. 6:3, 4).
Itech seki altepemej moajsij taltikpakneminij akin kitaliaj tanauatilmej tein ika kinekij kijtakoskej itekiyo Dios tein tikchiuaj, uan miakej nanmoka mauiltianij (Sal. 94:20-22). Sayoj ke no, kemej nankielnamikij ke Jesús kijtoj ke ipa ijkon techtajyouiltiskiaj, nantaxikojtokej ika yolchikaualis uan nanmopaleuiaj iuan Jiova (Juan 15:19, 20). Tiknekij xikyekmatikan ke nochipa tamechelnamikij ijkuak tikchiuaj netataujtil uan titajtanij maj kuali “xiknemilijtinemikan de keniu nankinankiliske ne tagat ten namechtajtanilia de keye nantakuautamatij” (1 Ped. 3:13-15).
No semi tiyolpakij porin tel miakej tokniuan xijxiujtika kisentokaj chipaujkanemij maski Satanás motelchikaujtok kimoyauas auilnemilis. Itech nejin tonalmej, keman motelita auilnemilis kemej amo keman ijkon moitstoya, namejuan ‘nanmoyolchikauaj uan nanmoyolpexontiaj ika ne chikaujkauelilis den toTekotsin’ (Efe. 6:10). Nanmotakentiaj “ika ne taken ten Dios namechmaktilia” uan nankiixtopeujtokej ika chikaualis “nochi ne takajkayaualis ten namechchiuilijtinemi in amokuali Satanás” (Efe. 6:11, 12). Amo keman xikelkauakan ke Jiova kitekitiltia neskayot tein nankinextiaj, ta nejon tapaleuia maj kinankili Satanás, akin kiixnamiki (Pro. 27:11).
Techmaka pakilis tamechmatiltiskej ke itech xiuit 2011 ajsikej 19,374,737 taltikpakneminij ijkuak moelnamikik imikilis toTekotsin. Se taman tein tapaleuij maj ajsi nejon tapoual, yejua tekit kemej precursor auxiliar tein nanmiakej nankichiujkej itech metsti abril. Miakej taltikpakneminij itech nochi taltikpak kikakkej keniuj itekitikauan kiueyichiujkej Jiova (Rom. 10:18). Itech nejon metsti ajsikej 2,657,377 tanojnotsanij akin kichiujkej tekit kemej precursor auxiliar, uan oksekin no mochikaujkej okachi tekitiskej itech tanojnotsalis. Techtelyolpaktia kuali tekit tein nankichiuaj (Sal. 110:3; Col. 3:23).
Ika inepaleuil Jiova, itech xiuit tein tiualpanokej moauijkej 263,131 taltikpakneminij. Tamechteltasojkamatiliaj porin nantapaleuijkej maj momoyaua tayoleualis tein kijtoua: “‘¡Xiuiki!’. Uan akin yeski kikakis, maj kijto: ‘¡Xiuiki!’. Uan akin yeski amikis, maj uiki; akin kinejnekis, maj tayi at tein kitemaka nemilis uan amo moixtaua” (Revelación 22:17, NM). Satepan ke tikitakej tataman tamachtilis ika iTekiuajyo Dios itech ueyi nechikolmej tein uejkauaj eyi tonal uan mochiujkej itech xiuit 2011, okachi chikauak tikijtouaj: “¡Maj uiki iTekiuajyo Dios!”. Tejuan no tikijtouaj kemej tatitanil Juan akin satepan ijkuak kikakik nejin tein Jesús motenkauak “Yek [melauj] Nejuatsin niman nimoualuikas”, kijtoj: “Amén, ma ijkon mochiua. Kema, xionuiki, Notekotsin Jesucristo” (Apo. 22:20).
Ijkon kemej nankichiaj keman mochiuas nejon, amo xikelkauakan ke tamechteltasojtaj nansejsemej: tokniuan takamej uan siuamej akin nankitasojtaj Jiova ‘ika nochi ten nankichiujtinemij’ (1 Juan 3:18).
Nanmokniuan,
Oloch Taojtokaltianij tein kinixyekanaj iTaixpantijkauan Jiova