Maj tiknextikan tamatilis itech tanojnotsalis
1. ¿Keyej moneki tiknextiskej tamatilis itech tanojnotsalis?
1 “Keme ichkame yolkualime [...] intsalan ne tagayot majya tekuanime” itekitikauan Dios tanojnotsaj “intsalan in taltikpakuani ten semi amo yolkualime” (Mat. 10:16; Fili. 2:15). Noyampa miakej takuejmolchiuaj, tateuiaj uan kinichtekij taltikpakneminij, tein kinextia ke okachi ‘kueyiltijtinemij ne amokuali nintachiualisuan’ (2 Tim. 3:13). ¿Toni tein techyolmajxitia Biblia techpaleuis maj tiknextikan tamatilis itech tanojnotsalis? (Mat. 10:16.)
2. ¿Kemanian monekis tikisaskej kampa titanojnotstoskej uan tiksentokaskej okseko?
2 Maj tiknextikan kuali taixejekolis. Itech Proverbios 22:3 kijtoua ke tamatkej akin motatia keman kiita ouijkayot. Yejua ika, maj nochipa timotachilijtokan. Itech se xolal kampa kualtsin nemij uelis nochi ijsiujka mopatas. Uelis ejkoskej miak policías oso miak taltikpakneminij mosentiliskej itech ojti. Kemansa aksa uelis techyolmajxitis maj okachi kuali tiyakan. Maj amo timochiakan porin tiknekij tikitaskej tein panos. Okachi kuali maj tiknextikan kuali taixejekolis uan maj tiyakan ijsiujka okseko, uan ompa maj tiksentokakan ika tanojnotsalis (Pro. 17:14; Juan 8:59; 1 Tes. 4:11).
3. ¿Keniuj uelis tiktekitiltiskej itech tanojnotsalis tein kijtoua Eclesiastés 4:9?
3 Maj amo tiyakan toselti. Eclesiastés 4:9 kijtoua: “Okachi kuali omen uan amo sayoj se”. Uelis tikitaskej ke ueli titanojnotsaj toselti uan amo teyi panoua, sayoj ke ¿kisentoka ijkon? Xa kansaika uelis ijkon mochiuasok, sayoj ke okseko amo uelis yas iselti kajkalpan se akin telpochok oso se tokniuj siuat, uan okachiok komo tel tiotakya. Ika nochi tein mochiuani kinextia ke semi kuali maj aksa touan youi (Ecl. 4:10, 12). Moneki tikinitstoskej nochin akin tanojnotstoskej touan, uan moneki nochipa titanauatiskej keman tiyaskejya.
4. ¿Keniuj uelis titapaleuiskej maj amo tikpiakan ouijkayomej itech tanojnotsalis?
4 Tayekananij itech nechikolmej, akin ‘techyolyekantinemij uan techyekpixtinemij’, techyolmajxitiskej toni tikchiuaskej itech xolalmej kampa titanojnotsaj (Heb. 13:17). Komo tiyolyemankej uan titapaleuiaj, Jiova techtatiochiuis (Miq. 6:8; 1 Cor. 10:12). Kemej tiitekitikauan Dios maj tiksentokakan kuali titekititokan kampa titanojnotsaj, sayoj ke nochipa ika tamatilis.