¿Keniuj techpaleuia tikpiaskej se xolal kampa toselti uelis titanojnotsaskej?
1. Komo tonechikol kipia miak xolalmej, ¿toni uelis tikchiuaskej?
1 Komo itech nechikol kampa tipouij kipia miak xolalmej, uelis titajtaniskej maj techmakakan se, xa ompakauin kampa tinemij. Amaix Organizados, itech página 103 kijtoua: “Tikpiaskej se xolal kampa toselti uelis titanojnotsaskej techpaleuis maj okachi miak tiempo titanojnotsakan. No ijkon, uelis tikyoleuaskej okse tokniuj maj touan tanojnotsati”.
2. ¿Keniuj uelis tiktekitiltiskej kemej tamajsikayot xolal kampa titanojnotsaj toselti?
2 Xikontekitilti kemej tamajsikayot itech tanojnotsalis iuan nechikol. Komo tikseliaj se xolal kampa toselti titanojnotsaj uan moajsi ompakauin kampa titekitij, uelis titanojnotsaskej nepantaj itech hora keman timoseuiaj oso satepan keman tamis tonaltekit, xa uelis iuan okse tanojnotskej akin no ompakauin tekiti. Komo nejon xolal amo uejka moajsi kampa tichanchiuaj, iniuan tochankauan uelis titanojnotsaskej tiotakpa. Sayoj ke komo amo tiyouij itech nechikol tein mochiua achto ke titanojnotsatiuij, semi kuali maj tikchiuakan netataujtil uan maj tiktajtanikan Jiova maj techyekana achto ke tipeuaskej titanojnotsaskej (Filip. 4:6). No ijkon, moneki maj tamachiujto tekit tein tikchiuaj uan ijkon no titapaleuiskej itech tanojnotsalis tein mochiua iuan nochi nechikol. Okachiok itech itamiampa semana keman miakej kisaj tanojnotsatij, moneki titapaleuiskej ika tekit tein mochiua iniuan oloch tokniuan akin iniuan tiixyetokej tisentanojnotsaskej.
3. ¿Toni tatiochiualismej uelis tikseliskej komo tikpiaj se xolal kampa toselti uelis titanojnotsaskej?
3 Tatiochiualismej. Komo tikpiaj se xolal kampa toselti titanojnotsaj, tikpiaj kani titanojnotsaskej ijkon kemej tiueliskej. Okachi miak tiempo uelis titanojnotsaskej porin amo monekis uejka tiyaskej. Nejin tapaleuis maj sekin uelikan kichiuakan tekit kemej precursor auxiliar oso regular. Uan no, keman titanojnotsaj sayoj itech se xolal, nochin taltikpakneminij akin kinekij kimatiskej okachi amo uejuejka tikinajsiskej uan amo ouij yeski oksepa timokepaskej uan tikpeualtiskej se nemachtil ika Biblia. Kemansa uelis miakpa titakalpanoskej achto ke titemakaskej nejon xolal, uan okseki tokniuan uelis no tajtaniskej. Miakej tanojnotsanij kiitaj ke nejon kinpaleuia maj kuali kinixmatikan taltikpakneminij uan ijkon maj kuali kinselikan. ¿Mitsonpaleuiskia tikonpias se xolal kampa uelis tiontanojnotsas moselti iniuan mochankauan uan ijkon okachi ajsitok tikonchiuas motanojnotsalis? (2 Tim. 4:5.)