Xikchiuakan ijkon kemej kichiujkej tanauatianij: Oseas
1. ¿Toni techolinia maj tikchiuakan keman titanemiliaj ke Jiova yolkuali uan teiknelijkej?
1 Ijkuak titanemiliaj ke Jiova yolkuali uan teiknelijkej xa techolinia maj timotajtanikan: “¿Toni nimotemakaskia nikchiuas itech itekiyo yejuatsin?” (Sal. 103:2-4; 116:12). Tanauatijkej Oseas ika miak pakilis kichiuak tein Jiova kinauatijka, maski ouij kikisak. ¿Keniuj no uelis ijkon tikchiuaskej kemej Oseas?
2. ¿Keyej Oseas techkauilij se kuali neskayot itech tanojnotsalis?
2 Maj titanojnotsakan maski onkas ouijkayomej. Tanauatil tein kijtoj Oseas sayoj monekia kimatiskej akin nemiaj itech majtakti uejueyi kalyetouanij tein moixmatia kemej Israel. Ompa amo semi akin kitekitiliaya Jiova. Tekiuaj Jeroboán II “kichiuaya tein amo kuali iixpan Jiova” uan kisentokak kichiuak maj israelitas kinueyichiuakan kuakuejkonemej ijkon kemej kipeualtijka Jeroboán I (2 Rey. 14:23, 24). Uan tekiuanij akin satepan taixyekankej amo teyi kichiujkej tein ika kinpaleuiskiaj israelitas maj kuali moajsikan iixpan Dios, akin satepan kinixpolojkej itech xiuit 740 achtopa itech totonaluan. Oseas kuali kitekitilij Jiova cincuenta y nueve xiujmej itech nejon altepet kampa kinueyichiuayaj tiotsitsin. Uan tejuan, ¿no tiksentokaskej titanojnotsaskej nochi xiujmej maski amo techkakiskej oso techixnamikiskej? (2 Tim. 4:2.)
3. ¿Keniuj monextij iteiknelilis Jiova itech inemilis Oseas?
3 Maj titanemilikan itech iteiknelilis Jiova. Jiova kiiluij Oseas: “Xikui se siuat auilnenkej kemej monamik” (Os. 1:2). Inamik, Gómer, kipiak se konetsin; sayoj ke ome ikoneuan tein kipiak satepan nesi ke amo katkaj ikoneuan Oseas. Oseas kitapojpoluij, uan ineskayo kinextij iueyi teiknelilis Jiova, akin miakpa kintapojpoluij israelitas keman moyolnonotsayaj (Os. 3:1; Rom. 9:22-26). Maski ouij techkisas, ¿timotemakaj tikchiuaskej miak taman uan ijkon tikinmachtiskej nochi tataman taltikpakneminij ke Jiova se Dios teiknelijkej? (1 Cor. 9:19-23.)
4. ¿Toni uelis timotemakaskej tikchiuaskej komo timotasojkamatij iuan Jiova?
4 Seki itekitikauan Jiova kikauanij kuajkuali tekimej porin okachi tekitij itech tanojnotsalis. Oksekin amo monamiktianij oso amo kinpianij konemej porin okachi kiixtaliaj kitayekanaltiskej iTekiuajyo Dios. Xa tejuan tiknemiliaj ke amo ueliskia tikchiuaskej ijkon kemej kichiuak Oseas. Sayoj ke komo tiksentokaj tiktasojkamatij iueyi netasojtalis Jiova uan titakuaujtamatij ke techmakas chikaualis ika iyektikatsin espíritu, xa uelis techpaleuis maj tikchiuakan se tekit tein tejuan tikitaskiaj ke amo keman ueliskia tikchiuaskej, ijkon kemej kipanok Oseas (Mat. 19:26; Filip. 2:13).