Carta tein kijkuilojkej Oloch Taojtokaltianij
Tokniuantsitsin:
Techmaka miak pakilis tamechtajkuilouiliskej ipeujyan nejin xiuit tein motelneki. Achto ke tamis xiuit 2014, panosya cien xiujmej keman Jesucristo peuak tekiuajti maski moajsij miakej akin kitauelitaj (Sal. 110:1, 2).
Itech nechikol tein xijxiujtika kipia Watch Tower Bible and Tract Society of Pennsylvania, tein mochiuak itech metsti octubre xiuit 2013, tokniuan akin pouij itech Comité de la Traducción del Nuevo Mundo kikixtijkej se yankuik Biblia itech tajtol inglés tein kiyektalijkej uan amo moajsi okse ijkon tein uelis kipiaskej taltikpakneminij. Panouaya sesenta xiujmej, Jiova kintekitiltij ikoneuan taixpejpenalmej ika espíritu maj kichijchiuakan Traducción del Nuevo Mundo (Rom. 8:15, 16). Nejin se taman tein kichiua maj kitelpia ipatiuj, ¿melauj?
Miak xiujmejya, Tokniuan akin kiitaj tein Moijkuilos akin tekitij iniuan Oloch Taojtokaltianij kinekij maj mokepa Biblia itech okachi miak tataman tajtolmej. Itech nejin tonalmej, Traducción del Nuevo Mundo mochijchiua, ajsitok oso sayoj seki amatajkuilolmej, itech 121 tataman tajtolmej. Tamechyoleuaj xiknextilikan Jiova ke senkis nankitasojkamatij nankipiaskej Biblia. Mojmostaj xikixtajtoltikan uan itech xitanemilikan; ijkon okachi iuan nanmotokiskej akin kichijchiuak, Jiova Dios (Sant. 4:8).
Techtayokoltia tikmatiskej keniuj tajyouiaj seki tokniuan, uan tikajsikamatij ke kemansa kinkisa ouij yolpakiskej iniuan oksekin. Kemej neskayot, ininnemilis seki kalyetouanij kayomej Asia ijsiujka mopatak keman se tonal, temomaj peuak senkis amo moolinia. Tapajtianij amo kimatiaj toni kipiaya uan amo teyi uelik kichiujkej. ¡Semi tetayokoltij! Axkan inamik moneki kinejmachpias nochi tonalmej, uan itelpoch uan iome ichpochuan kitemakaj se kuali neskayot kemej itaixpantijkauan Jiova keman ika miak netasojtalis kinpaleuiaj inintatuan. Ijkon kemej nejin kalyetouanij, nochin namejuan akin no nankipanouanij tataman ouijkayomej uelis nanyolpakiskej porin nankixikouanij nochi nejon (Sant. 1:2-4). Yeski tikchiaskej tiyaskej iluikak oso tinemiskej nikan taltikpak, Jiova moyektenkaua ke amo uejkaua tiyolpakiskej porin tikxikojkej tayejyekolismej, ta yejuatsin techtiochiuas ika nemilis nochipaya (Sant. 1:12).
Itech xiuit tein tiualpanokej itech tonal keman moelnamikik imikilis Jesús monechikojkej 19,241,252 taltikpakneminij. ¡Semi techyolpaktia tikinitaskej keniuj tel miakej kiueyichiuaj Jiova uan Jesucristo keman touan mosentilijkej nejon tonal! No ijkon techyolpaktij tikmatiskej ke itech metsti marzo uan abril miakej tokniuan kiueyichiujkej Dios keman panoua dos millones kichiujkej tekit kemej precursor auxiliar. Uan no techyolpaktij tikmatiskej ke akin kichiuaskej nejon tekit keman takalpanojtos tokniuj takalpanojkej uelis yetoskej itech nochi nechikol tein kipiaskej tokniuan akin kichiuaj tekit kemej precursor regular, maski amo takalpanos marzo nion abril. Akin kipiaj kuali taixejekolis kiajsikamatij ke moneki tekititoskej itech tanojnotsalis uan itech okseki tataman tekimej tein mochiua itech inechikol Dios. Nejin yejua tein techpaleuis maj tikpiakan chikauak totakuaujtamatilis uan amo tikauaskej maj Amokuali techuejkatili iuan Jiova nion maj techtapololti (1 Cor. 15:58).
No ijkon, semi techyolpaktia tikmatiskej ke itech xiujtekit tein tiualpanokej 277,344 taltikpakneminij moauijkej uan ijkon kinextijkej ke motemaktijkej iuan Dios uan axkan moajsij itech ojti tein teuika itech nemilis iniuan nochin tokniuan semanauak taltikpak (Mat. 7:13, 14). Nejin tokniuan akin yekin moauijkej moneki maj tikinpaleuikan uan ijkon ‘inintakuaujtamatilis maj moueyiltijtiuj’ (Col. 2:7). Maj tiksentokakan timoyolchikauakan se iuan okse uan ijkon titaxikoskej hasta keman ejkos tamilis (Mat. 24:13). Biblia techiluia: “Xikinyolchikauakan nekes ten yolkuetautinemij ika ouijkayot. Uan xikinpaleuijtiyakan nekes ten amo kipiaj ueyi takuautamatilis. Uan no xikinijyouilijtiyakan nochi in ouijkayot ten ne tokniuan kichiuaj” (1 Tes. 5:14). Uan no, maj tiksentokakan tikchiuakan netataujtil uan maj tikijtokan: “Maj uiki motekiuajyo” (1 Tes. 5:17; Mat. 6:10, TNM).
Tikchiaj xiyolpakikan keman nankiixtajtoltiskej Anuario 2014, uan oksepa tamechiluiaj ke semi tamechtasojtaj nannochin, akin nankitasojtaj Jiova.
Nanmokniuan,
Oloch Taojtokaltianij akin kinixyekanaj iTaixpantijkauan Jiova