Carta tein kijkuilojkej Oloch Taojtokaltianij

Tokniuantsitsin:

“Nochipa tiktasojkamatiliaj Dios keman namoka titajtouaj itech tonetataujtiluan. Porin nochipa tikelnamikij tekit tein nankisentokaj nankichiuaj, uan nanmotekiuj ika netasojtalis, uan nanmotaxikolis porin nankipiaj nechialis itech toTekotsin Jesucristo iixpan toDios uan toTajtsin.” (1 Tes. 1:2, 3, TNM.) ¡Nejin tajtolmej tel kuali kinextiaj netasojtalis tein tamechpialiaj! Semi tiktasojkamatiliaj Jiova xipouikan touan uan kuali tekit tein nankichiujtokej.

Itech xiuit tein tiualpanokej moita ke nankisentokaj nankichiuaj itekiyo Dios ika netasojtalis. Miakej nankitemouanij keniuj okachi nankitekitiliskej Dios. Kemej neskayot, sekin yanij mokaltalitij kampa okachi monekij tanojnotsanij, uelis yeski itech ininaltepeuj oso itech okse. Oksekin tekitinij itech tanojnotsalis senteixtenoj. Uan miakej ika miak pakilis kichiujkej tekit kemej precursor auxiliar keman moelnamikik imikilis Cristo, itech metsti keman tokniuj takalpanoj itech nechikol oso keman mochiuak ueyi tekit itech metsti agosto xiuit 2014. Semi kuali tein nankichiuaj porin nankitekitilijtokej Jiova ika nochi nanmoyolo ijkon kemej nanuelij (Col. 3:23, 24). Tikteltasojkamatiliaj toTajtsin Dios porin “nankisentokaj nankichiuaj” nejon tekit.

Uan no, semi timotasojkamatij porin nankichiuaj “nanmotekiuj ika netasojtalis” keman nantapaleuiaj maj mochijchiuakan kalmej kampa tikueyichiuaj Jiova. Kemej ixolal Dios kisentoka moskaltia, nejin kalmej motelnekij (Is. 60:22). Sayoj itech xiuit tein tiualpanokej ajsikej 8,201,545 tanojnotsanij, uan mejmetstika motemakakej kemej 9,499,933 nemachtilmej ika Biblia. Yejua ika, moneki moueyitiliskej oso moyekchijchiuaskej miak sucursales. Nejon no kinextia ke moneki mochijchiuaskej okachi kalmej kampa timosentiliaj. Uan no, itech miak altepemej monekij kalmej kampa uelis nemiskej uan tekitiskej kampa motajtoua inintajtol tokniuan akin kitajtolkepaj amaixmej.

Yejua ika, ¿toni uelis tikchiuaskej uan ijkon titapaleuiskej itech nochi nejin tekit tein moixtalijtok? Xa sekin uelis titapaleuiskej itech nejin tekimej. Sayoj ke, tikmatiskej tikchijchiuaskej kalmej oso amo, tinochin tikpiaj tatiochiualis titapaleuiskej ‘ika tein tikpiaj’ (Prov. 3:9, 10). Achto ke kichijchiuaskiaj tabernáculo, israelitas kitemakakej miak taman, yejua ika monekik kinnauatiskej maj amo kitemakakanok (Éx. 36:5-7). Neskayomej kemej nejon tein ijkuiliujtokej itech Biblia ajsi itech toyolo uan techolinia maj titapaleuikan. Tokniuantsitsin, “nanmotekiuj ika netasojtalis” itech nejin taman itekiyo Dios yejua okse taman tein techolinia maj tiktasojkamatilikan Jiova.

Okse taman tein semi techyololinia yejua tikitaskej keniuj tokniuan taxikouaj uan mochikauaj amo mosenkauaskej. Kemej neskayot, itech xiuit 1950 uan hasta axkan, telpochmej akin itaixpantijkauan Jiova tein kayomej Corea del Sur, kintsakuanij porin amo kinekij kinpaleuiskej taltikpaktekiuajyomej, sekin miak xiujmej uan oksekin amo. Miakej tokniuan akin tataman xiujmej kipiaj kixikouanij nejin ouijkayot uan amo mosenkauanij. Neskayot tein kinextiaj keman taxikouaj semi kichikaua totakuaujtamatilis.

Itech altepet Eritrea, eyi tokniuan takamej kiuikajya panoua 20 xiujmej tsaktokej. Uan no moajsij tokniuan siuamej akin kintsakuanij amo miak xiujmej iniuan ininkoneuan. Maski mochiuani miak taman tein tapaleuis maj kinkajkauakan, hasta axkan kisentokajok tsaktokej. Maski ijkon, nejon tokniuan akin tikintasojtaj amo kikauaj Dios. Kisentokaj kitekitiliaj Jiova hasta keman kiixnamikij uejueyi ouijkayomej. Tejuan nochipa tikinelnamikij keman timotataujtiaj (Rom. 1:8, 9).

Miakej amo nantsaktokej porin nankipaleuiaj tein nankineltokaj. Sayoj ke kemaj moneki nankiixnamikiskej ouijkayomej tein se kipia keman se ueuentsintia, keman se kokolispeua, keman techixnamikij tochankauan akin amo taneltokaj, ijkon kemej okseki taman ouijkayomej tein xa amo akin kimati. Maski ijkon, nankisentokaj nankitekitiliaj Jiova (Sant. 1:12). ¡Tel kuali tein nankichiuaj! Taxikolis tein nankinextiaj yejua okse taman tein tiktasojkamatiliaj Jiova.

Tikyekmatij ke tekit tein nankisentokaj nankichiuaj, netasojtalis tein ika nankichiuaj uan taxikolis tein nankinextiaj yejua seki taman tein senkis techolinia maj tiktasojkamatilikan “Jiova, porin yejuatsin yolkuali” (Sal. 106:1). Tamechteltasojtaj uan tiktataujtiaj Jiova maj namechyolchikaua, namechyekpia uan maj namechtatiochiui uan ijkon uelis nankisentokaskej nankitekitiliskej nochipaya.

Nanmokniuan,

Oloch Taojtokaltianij akin kinixyekanaj iTaixpantijkauan Jiova