Kikaujkej neskayot ika takuaujtamatilis
1. ¿Katiyejua amaix peuas timomachtiskej itech Nemachtil ika Biblia itech Nechikol itech semana 19 metsti octubre?
1 Itech semana 19 metsti octubre xiuit 2015 peuas timomachtiskej amaix Kikaujkej neskayot ika takuaujtamatilis itech Nemachtil ika Biblia itech Nechikol. Itech nejin amaix tikajsij tanojnotsmej tein mokixtiaj itech Biblia kampa ininka tajtoua 14 takamej uan siuamej akin amo kikaujkej Dios. Kemej chijchiujtok amaix, techpaleuia maj tikitakan ke yekmelauj nenkej akin ompa ixnesij uan ke yekmelauj kiixnamikkej kuejmolmej uan ouijkayomej porin kitakamatkej Jiova. Uan no, timomachtiaj tein techpaleuis itech tonemilis (Heb. 6:12).
2. Xikonijto seki taman tein kipia amaix Kikaujkej neskayot ika takuaujtamatilis.
2 Tein kipia amaix. Ome taman tein kipia uan tein semi tapaleuia yejua kampa kinextia kemanian mochiuak uan mapas tein kinextiaj kemanian uan kani nenkej akin ininka motajtoua. Sejse tamachtilis kipia taxelol “Netajtanilmej tein ika ueli se tanemilis” tein techpaleuia maj titanemilikan itech tanojnotsmej uan maj tikchiuakan itech tonemilis tein timomachtiskej. Uan no, kipia miak taixkopimej tein kualtsitsin tein mochijchiujkej ika miak nejmachkayot, nejon techpaleuis maj titanemilikan kemej yeskia ompa timoajsiskiaj.
3. ¿Keniuj uelis techpaleuis nejin amaix?
3 Keniuj uelis techpaleuis. Itech ipeujyan amaix, Oloch Taojtokaltianij techyoleuaj maj tikchiuakan nejin: “Xitanemilikan uan ijkon uelis nankiitaskej uan nankimachiliskej tein kipanokej akin ininka motajtoua, uan xiknemilikan toni nankichiuaskiaj namejuan ika tein mochiujtok ompa”. Sayoj ke titanemiliskej itech tanojnotsmej amo kijtosneki ke titanemiliskej kemej tejuan tikinitaj; ta maj tikitakan toni tikchiuaskiaj komo tikpanoskiaj tein yejuan kipanokej. Nejon kijtosneki ke moneki tikixtaliskej tiempo keman itech titanemiliskej (Neh. 8:8). Komo tamachtilis tein moitas itech semana peua itajkotian se tamachtilis, tokniuj akin kiixyekanas tamachtilis kijtos tein moitak se semana achto, sayoj ke moneki maj amo pano se minuto. Uan komo amo kipia taxelol “Netajtanilmej tein ika ueli se tanemilis”, uelis kichiuas se oso ome netajtanilmej tein ika moelnamikis tamachtilis.
4. ¿Keyej motelneki maj timomachtikan amaix Kikaujkej neskayot ika takuaujtamatilis?
4 Nejin taltikpak kampa taixyekantok Satanás mojmostaj kitemoua ika miak taman keniuj kijtakos totakuaujtamatilis oso senkis kitamis. Nejin amaix uan tamachtilismej tein no ijkon motokaytiaj tein mokixtiaj itech amaix Tanejmachtijkej, semej netetayokolilmej tein Jiova techmaka tein ika kichikaua totakuaujtamatilis (Sant. 1:17). Semi techpaleuis nejin amaix, komo amo timopolouiliaj Nemachtil ika Biblia itech Nechikol uan komo titanankiliaj.