Keniuj tikchiuaskej maj tamachtilis ajsi itech iyolo akin techkaki
1. ¿Keniuj momachilijkej itatojtokakauan Jesús keman kinmachtij?
1 Jesús kichiuak maj tamachtilis ajsi itech ininyolo akin kikakiaj, yejua ika, sepa itech Biblia kijtoua ke itatojtokakauan ‘semi yolpaktiualayaj’ satepan ke kinmelauilij tajkuilolmej (Luc. 24:32). Se kitakamatis Dios moneki kisas itech toyolo; yejua ika, ¿keniuj uelis tikchiuaskej maj momachtianij kiyolnejnekikan kipataskej ininnemilis? (Rom. 6:17.)
2. Keman kuali tiknemiliskej tein tikijtoskej uan titeajsikamatiskej, ¿keniuj techpaleuis maj tamachtilis ajsi itech ininyolo taltikpakneminij?
2 Maj kuali tiknemilikan tein tikijtouaj uan maj titeajsikamatikan. Miakej amo kipataj ininnemilis komo sayoj tikiniluiaj toni kuali yetok uan toni amo. Tein melauj, se kinixtajtoltilis miak tajkuilolmej tein kinextiaj ke amo kuali yetok tein kineltokaj uelis kichiuas maj amo kinekikan kiseliskej iTajtol Dios. Komo tiknekij tikinpaleuiskej, yekinika moneki tikajsikamatiskej keyej kineltokaj nejon uan keyej ijkon monejnemiltiaj. Netajtanilmej tein kuali tiknemiliskej kichiuas maj kinekikan techiluiskej tein kinemiliaj (Prov. 20:5). Sayoj ijkon uelis tikixpejpenaskej tajkuilolmej itech Biblia tein ajsis itech ininyolo. Yejua ika, motelneki maj ininka timotekipachokan uan maj amo tiyolijsiuikan (Prov. 25:15). Moneki tikajsikamatiskej ke sejse taltikpaknenkej tataman moskaltijtiyas kemej itatojtokakauj Cristo. Moneki panos seki tonalmej uan ijkon iespíritu Jiova kiolinis maj tanemili uan maj kichiua tein yejuatsin kineki (Mar. 4:26-29).
3. ¿Keniuj uelis tikinpaleuiskej akin tikinmachtiaj maj kipiakan ikualneskayouan Cristo?
3 Ika tonepaleuil kipiaskej ikualneskayouan Cristo. Tikitaskej iniuan momachtianij seki tajkuilolmej itech Biblia tein ika tajtouaj iteiknelilis uan inetasojtalis Jiova kinpaleuis maj kipiakan ikualneskayouan Cristo. Uelis tikixtajtoltiskej Salmos 139:1-4 uan Lucas 12:6, 7, uan ijkon kiitaskej ke Dios semi toka motekipachoua. Keman aksa yekmelauj kitasojkamati iueyi netasojtalis Jiova, okachi kitasojtas yejuatsin uan kimoujkatokas (Rom. 5:6-8; 1 Juan 4:19). Uan no, keman kimatij ke tein kichiuaj kiyolpaktia oso kiyolkokoua Jiova, kinekiskej monejnemiltiskej kemej kiyolpaktiskej uan kiueyitaliskej Dios (Sal. 78:40, 41; Prov. 23:15).
4. ¿Keniuj uelis tikchiuaskej kemej Jiova keman tikinmachtiskej oksekin tein kijtoua iTajtol Dios?
4 Jiova amo techchikaujkauia maj tiktakamatikan itanauatiluan, ta technextilia keyej semi kuali maj tikchiuakan tein techyolmajxitia (Is. 48:17, 18). Tikchiuaj kemej Jiova komo tikinpaleuiaj momachtianij maj ininselti kiajsikamatikan tein moneki. Keman senkis kiajsikamatiskej ke moneki kipataskej ininnemilis, okachi kinpaleuis (Rom. 12:2). Ijkon, okachi motokiskej iuan Jiova “akin kiita toyolo” (Prov. 17:3).