Galletitas para noitskuiuan
NICK, se takat akin nemi Oregón (Estados Unidos) kijkuiloj: “Ipeujyan xiuit 2014, peuak ninenemiti iuan ome noitskuiuan itech xolal Oregón. Itaixpantijkauan Jiova nochipa ompa yetoyaj ika inincarritos, kuali takentoyaj uan kualtsin kintajpalouayaj nochin akin ompa panouayaj.
”Itaixpantijkauan Jiova amo sayoj katkaj kualtakamej iniuan akin ompa panouayaj, ta no kinikneliayaj noitskuiuan. Se tonal, se siuat akin monotsaya Elaine akin yetoya itech carrito, kinmakak seki galletitas noitskuiuan. Satepan, nochipa keman ompa tipanouayaj, noitskuiuan tsikuinteuayaj uan yayaj kampa yetoyaj itaixpantijkauan Jiova porin kinekiaj kikuaskej galletitas.
”Ijkon panok seki metsti, noitskuiuan semi kiueliliayaj galletitas, uan nejua semi nikuelitaya nitajtos iniuan itaixpantijkauan Jiova. Sayoj ke amo niknekia semi uejkauak nitajtos iniuan. Nikpiayaya panoua 70 xiujmej uan amo semi nikmatia toni kineltokayaj itaixpantijkauan Jiova. Kemej amo semi nikuelitaya tein mochiuaya itech okseki taneltokalismej, niknemilij ke okachi kuali yeskia maj noselti nimomachti Biblia.
”Itech nejon tonalmej, miakkan nikinitak itaixpantijkauan Jiova ika carritos uan no kualtakamej katkaj. Keman niknekia nikmatis teisa, nochipa nechnankiliayaj ika Biblia, uan nejon kichiuak maj okachi iniuan nitakuaujtamati.
”Se tonal, Elaine nechtajtanij: ‘¿Tikonnemilia ke tapialmej se inetetayokolil Dios?’. Niknankilij ke kemaj. Ompa, yejua nechixtajtoltilij Isaías 11:6-9. Ijkuak peuak nikneki nikmatis tein Biblia tamachtia, sayoj ke ayamo niknekia nikuis semej ininamaixuan.
”Niksentokak nitajtoj iuan Elaine uan inamik, Brent seki tonalmej. Maski amo semi tiuejkauayaj, semi kualtsin tein ika titajtouayaj. Nechiluijkej maj nikixtajtolti Mateo hasta Hechos porin nejon nechpaleuiskia maj nikajsikamati toni kijtosneki se kichiuas kemej Cristo, uan ijkon nikchiuak. Tepitsin satepan, peuak nimomachtia Biblia iuan Brent uan Elaine. Nejon panok itech itajkotian xiuit 2016.
”Nochipa nikchixtoyaya tonal keman nimomachtiskia Biblia uan keman niaskia nechikolmej itech Kali kampa tiMosentiliaj. Niyolpakia uan nimotasojkamatia porin uelia nimomachtiaya Biblia. Panoua se xiuit satepan nimoauij. Axkan nikpia 79 xiujmej, uan semi nimotasojkamati porin nikajsik tamachtilis tein melauak. Jiova nechtatiochiuani porin nechkauani maj nipoui iniuan itekitikauan itech nochi taltikpak akin kemej yeskia nochankauan”.