Tein tajtanij akin taixtajtoltiaj
¿Toni kijtosnekik tatitanil Pablo keman kijtoj: “Nitamati kemej se konetsin tein yoli achto ke ajsis tonal”? (1 Corintios 15:8).
Itech 1 Corintios 15:8, Pablo kijtoj: “Keman monextijkaya ininixpan nochin, no monextij noixpan, yejua ika nejua nitamati kemej se konetsin tein yoli achto ke ajsis tonal”. Itech nejin versículo, Pablo ika tajtojtoya keman Dios kichiuak maj kiitani Jesús keman ueyichiujkejya katka. Achto tikijtouayaj ke Pablo kemej yeskia oksepa nemik ompa iluikak miak xiujmej achto ke peuaskiaj yaskiaj iluikak akin kinijitakaj. Sayoj ke, satepan ke okachi timomachtijkej tikitakej ke moneki tikpataskej kemej tikajsikamatiaj nejin.
Itech nejin texto Pablo ika tajtojtoya tein panok keman mopatak uan peuak kitojtoka Cristo. Sayoj ke ¿toni kijtosnekik keman kijtoj: “Nitamati kemej se konetsin tein yoli achto ke ajsis tonal”? Onkak miak taman tein xa kijtosneki nejin.
Pablo sepasan mopatak. Amo akin kichia maj se konetsin yoli achto ke ajsis tonal tein ixyetok. Keman Saulo, akin satepan kiixmatkej kemej Pablo, yaya Damasco para kintajyouiltis tokniuan akin ompa nemiaj, amo kichiaya ke itech ojti kiitaskia Jesús satepan ke oksepa nemik. Pablo amo kinemiliaya ke mopataskia uan tokniuan akin nemiaj Damasco akin yaya kintajyouiltiti amo no kinemiliayaj ke mopataskia. Uan kemej Pablo semi kimojkaitak tein kipanok amo uelik tachiak seki tonalmej (Hech. 9:1-9, 17-19).
Pablo mopatak keman amo monekia. Tajtol griego tein nikan mokepa kemej “tein yoli achto ke ajsis tonal” no uelis mokepas kemej “tein yoli keman amo moneki”. Itech Traducción Kadosh Israelita Mesiánica de estudio motajtolkepa ijkon: “Niyolik keman amo monekia”. Keman Pablo mopatak, Jesús ipa mokepkaya iluikak. Seki versículos achto, Pablo ininka tajtoj sekin akin kiitakaj Jesús satepan ke oksepa nemik achto ke yaskia iluikak, sayoj ke yejua amo kiitaka (1 Cor. 15:4-8). Keman Jesús monextij iixpan Pablo, yejua uelikya kiitak maski moitaya ke katka “keman amo monekia”.
Kinextijtoya ke amo moueyimatia. Seki motelmachtianij kijtouaj ke tajtolmej tein Pablo kikuik itech nejin versículo kikuiaj keman kijijtouayaj aksa. Komo yejua nejon tein Pablo kijtosnekia, kinextijtoya ke kiajsikamatia ke amo kinamikia yeski tatitanil. Pablo no kijtoj: “Nejua okachi amo niueyichiujkej ke okseki tatitanilmej, uan amo nechnamiki maj nechnotsakan tatitanil, porin nikintajyouiltij akin pouij itech inechikol Dios. Sayoj ke kemej Dios nechnextilij itatiochiualis tein amo technamiki, ueli nikchiua nejin tekit” (1 Cor. 15:9, 10).
Yejua ika, keman Pablo kijtoj nejin xa ika tajtojtoya keman Jesús sepasan monextij iixpan, keman sepasan mopatak, oso xa kijtosnekia ke amo kinamikia kiitas Jesús. Tein yeski tein kijtosnekik Pablo, ika tein kijtoj kinextij ke semi kipatiuitak tein kipanok uan kipaleuij maj senkis kineltoka ke Jesús oksepa nenka. Yejua ika, keman kiniluiaya oksekin ke Jesús oksepa nenka, miakpa kintapouiaya tein kipanoka (Hech. 22:6-11; 26:13-18).