¿Tikonmatia?

¿Toni kichiuiliayaj tiopixkamej nochi esti tein kisaya keman kinmiktiayaj tapialmej?

NE UEKAUJ ompa Israel, tiopixkamej kinmiktiayaj tel miakej tapialmej xijxiujtika para kintemaktiskej itech altar. Josefo se tajkuilojkej judío kijtoj ke itech sayoj se tonal keman mochiuaya Pascua, kinmiktiayaj panoua 250 mil ichkatsitsin, yejua ika nejon tonal miak esti mimilauia (Lev. 1:​10, 11; Núm. 28:​16, 19). ¿Toni kichiuiliayaj nochi nejon esti?

Taixmatinij tachkuakej tanakastan den templo tein yetoya keman Jesús nemia uan kichijchiujka Herodes. Ompa kiajsikej kampa takoyokkan katka kampa moita ke kiojtiayaj esti para maj kisani kalampakopa den templo.

Maj tikitakan ome taman tein tapaleuij maj tachipaujkan itech altar:

• Itech altar takoyontoya para maj ompaka kisa esti. Se amaix tein moijkuiloj ne uejkauj uan kipiaya inintanauatiluan judíos tein moijkuiloj satepan den xiuit 200, kijtoua ke itech altar ojkan takoyontoya. Nejon amaix kijtoua ke ininesyo tapialmej tein kintemaktiayaj uan esat tein kisaya keman tachipauayaj, moojtiaya kampa takoyokkan uan panouaya itech caño tein ajsia hasta Cedrón.

  Okse amaix tein ininka tajtoua judíos, no kijtoua ke caños tein kiajsikej chijchiujtoyaj ijkon kemej kijtoua nejon amaix tein moijkuiloj ne uejkauj. Ika tein kiajsikej, motelmachtianij kineltokaj ke xa kemaj kikuiaj nejon caño para maj ompaka moojtiani esti.

• Kampa ualeujtoya miak at. Tiopixkamej kikuiaj miak at para tachipauaskej tanakastan den altar uan kampa kisaya esti. ¿Kani kikuiaj tiopixkamej at tein monekia? Den ueyi xolal kiojtiayaj ika patauak caños hasta kampa mosentiliskia itech uejueyi atekochmej uan tanques. Se motelmachtijkej akin monotsa Joseph Patrich, kijtoj: “Sayoj nejon templo tel kuali kitachijchiuijkaj para maj ajsi tel miak at, uan maj kipia kanika kisas tein pitsotik keman tachipauayaj”.