¿Keyej amo nochipa motenpaleuiaj itaixpantijkauan Jiova keman kinteluiliaj ika teisa?
Itaixpantijkauan Jiova tiktakamatij tayolmajxitilis itech Biblia tein kijtoua maj amo titanankilikan keman techteluiliaj ika teisa oso techkejkelouaj. Kemej neskayot, itech Biblia kijtoua: “Akin kimelaua se takejkelojkej motanilijtok pinaualis” (Proverbios 9:7, 8; 26:4). Timochikauaj tikyolpaktiskej Dios, yejua ika amo timotajtolteuiaj nion timotenpaleuiaj keman techteluiliaj ika teisa (Salmo 119:69).
Tikmatij ke, onkak “tonal keman amo teyi se kijtos uan tonal keman se tajtos” (Eclesiastés 3:7). Yejua ika, titajtouaj iniuan akin kinekij kimatiskej tein melauak, sayoj ke amo titanankiliaj keman kinekij motajtolteuiskej. Ijkon tiktojtokaj itamachtilis Jesús uan neskayot tein techkauilij yejua uan imomachtijkauan.
Jesús amo teyi kijtoj keman kitakajkayauilijkej iixpan Pilato (Mateo 27:11-14; 1 Pedro 2:21-23). Uan amo no tanankilij keman kijtouilijkej ke katka tauankej uan ke tel takuaya. Okachi kuali kikauak maj itachiualisuan kinextianij ke amo melauak tein kijtouiliayaj, kemej kijtoua Biblia: “Tamatilis monextia ke melauak ika itachiualisuan” (Mateo 11:19, TNM). Sayoj ke keman monekik, kinnankilij ika yolchikaualis akin kijtouiliayaj tein amo melauak (Mateo 15:1-3; Marcos 3:22-30).
Jesús kinmachtij imomachtijkauan maj amo mosenkauanij keman kintakajkayauiliskiaj. Kiniluij: “Nantatiochiualme namejuan kuak namechuijuikaltiske uan kuak namechtajyouiltiske uan kuak namechijtouiliske miak xolopijyot porin nantakuautamatij itech Nejuatsin notokay” (Mateo 5:11, 12). Jesús no kiniluij ke ijkuak kintakajyauiliskiaj tapaleuiskia maj kiteixmatiltikan tein kineltokayaj. Keman kipanoskiaj nejon, Jesús kichiuaskia tein motenkauak: “Namechinmaktiliti tajtolme uan tamachilis. Uan ijkon nekes ten namechtauelitstinemij, [...] amo uelis [...] namechtajtolixnamikiske” (Lucas 21:12-15).
Pablo, se itekitikauj Dios kinyolmajxitij akin kichiuayaj kemej Cristo maj amo motajtolteuikan ika tein amo moneki oso “ten nenka san” (Tito 3:9; Romanos 16:17, 18).
Pedro, se itekitikauj Dios kinyolchikauak akin kichiuayaj kemej Cristo maj kipaleuianij tein kineltokayaj keman ueliskiaj (1 Pedro 3:15). Uan no, kijtoj ke tein kichiuaskiaj okachi tapaleuiskia ke tein kijtoskiaj. Kijkuiloj: “Ma tikchiutinemikan ika ten kuali uan ijkon tikintentamatiliske ne taka ten ne yolmijmikilome san” (tejuan tiktalilijkej cursivas; 1 Pedro 2:12-15).