8 Xikonnextili keniuj kichiuaskej

¿TONI KIJTOSNEKI?

Nejin kijtosneki ke moneki se kichiuas tein se kiniluia konemej maj kichiuakan. Se konet no takajkayauas komo kikaki ipopaj ke takajkayaua, xa keman aksa kitemoua ipopaj uan yejua kiluia ikoneuj maj kijto ke amo yetok.

“Miakej kijtouaj: ‘Xikchiua tein nikijtoua uan amo tein nikchiua’, sayoj ke, konemej kichiuaj tein kiitaj, yejuan kemej yeskiaj esponjas tein kichichinaj nochi tein tikijtouaj uan tikchiuaj. Komo tikiniluiaj maj kichiuakan se taman sayoj ke tejuan amo tikchiuaj, yejuan kiitaskej nejon uan techiluiskej” (David).

BIBLIA KIJTOUA: “Tejua akin tikiniluijtinemi oksekin “Amo xitachteki”, ¿titachteki?” (Romanos 2:21).

¿KEYEJ SEMI MONEKI?

Konemej okachi kichiuaj tein kinmachtiaj inintatuan, okachi ke akin iniuan momachtiaj, uan hasta keman telpochmej. Nejin kijtosneki ke namejuan tetatmej uelis okachi kuali nankinmachtiskej nanmokoneuan para maj kichiuakan tein kuali. Komo namejuan nankichiuaj tein nantamachtiaj.

“Miakpa uelis tikiniluiskej tokoneuan se taman uan amo tikmatij ox yekmelauj techkaktokej. Sayoj ke yejuan kiitstokej nochi tein tikchiuaj maski tiknemiliskej ke amo. Uan komo amo tikchiuaj tein tikijtouaj, techiluiskej.” (Nicole).

BIBLIA KIJTOUA: “Akin kipia itamatilis Dios [...] amo taixkajkayaua” (Santiago 3:17).

¿TONI UELIS TIKONCHIUAS?

Xionmotajtani: “¿Nikinnextilia ke nikintasojta nonamik uan nokoneuan? ¿Toni nikita itech televisión? ¿Akonimej iniuan nimouika? ¿Ininka nimotekipachoua oksekin?”. Oso, ¿Nikneki maj nokoneuj kichiua tein nejua nikchiua?

“Notakatsin uan nejua amo tikinchikaujkauiaj tokoneuan maj kichiuakan tein tejuan amo tikchiuaj” (Christine).

Xiontajtani maj mitsontapojpoluikan. Konemej kimatij ke inintatuan mopolouaj. Keman tikiluia monamik oso mokoneuan maj mitstapojpoluikan porin timopoloj, ijkon tikinnextilia maj kuali monejnemiltikan uan maj amo moueyinekikan.

“Komo keman timopolouaj tikijtouaj, amo tiktatiaj uan no titajtanij maj techtapojpoluikan. Tokoneuan no ijkon kichiuaskej” (Robin).