10 Maj touan takuaujtamatikan

¿TONI KIJTOSNEKI?

Keman aksa kitakamati tanauatilmej, kichiua tein kijtoua uan amo takajkayaua. Itatuan, akin kuali iuan mouika, uan kampa tekiti iuan takuaujtamatij.

¿KEYEJ SEMI MONEKI?

Komo tiknextia ke titakuaujtamach mitskauaskej xikchiua okseki taman.

“Motatuan mouan takuaujtamatiskej komo nochipa kuali timonejnemiltia uan tikchiua tein tikijtoua uan amo sayoj keman tietos iniuan” (Sarahi).

BIBLIA KIJTOUA: “Xiksentokakan xiknextikan keniuj yekmelauj nantamatij” (2 Corintios 13:5).

¿TONI UELIS TIKCHIUAS?

Nejin tayolmajxitilismej mitspaleuiskej para maj motatuan oksepa oso okachi mouan takuaujtamatikan.

Amo xitakajkayaua. Komo titakajkayaua oksekin amo mouan takuaujtamatiskej. Sayoj ke, komo tikchiua tein kuali uan tikijtoua tein yekmelauj panok okachi keman timopoloua, oksekin mouan takuaujtamatiskej.

“Amo ouij techkisa amo titakajkayauaskej keman tikchiuaj tein kuali, sayoj ke, keman timopoloua uan amo titakajkayaua, oksekin okachi mouan takuaujtamatij” (Caiman).

BIBLIA KIJTOUA: “Amo keman tiknekij titakajkayauaskej” (Hebreos 13:18).

Xikchiua tein tikijtoua. Ompa Estados Unidos, kintajtanijkej akin tekitij itech recursos humanos toni moneki kichiuas aksa para kiselis se tekit, yejuan kijtojkej ke eyi taman “semej yejua ke maj kichiuakan tein kijtouaj”. Komo axkan tikchiua tein tikijtoua semi mitspaleuis satepan.

“Komo notatuan nechiluiaj maj nikchiua se taman uan niman nikchiua yejuan kiitaj nejon. Komo nochipa nikchiua tein nikijtoua okachi takuaujtamatij nouan” (Sarah).

BIBLIA KIJTOUA: “Nikyekmati ke tinechkakis, [...] tikchiuas okachi ke tein nimitsiluia” (Filemón 21).

Amo xiyolijsiui. Niman tikitaj keman aksa moskaltijtok, sayoj ke, moneki tiempo para se kimatis keniuj tanemilia uan ox kichiua tein kijtoua.

“Maski tikneki, motatuan uan oksekin amo niman mouan takuaujtamatiskej, sayoj ke komo nochipa tikchiua tein tikijtoua okachi peuas takuaujtamatiskej mouan” (Brandon).

BIBLIA KIJTOUA: “Amo xiyolijsiuikan” (Colosenses 3:12).