Se kiixtalis se kichiuas seki taman, kemej yeskia seki planos para se kichiuas se kali. Uelis tikchiuas komo timochikaua.
TELPOCHMEJ UAN ICHPOCHMEJ
12 Maj tikixtalikan tikchiuaskej seki taman
¿TONI KIJTOSNEKI?
Se kiixtalis teisa amo kijtosneki sayoj tiknemiliskej tikchiuaskej se taman uan tikchiaskej maj iselti mochiua. Para tikchiuaskej tein tikixtalijkej moneki kuali tiknemiliskej keniuj tikchiuaskej, xa tikpataskej seki taman uan chikauak titekitiskej.
Tein tikixtaliskej tikchiuaskej uelis yeski niman oso okachi uejkauas, xa uelis tikchiuaskej itech seki semanas, seki metsti oso xiujmej. Komo tikixtaliaj tikchiuaskej se taman itech seki xiujmej, achto moneki tikixtaliskej tikchiuaskej okseki taman tein techpaleuis.
¿KEYEJ SEMI MONEKI?
Keman tikchiua tein tikixtalia okachi motech titakuaujtamati, okachi kuali timouikas iniuan oksekin uan okachi tiyolpakis.
Okachi motech titakuaujtamatis. Komo tikixtalia tikchiuas seki taman itech seki semanas uan ijkon tikchiua, nejon mitspaleuis xikixtali tikchiuas okseki taman tein okachi uejueyi. No mitspaleuis mojmostaj xikixnamiki ouijkayomej, kemej keman oksekin kinekiskej xikchiua tein amo kuali.
Okachi kuali timouikas iniuan oksekin. Miakej kiuelitaj mouikaskej iniuan akin mochikauaj kichiuaskej tein kiixtaliaj uan kimatij toni kichiuaskej. Uan no keman tiksenchiuaj se taman tein tikixtalijkej okachi kuali timouikaj.
Okachi tiyolpakis. Keman tikchiua tein tikixtalia kuali timomachilia.
“Semi nikuelita nikixtalis nikchiuas seki taman porin ijkon nimochikaua nimatamis se tekit. Semi kualtsin keman se kiita ke se kichiuak tein se kiixtalij, uan hasta se kijtoua: ‘¡Nikchiuak!’” (Christopher).
BIBLIA KIJTOUA: “Akin kiitstok ejekat amo tatokas, uan akin kiitstok mixti amo kiololos tatok” (Eclesiastés 11:4).
¿TONI UELIS TIKCHIUAS?
Komo tikixtalij tikchiuas teisa, xikchiua nejin.
Xikixtali toni tikneki tikchiuas. Xikijkuilo tein tikixtalis, ompa xikita katiyejua achto tikchiuas.
Xikixtali keniuj ueliskia tikchiuas. Xikchiua nejin:
Xikixtali kemanian tiktamichiuas.
Xikijkuilo keniuj tikchiujtiyas.
Xiknemili toni mitsouijkisas tikchiuas uan keniuj tikyektalis.
Xikpeualti tekit. Amo moneki tikpias nochi tein monekis para peuas tikchiuas tein tikixtalij. Yekinika xiknemili toni moneki tikchiuas uan ijkon xikchiua. Xikita toni tikchiuakia uan keniuj nejon mitspaleuis.
BIBLIA KIJTOUA: “Akin kuali tekiti uan kiixtalia tein kichiuas, kuali kikisas tein kiixtalis” (Proverbios 21:5).