Tajyouilis tein tikpanouaj keman momikilia akin tiktasojtaj

“Sofíaa uan nejua tikuikayajya panoua 39 xiujmej ke timonamiktijkaj keman momikilij, semi uejkauak mokokouaya. Akin iniuan nimouika semi nechpaleuijkej, uan no niktemouaya nochipa nikchiujtos teisa. Sayoj ke, itech se xiuit semi nitajyouijtoya, semi mopataya kemej nimomachiliaya. Uan hasta axkan ke panokejya kemej eyi xiujmej ke momikilij, miakpa keman amo nikmattok semi nitayokoya” (Kostas).

¿Momikilij aksa akin semi tikontasojta? Komo ijkon, xa tionmomachiliani kemej Kostas. Keman momikilia akin iuan timonamiktijkaj, se tochankauj oso akin kuali iuan timouikaj, semi titayokoyaj uan timotekipachouaj. Akin kuali momachtiaj tayokol tein se kimachilia, kijtouaj ke ijkon panoua. Se tajkuilol itech amaix The American Journal of Psychiatry kijtoua: “Keman aksa momikilia senkis tikpolouaj uan semi tetajyouiltia”. Keman aksa semi tayokoxtok porin momikilij aksa akin kitasojta, xa motajtanis: “¿Hasta kemanian ijkon nimomachilis? ¿Oksepa niyolpakis? ¿Keniuj niyolseuis?”.

Itech nejin amaix ¡Taijxitilis! Tikonajsis tanankilil. Itech okse tamachtilis tikonitas ouijkayomej tein xa tikonpanotok komo momikilij aksa akin tikontasojta. Itech okseki tamachtilismej tikonitas tein mitsonpaleuis xikonxiko tayokol.

Maj nejin amaix kinpaleui uan kinyolseui akin tajyouijtokej porin momikilij aksa akin kitasojtaj.