Tein okachi kinpaleuia akin kipanouaj se ueyi tayokol

ITECH XIUJMEJ TEIN PANOUANIJ, MIAKEJ MOMACHTIANIJ TEIN SE KIPANOUA ITECH SE UEYI TAYOKOL. Sayoj ke kemej tikitakej, miakpa tein teyolmajxitiaj motelmachtianij kinextia tamatilis tein kipia Biblia tein uejkaujya moijkuiloj. Nejin kinextia ke tein techyolmajxitia kisentoka tapaleuia. Tein melauj, Biblia amo sayoj techpaleuia maj ika timoixyekanakan, ta no techmachtia tein amo uelis tikajsiskej okseko uan kinyolchikaua akin tayokoxtokej porin aksa momikilij.

• Tikmatiskej ke amo tajyouijtokej akin tikintasojtaj.

  Biblia kijtoua itech Eclesiastés 9:5 ke akin momikilijkejya “amo teyi kimatijok”. Ixpoliuij inintanemililuan (Salmo 146:4). Yejua ika, Biblia kijtoua ke keman aksa momikilia kemej yeskia kuali kochtok (Juan 11:11).

• Techyolchikaua tikmatiskej ke Dios techtasojta.

  Biblia kijtoua: “Iixtololouan Jiovaa yetokej iniuan akin yolmelaujkej, uan kinkaki keman kitataujtiaj maj kinpaleui” (Salmo 34:15). Tikiluiskej Dios tein tikmachiliaj amo sayoj techpaleuia maj kuali timomachilikan oso maj tiyektanemilikan, ta techpaleuia maj okachi kuali timouikakan iuan Akin techchijchiuak, akin uelis kikuis ichikaualis para techyolseuis.

• Okachi kuali tinemiskej.

  Biblia miakpa ika tajtoua keman oksepa nemiskej akin momikilijkejya. Se taman, keman kijtoua keniuj tinemiskej amo uejkaua, kijtoua ke Dios “kinelkaualtis [nochin] ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apocalipsis 21:3, 4). ¿Tikonnemilia keniuj yeski?

Miakej akin kineltokaj Jiova, Dios akin ika tajtoua Biblia, kinpaleuia maj kixikokan tayokol porin kichiaj maj oksepa nemikan akin momikilijkejya. Kemej Ann, akin momikilij itakauj keman kiuikayajya 65 xiujmej ke monamiktijkaj, kijtoua: “Biblia techyekiluia ke akin momikilijkejya amo tajyouijtokej uan ke Dios kichiuas maj oksepa nemikan nochin akin yetokej itech italnamikilis. Nochipa ika nitanemilia nejin keman nikelnamiki notakauj uan ijkon ueli nikxikoua tein amo kuali tein nechpanok”.

Tina, akin achto ika titajtojkej, kijtoua: “Keman momikilij Timo uan hasta axkan, nikitani keniuj Dios nechpaleuiani. Nikitani keniuj Jiova semi nechpaleuia keman nimotekipachoua. Senkis nikneltoka ke oksepa nemiskej akin momikilijkejya ijkon kemej kijtoua Biblia, uan nechpaleuia maj nitaxiko hasta keman oksepa nikitas Timo”.

Nejin tajtolmej kinextiaj tein millones kimachiliaj akin takuaujtamatij itech Biblia. Komo tikonnemilia ke tein Biblia kijtoua sayoj se takochitalis, kuali yeskia xikonita tein kinextia ke taixejekol tein tayolmajxitia uan ke mochiuas tein ompa moijtoua. No tikonitas ke yejua tein okachi kinpaleuia akin tayokoxtokej porin momikilij aksa akin kitasojtaj.

¿TIKONNEKI OKACHI TIKONMATIS KENIUJ OKSEPA NEMISKEJ AKIN MOMIKILIJKEJYA?

Itech Internet kampa timoteixmatiltiaj jw.org/ncj, tikonajsis videos tein ika tajtouaj nejin.

¿KENIUJ MOAJSIJ MIKEMEJ?

¿Toni techpanoua keman timomikiliaj? Tanankilil tein kitemaka Biblia semi techyolseuia.

Xikonita kampa kijtoua BIBLIOTECA >VIDEOS (Biblia).

¿TIKONUELITASKIA TIKONKAKIS KUALI TANAUATILMEJ?

Noyampa mokakij amo kuali tanauatilmej, ¿kani tikonnemilia ke uelis tikajsiskej kuali tanauatilmej? Nejin video kinextia amaix Kuali tanauatilmej tein Dios kitemaka.

Xikonita BIBLIOTECA >VIDEOS (Tonechikoluan uan totanojnotsalis).