Tein kinpanok Ricardo uan Andrés

Tein Biblia tamachtia techpaleuia maj kuali tinemikan. Maj tikitakan keniuj kinpaleuij Ricardo uan Andrés.

RICARDO. Keman nikpiaya 15 xiujmej, peuak nimouika iniuan sekin akin kichiuayaj tein amo kuali. Kemej semi nitelpochok nikatka, nikchiuaya nochi tein yejuan kichiuayaj. Hasta niknekia maj nechtsakuanij majtakti xiuit. Kampa ninemia kinpoujkaitayaj uan kinmoujkaitayaj akin tsaktoyaj. Yejua ika niknekia maj no ijkon nechitanij.

Niauilnemia, nikuia drogas uan nitateuiaya. Se youak timotatoponilijkej iniuan oksekin. Niknemilij ke nechmiktiskiaj, sayoj ke uelik nicholoj. Ijkuak, peuak nitanemilia itech tein nikchiujtoya uan itech tein niknekia nikchiuas. Nikixtalij nimopatas, sayoj ke ¿keniuj nikchiuaskia? ¿Akoni ueliskia nechpaleuis?

Miakej nochankauan kipiayaj miak kuejmolmej uan amo yolpakiaj. Sayoj ke ichankauan se notío amo ijkon nemiaj. Nikmatia ke kichiuayaj tein kuali uan tein Biblia tamachtia. Yejuan nechiluijkej ke itokay Dios yejua Jiova. Yejua ika, tepitsin satepan ke timotatoponilijkej iniuan oksekin nejon youak, niktataujtij Jiova ika itokay uan nikiluij maj nechpaleui. Mostika se itaixpantijkauj Jiova nechkalpanoj. ¡Amo uelia nikneltokaya! Yejua peuak nechmachtia ika Biblia.

Sayoj ke nikpiak se ueyi kuejmol. Akin achto iniuan nimouikaya nechnotsayaj ika teléfono porin kinekiaj maj iniuan niyetoni. Maski nechouijmakak, nikiniluij ke amo. Semi niknekia niksentokas nimomachtis Biblia uan niyolpaki porin ijkon nikchiuak. Nikpatak kemej nimonejnemiltiaya uan axkan yekmelauj niyolpaki.

Kemej nikixtalijka maj nechtsakuanij majtakti xiuit porin niknekia maj sekin nechpoujkaitakan, niktajtanij Dios maj nechkauani maski sayoj majtakti xiuit maj nikinmachti oksekin tein Biblia kijtoua ijkon kemej nejua nechmachtijkej. Dios kinankilij nonetataujtil porin diecisiete xiujmej nikinmachtiani oksekin. Uan tein melauj, amo keman nechtsakkej.

Miakej akin achto iniuan nimouikaya, miak xiujmejya tsaktokej uan oksekin momikilijkejya. Semi nikintasojkamatilia nochankauan akin itaixpantijkauan Jiova maj monejnemiltikan kemej Biblia tamachtia. Okachi nikinpoujkaita yejuan ke akin iniuan nimouikaya. Sayoj ke, okachi niktasojkamatilia Dios porin nechpaleuij maj kuali ninemi.

ANDRÉS. Kampa niyolik uan nimoskaltij tatasojti, miakej kikuij drogas, temiktiaj, tachtekij uan auilnemij. Nopaj tauanaya uan kikuia cocaína. Nomaj uan yejua nochipa motajtolteuiayaj uan moteuiayaj.

Keman semi nitelpochok nikatka peuak nitauana uan nikui drogas. Amo semi niyetoya nokalijtik, ta nitachtektia uan niknamakaya tein nikichtekia. Seki xiujmej satepan, keman nopopaj kitemoj kuali nouan mouikas, nechnextilij maj ichtaka nikuikatinemi drogas uan okseki taman uan satepan ueliskia niknamakas. Niman niktanik miak tomin. Se tonal, policías nechkitskitoj nokalijtik porin niknekia nitemiktis. Nechtsakkej makuil xiuit.

Se tonal, techyoleujkej akin titsaktoyaj maj tikakitij tein yayaj tamachtitij itaixpantijkauan Jiova uan nitakakito. Tein kijtojkej katka melauak, yejua ika peuak nimomachtia Biblia iniuan. Yejuan senkis nechmachtijkej keniuj moneki se monejnemiltis ijkon kemej Biblia tamachtia.

Niman nikitak ke komo niknekia nimopatas monekia maj nechpaleuikan uan okachiok porin oksekin akin no tsaktoyaj peujkej nechmojmoujtiaj porin amo kiuelitayaj maj nimomachti Biblia. Niktajtanij Jiova maj nechyolchikaua uan maj nikmati tein ueliskia nikchiuas. Nejon nechyolchikauak maj nikintapoui tein nimomachtijtoya akin no tsaktoyaj.

Keman nikisak, semi nimouia porin amo nikmatia toni nechpanoskia uan yejua ika niknekia nimokauas okseki tonalmej. Keman niyajtoyaya, sekin akin tsaktoyaj uejka monauatiayaj ika ininmauan. Oksekin hasta nechiluiayaj: “Kuali ximokepa tiopixkatsin”.

Amo nikneki niknemilis keniuj nimoajsiskia axkan komo amo nikauaskia Dios maj nechmachti. Niktasojkamatilia yejuatsin porin nechtasojta uan porin kiitak ke ueliskia nimopatas.a