Maj amo se yolijsiui

¿KENIUJ SE KINEXTIA?

Akin amo yolijsiui kipaleuia:

• maj amo niman kineki kipias se taman

• maj amo niman kualani

• maj kichiua tein moneki maski amo kiuelita

• maj ininka tanemili oksekin

¿KEYEJ MOTELNEKI MAJ AMO SE YOLIJSIUI?

Konemej akin amo yolijsiuij mochikauaj amo kichiuaskej tein amo kuali maski kiuelitaskej. Sayoj ke, keman moskaltiaj uan yolijsiuij peua:

• kualanij

• tayokoyaj

• tachichinaj, kikuij droga oso tauanaj

• amo moyektamakaj

Moijtoua ke konemej akin amo yolijsiuij, kuali kitekitiltiaj tomin keman ueyiaj, amo semi kokolispeuaj uan kitakamatij tanauatilmej tein ika moixyekanaj itech altepet. Yejua ika, Angela Duckworth, akin tamachtia itech se Universidad ompa Pensilvania, kijtoj: “Semi tepaleuia maj amo se yolijsiui”.

¿KENIUJ TIKONMACHTIS MOKONEUAN MAJ AMO YOLIJSIUIKAN?

Xikonmachti ke amo tikonchiuas nochi tein kinekij.

BIBLIA KIJTOUA: “Kuak tiknekis tikijtos ‘kema’, sayo xikijto ‘kema’. Uan kuak tiknekis tikijtos ‘amo’, sayo xikijto ‘amo’” (Mateo 5:37).

Kemansa, konemej chokaj oso tsajtsij hasta ininixpan oksekin porin kinekij teisa. Komo inintatuan kinmakaj tein kinekij, yejuan nochipa ijkon kichiuaskej keman kinekiskej teisa.

Sayoj ke, komo tetatmej amo kinmakaj tein kinekij, konemej kimatij ke amo nochipa kipiaskej tein kinekiskej. Tapajtijkej David Walsh, kijtoua: “Akin kiajsikamatij nejin taman okachi yolpakij. Yejua ika semi tikinpaleuiaj tokoneuan komo tikinmachtiaj ke amo nochipa tikinmakaskej nochi tein kinekiskej”.a

Komo axkan amo tikonmaka mokoneuj nochi tein kineki, keman ueyias kipaleuis maj amo kikui droga keman kimakaskej, maj amo moteka iuan aksa achto ke monamiktis oso maj amo kichiua okseki taman tein uelis kijtakos.

Xikonmachti ke tein kichiuaskej uelis kinpaleuis oso kinijtakos.

BIBLIA KIJTOUA: “Nochi tatokme ten in tagat motokilis, yejua nojon takilot kiselis” (Gálatas 6:7).

Mokoneuj moneki kimatis ke tein kichiuas uelis kipaleuis oso kijtakos. Yejua ika, komo yolijsiui uelis kipanos tein amo kuali. Xikonnemili: komo mokoneuj niman kualani porin teisa amo kiuelita amo kinekiskej iuan mouikaskej. Sayoj ke, komo amo niman kualani uan tekaki keman moneki, oksekin kinekiskej iuan mouikaskej. Xikonpaleui mokoneuj maj kiita ke komo amo yolijsiui okachi kuali nemis.

Xikonmachti maj kichiuakan tein okachi tayekantok.

BIBLIA KIJTOUA: “Nankiyekitaskej toni okachi tayekantok” (Filipenses 1:10, TNM).

Keman amo tiyolijsiuij techpaleuia maj amo tikchiuakan tein amo kuali. Uan no, techpaleuia maj tikchiuakan tein moneki maski amo tikuelitaskej. Semi moneki maj mokoneuj kimati tein okachi tayekantok. Se taman yejua keman kichiua tekimej tein kikauiliaj kampa momachtia achto ke mauiltis.

Xikonnextili keniuj kichiuaskej.

BIBLIA KIJTOUA: “Namechnextilij ya para kenin nankichiuaske namejuan. Uan ijkon xikchiuakan” (Juan 13:15).

Konemej kiitaj tein inintatuan kichiuaj keman teisa kinkualantia. Yejua ika, xikonnextili ke okachi kuali maj amo se yolijsiui. Xikonnemili nejin: keman mokoneuj kichiua se taman tein amo kuali, ¿niman tionkualani?