Tein techpaleuis maj tiyolpakikan ika tein tikpiaj
Tinochin, akin monamiktijkejya uan akin amo, akin xiuejkejya uan akin telpochmej, tiknekij tiyolpakiskej. Uan Dios Akin techchijchiuak no ijkon kineki maj timomachilikan. Yejua ika techiluia tein techpaleuis.
Kuali xiontekiti
“Kachi kuali ma motekitilti ka imauan tech se kuali tekit para ijkon uelis kinpaleuis oksekin ten kipolojtinemij ten kuaske” (EFESIOS 4:28).
Dios Akin techchijchiuak kineki maj tikitakan ke semi kuali komo titekitij. Porin akin kuali tekiti ueli kinixpanoltia ichankauan, uan nejon kichiua maj yolpaki. Uan hasta ueli kipaleuia akin kipoloua. Akin kitemaka tekit kiuelita maj aksa kuali tekiti, yejua ika xa nochipa kimakas tekit. Yekmelauj kemej kijtoua Biblia, akin kuali tekiti kiselia tein kuali porin tekit se “inetetayokolil Dios” (Eclesiastés 3:13).
Xionmelaujkanemi
“Titakuaujtamatij ke tikpiaj se tanemilil tein melauak, porin tiknekij timonejnemiltiskej timelaujkej itech nochi” (HEBREOS 13:18, TNM).
Komo timelaujkanemij, kuali timomachiliskej, tiyolseujtoskej uan kuali tikochiskej. Uan oksekin, techpoujkaitaskej uan totech takuaujtamatiskej. Akin amo melaujkanemij amo ijkon kinpanoua. Porin xa kinkuejmoloua inintanemilil uan mouij maj oksekin kimatikan tein kichiuaj.
Xikonita tomin ika taixejekolis
“Amo ximotekauilikan de xiktasojtatinemikan kachi ok intomin. Ta, ximoyolpaktijtinemikan sayo ika ten nankipiaj ya” (HEBREOS 13:5).
Tomin techpaleuia maj tikouakan tein tikuaskej uan okseki taman tein moneki, sayoj ke komo tiktelnejnekij tikpiaskej miak tomin techualkuilis kuejmolmej. Akin kitemoua kipias okachi kipoloua miak tiempo uan mosioujtia. Nejon uelis kichiuas maj amo kuali mouikaok iuan itakauj oso isiuatsin, uan maj amo ueli yeto iniuan ikoneuan uan hasta uelis kokolispeuas (1 Timoteo 6:9, 10). Akin kineki kipias miak tomin hasta uelis takajkayauas. Se takat tamatkej kijtoj: “Takat akin takuaujtamach kiselis miak tatiochiualismej, sayoj ke akin kineki ijsiujka motomintis tajyouis” (Proverbios 28:20).
Xikonseli tamachtilis tein okachi kuali
“Xikyekpia motamatilis uan motanemilil” (PROVERBIOS 3:21).
Se kuali nemachtil techpaleuia maj tikchiuakan teisa kemej moneki uan maj kuali titetatmej. Sayoj ke, komo tikseliaj sayoj nejin nemachtil amo techpaleuis maj tiyolpakikan uan maj nochipa tikpiakan tomin. Ta para kuali tietoskej, moneki tikseliskej tamachtilis tein Dios techmaka. Biblia kijtoua ke akin kikaki Dios kuali kikisas nochi tein kichiuas (Salmo 1:1-3).