Tanojnots 23

Faraón kipiak ome takochitalismej

PANOK ome xiuit, uan José kisentokaya tsaktoya. Tetayilmakakej ayamo kielnamikia José. Itech se youak Faraón kipiak ome takochitalismej tein kijtosnekia teisa, uan motajtaniaya toni kijtosnekia. ¿Tikita itech taixkopin kampa kochtok? Mostika, Faraón kininotsak tamatinij tein kinpiaya uan kintapouij tein kikochitak. Sayoj ika, yejuan amo uelik kiiluijkej toni kijtosnekia.

Ijkuaka tetayilmakakej kielnamikik José. Kiiluij Faraón: ‘Kampa nej nitsaktoya yetoya se takat tein ueli kijtoua toni kijtosneki takochitalismej’. Faraón niman tanauatij maj kikixtikan José kampa tsaktoya.

Faraón kitapouij José tein kikochitak: ‘Nikitak chikome kuakuejtenamej tomaujkej uan kualtsitsin. Ompa nikitak chikome kuakuejtenamej kakalachtikej uan omitikej. Uan tein kakalachtikej kinkuajkej tein tomaujkej.

’Ika ojpa, nikochitak chikome imakuoujyo trigo, tein kitelpiaya iteyo uan chikauaka katka tein moskaltiaya itech sayoj se taktsoj. Ompa nikitak chikome imakuoujyo trigo uakik uan pitsaujkej. Uan imakuoujyo trigo tein pitsaujkej, peuak kintolouaj chikome imakuoujyo trigo tein kuajkuali’.

José kiiluij Faraón: ‘Nejon ome takochitalismej kijtosneki se tamansaj. Chikome kuakuejtenamej tomaujkej uan chikome imakuoujyo trigo tein kitelpiaya iteyo, kijtosneki chikome xiuit, uan chikome kuakuejtenamej kakalachtikej uan chikome imakuoujyo trigo tein pitsaujkej, kijtosneki okse chikome xiuit. Panos chikome xiuit keman moteltachiuas Egipto. Uan satepan panos okse chikome xiuit keman tepitsisaj motachiuas’.

Yejika José kiiluij Faraón: ‘Xikijita se takat tamatkej uan xikauili maj kiololo takual itech nochi chikome xiuit keman moteltachiuas. Ijkon, taltikpakneminij amo mayamikiskej itech chikome xiuit keman tepitsisaj motachiuas’.

Faraón kiuelkakik tanemilil. Uan kijitak José maj kiololouani takual uan maj kieuani. José mochiuak se takat tein kipiak se ueyi tanauatil itech altepet Egipto, maski amo semi kemej Faraón.

Chikueyi xiuit satepan keman onkaya mayan, José kinitak seki takamej ualayaj. ¿Tikmati akonimej katkaj? ¡Katkaj majtakti ikniuan tein tayekanayaj! Imin popaj Jacob, kintitanik Egipto maj kikuitij takual porin kitamijtoyajya itech nochi Canaán. José kinixmatik ikniuan, sayoj ika yejuan amo kixmatkej. ¿Tikmati keyej? Porin José okachi xiuejya katka, uan no taman takentoya.

José kielnamikik ika keman katka konetok, kikochitaka ika ikniuan moixpilouayaj iixpan. ¿Tikelnamiki ika tikixtajtoltij nejon? Yejika José kiajsikamatik ika katka Dios akin kititanik Egipto, uan maj ompa kichiuani se kuali tekit. ¿Toni timoluia kichiuak José? Tikitatij.

Génesis 41:1-57; 42:1-8; 50:20.