Tanojnots 47
Semej israelitas tachtekik
¡XIKITA tein kitaltoktok nejin takat itech ichan tachijchiuj ika taken! Se kualtsin taken, se takoton oro uan seki plata. Nejin kikixtij Jericó. Sayoj ika, ¿toni monekia kichiuiliskej tein kiajsiskiaj Jericó? ¿Tikelnamiki?
Monekia kichichinoskej, uan oro uan plata monekia kieuaskej itech itabernáculo Jiova. Ika tein kichiujkej israelitas amo kitakamatkej Dios. Kichtekilijkej tein iaxka katka. Takat tein tachtekik motokaytia Acán, uan tein iuan yetokej, ichankauan takat. Maj tikitakan toni mochiuak.
Satepan keman Acán tachtekik, Josué kintitanik seki takamej maj moteuitij iuan altepet Hai. Sayoj ika kintankej. Sekin mikkej uan oksekin cholojkej. Josué moteltayokoltij. Yejika moixpiloj talpan, kichiuak netataujtil iuan Jiova uan kiiluij: ‘¿Keyej tikauak maj mochiua nejin?’
Jiova kinankilij: ‘¡Ximoajokui! Israelitas tajtakojkej. Kikuikej tein monekia kichichinoskej oso kieuaskej itech tabernáculo. Kichtekkej se kualtsin taken uan amo kijtouaj. Amo namechtatiochiuis komo amo nankichichinouaj taken uan nankixpolouaj tachtekkej’. Jiova kiiluij Josué ika yaya kinextiliti akoni katka takat tein amo yolkuali.
Yejika Josué kinsentilij israelitas, uan Jiova kinextij ika takat tein amo yolkuali katka Acán. Yej kijtoj: ‘Nitajtakoj. Nikitak se kualtsin taken, se takoton oro uan seki plata. Niktelixnekik uan yejika nikuikak nochan uan ompa niktaltokak’.
Keman kiajsikej tein toktoya uan kiuikilijkej Josué, yej kiiluij Acán: ‘¿Keyej titechouijkankalakij? ¡Axkan Jiova mitstatsakuiltiti!’ Ompa, nochin israelitas kintetenkej Acán uan ichankauan uan mikkej. ¿Toni technextilia nejin? Maj amo keman timokuilikan teisa tein amo toaxka.
Satepan israelitas oksepa yajkej moteuitoj iuan altepet Hai. Uan ijkuak, Jiova kinpaleuij israelitas uan tatankej.