Tanojnots 52
Gedeón uan 300 takamej
¿TIKITA tein mochiujtok itech taixkopin? Nejin takamej tateuianij israelitas. Tein tikinita moixtoktokej, atitokej. Tamelaujkej Gedeón yetok imiuan. Yej kinitstok keniuj atij.
Xikyekita keniuj tataman atij nejin takamej. Sekin moixtoktokej uan pantayitokej at. Sayoj ika se takat tayitok ika imay, uan ijkon ueli kiita toni mochiua. Nejin motelnekia, ta Jiova kiiluij Gedeón maj kinijitaskia sayoj tein motachilijtoskiaj keman atitoskiaj. Oksekin monekia mokepaskej iminchan. Maj tikitakan keyej.
Israelitas oksepa kipiakej miak ouijkayomej, porin amo kitakamatiaj Jiova. Madianitas motelmiakilijkaj uan kinchiuiliayaj israelitas tein amo kuali. Yejika israelitas kitajtanijkej inepaleuil Jiova, uan yej kinkakik keman motsajtsiliayaj.
Jiova kiiluij Gedeón maj kinsentiliani tateuianij, uan Gedeón kinsentilij 32,000 Tateuianij. Sayoj ika tein kinteuisnekiaj israelitas katkaj 135,000 tateuianij. Maski amo katkaj miakej israelitas, Jiova kiiluij Gedeón: ‘Tikinpia miakej takamej’. ¿Keyej kiiluij nejon?
Komo israelitas tataniskiaj itech neteuil, acha moluiskiaj ika imiselti tatankej, uan amo monekia maj Jiova kinpaleuiani maj tatanikan. Yejika Jiova kiiluij Gedeón: ‘Xikinilui ika nochin tein mouij maj mokepakan iminchan’. Keman Gedeón kichiuak nejin, 22,000 tateuianij mokepkej. Sayoj mokaujkej 10,000 takamej tein moteuiskiaj imiuan 135,000 tateuianij.
Sayoj ika, ¡xikaki! Jiova kijtoua: ‘Tikinpiaok miakej takamej’. Yejika kiiluij Gedeón maj kiniuikani maj atitij ameyal, uan nochin tein pantayiskiaj at maj mokepaskiaj iminchan. Jiova motenkauak: ‘Nimitspaleuis xitatani ika 300 takamej tein motachilijtoyaj keman atitoyaj’.
Keman yaya moteuitij, Gedeón kinixeloj exkan 300 takamej. Nochin takamej kinimakak sejse kuaomit uan sejse komit tein iijtik kipiaya se okot. Keman ajsitoyaya tajko youal, nochin mosentilijkej uan kiniyoualojkej taixnamikinij imin kaluan tachijchiuj ika taken. Ompa, sepasaj kipitskej imin kuaomiuan uan kintapankej imin konuan, uan tsajtsikej chikauak: ‘¡Neteuil iaxka Jiova uan Gedeón!’ Keman taixnamikinij ijsakej, amo kimatkej toni mochiuaya uan momoujtijkej. Nochin cholojkej uan israelitas tatankej.