Tanojnots 54
Takat tein okachi chikauak
¿TIKMATI akoni takat tein okachi chikauak katka? Se tamelaujkej tein motokaytij Sansón. Katka Jiova akin kimakaya ichikaualis. Achtopa keman nemiskia Sansón, Jiova kiiluij imomaj: ‘Tikpiati se konet, uan yej kinpaleuis israelitas maj momakixtikan imimako filisteos’.
Filisteos katkaj taltikpakneminij amo yolkualmej tein nemiaj Canaán. Kinpiayaj miakej tateuianij, uan kinchiuiliayaj israelitas tein amo kuali. Se tonal, keman Sansón yaya kampa nemiaj filisteos, kinamikito se ueyi tekuani nanalkatiualaya. Sayoj ika, Sansón kimiktij tekuani sayoj ika imauan. No kinimiktij tel miakej filisteos tein amo yolkualmej.
Satepan, Sansón kinekia monamiktis iuan se siuat tein motokaytij Dalila. Tayekananij filisteos motenkaujkaj iuan Dalila ika sejse kimakaskiaj 1,100 platajtomin komo kiniluiskia toni kichiuaya maj tel chikauak Sansón. Dalila kinekia tomin. Uan kemej amo katka yekmelauj itasojikniuj Sansón niono israelitas, yejika kisentokak kitajtanijtoya Sansón keyej katka se takat tel chikauak.
Ika tamik, Dalila uelik kichiuak maj Sansón kiiluiani tein amo monekia kijtos keyej katka tel chikauak. Kiiluij: ‘Amo keman nechtekiliaj notson. Ijkuak ninemik, Dios nechijitak maj nimochiua niitekitikauj itech nochi nonemilis, tein moixmati kemej se nazareo. Komo iksa nechtekiliaj notson, nikpoloskia nochikaualis’.
Keman Dalila kikakik nejon, kichiuak maj Sansón kochini itankuaixko. Satepan kikalakij se takat maj kitekiliani itson. Keman Sansón ijsak, ipa kipolojkaya ichikaualis. Ompa, filisteos kalakkej uan kikitskijkej. Kikixtilijkej ixtololouan uan kiteltekitiltijkej.
Se tonal filisteos kichiuilijkej se ueyi iluit imin tiotsin Dagón, kikixtijkej Sansón kampa tsaktoya uan ika mokejkelojkej. Ijkuak nejon, oksepa ueyakiakaya itson. Sansón kiiluij konet tein kimajchanaya: ‘Xinechkaua maj nikitski kalikximej tein kimamajtokej ueyi kali’. Ompa Sansón motataujtij iuan Jiova maj kimakani chikaualis, kinkuik kalikximej uan kijtoj chikauak: ‘Xinechkaua maj nimiki imiuan filisteos’. Yetoyaj 3,000 iluitinij filisteos, uan keman Sansón kintopeuak kalikximej ika nochi ichikaualis, ueyi kali xitinik uan kinimiktij nochin taltikpakneminij tein amo yolkualmej.