Tanojnots 63
Salomón se tekiuaj tamatkej
SALOMÓN katka telpochok keman mochiuak tekiuaj. Kitasojtaya Jiova uan kichiuak ijkon kemej ipopaj David kiyolmajxitijka. Salomón kiyolpaktiaya Jiova, yejika se youak kiiluij itech se takochitalis: ‘Salomón, ¿toni tikneki maj nimitsmaka?’
Salomón tanankilij: ‘NoDios Jiova, nej nitelpochok uan amo nikmati keniuj nitekiuajtis. Yejika, xinechmaka tamatilis uan ijkon uelis kuali nikinixyekanas israelitas’.
Jiova kiyolpaktij tein Salomón kitajtanij. Yejika kiiluij: ‘Kemej tinechtajtanij tamatilis uan amo maj uejkaua xinemi, niono xikpia miak taman, nej nimitsmakas tamatilis kemej niose taltikpaknenkej nikmakatok. Uan amo sayoj yejua, ta no nimitsmakas tein amo tinechtajtanij. Nikchiuas xikpia miak taman uan ueyiot’.
Amo uejkauak, ome siuamej kiitatoj Salomón ika se kuejmol tel ouij. Yekinika siuat kijtoj: ‘Nejin siuat uan nejua tisenemij. Nej nikpiak se konet, uan ome tonal satepan yej no kipiak se konet. Se youak, ikoneuj momikilij. Uan keman nikochtoya, ikoneuj miket kitalij nonakastaj uan kiuikak nokoneuj. Keman niijsak uan nikitak konet miket, nikyekitak ika amo katka nokoneuj’.
Keman okse siuat kikakik nejin, kijtoj: ‘¡Amo! ¡Konet tein yoltok noaxka, uan tein miket yejua iaxka!’ Yekinika siuat tanankilij: ‘¡Amo! ¡Tein miket moaxka uan tein yoltok noaxka!’ Ijkon motajtolteuiayaj nejin siuamej. ¿Toni kichiuaskia Salomón?
Tajtanik se espada, uan keman kiuikilijkej, kijtoj: ‘Xiktajkotekikan konet tein yoltok, uan tatajko xikinimakakan nejin siuamej’.
Tein yekmelauj temomaj kijtoj chikauak: ‘¡Amo! Amo xikmiktikan konet ika kualtakayot. ¡Xikmakakan nejin siuat!’ Sayoj ika okse siuat kijtoj: ‘Amo akin xikmakakan, ta xiktajkotekikan’.
Ijkuak, Salomón kijtoj: ‘¡Amo xikmiktikan konet! Xikmakakan yekinika siuat. Yejua tein melauj temomaj’. Salomón kimatik nejin, porin tein yekmelauj temomaj kiteltasojtaya ikoneuj uan amo kinekia maj kimiktikan, yejika kikauiliaya okse siuat. Keman israelitas kikakkej keniuj Salomón kimelauak kuejmol, yolpakiaj kipiaskej se tekiuaj tel tamatkej.
Keman Salomón tekiuajtitoya, Dios kintatiochiuij israelitas uan kichiuak maj motelchiuani tatet, kuoujtakilomej uan okseki takual. Israelitas motakentiayaj ika kuali taken uan nemiaj itech kuali kalmej. Nochin kipiayaj tein kuali.