Tanojnots 84
Se ángel kikalpanoj María
NEJIN ichpoch kuakualtsin motokaytia María. Yej se israelita, uan nemi itech altepet Nazaret. Dios kimati ika yej se kuali ichpoch. Yejika kititanik iángel Gabriel maj kinojnotsati. ¿Tikmati toni kiiluijtok María? Tikitatij.
Gabriel kiiluij: ‘Nimitskalpanoko, ichpoch tein tikpia poujkaitalis iixpan Dios. Jiova yetok mouan’. María amo keman kiitstoya nejin takat. Yejika motekipachoj, porin amo kimatia toni kiiluisnekia. Sayoj ika Gabriel niman kiiluij maj amo motekipachouani.
Kiiluij: ‘Amo ximomoujti María. Jiova tiktelyolpaktia. Yejika kichiuati se mouiskatekit motech. Amo uejkaua tikpiati se konet. Uan tiktokaytis Jesús’.
Gabriel kisentokak kiiluij: ‘Nejin konet eski ueyichiujkej, uan motokaytis iKoneuj Dios tein okachi Ueyichiujkej. Jiova kichiuas tekiuaj, kemej katka David. ¡Sayoj ika Jesús eski tekiuaj nochipaya, uan itekiuajyo amo keman tamis!’
María kitajtanij: ‘¿Keniuj uelis mochiuas nejin? Ayamo nimonamiktia uan amo ninemi iuan se takat, ¿keniuj uelis nikpias se konet?’
Gabriel kiiluij: ‘Ichikaujkauelilis Dios ualas motech. Uan konet motokaytis iKoneuj Dios’. Ompa kiiluij: ‘Xikelnamiki mochankauj Elisabet. Taltikpakneminij kijtouayaj ika tel xiuejya katka uan amo ueliskiaok kinpias konemej. Sayoj ika amo uejkaua kipiati se konet. Kemej tikita, amo onkak teisa maj Dios amo ueli kichiua’.
Ompa María kiiluij: ‘¡Nej niitekitikauj Jiova! Maj mochiua notech ijkon kemej tikijtojya’. Satepan ángel yajki.
María niman kikalpanoto Elisabet. Keman Elisabet kitenkakik María, konet tein yetoya iijtik Elisabet moolinij uan yolpakik. Elisabet kiejkok yektikatsin espíritu uan kiiluij María: ‘Okachiok mitstatiochiuij Dios uan amo ijkon okseki siuamej’. María iuan yetoya Elisabet kemej eyi metsti, uan satepan mokepak Nazaret.
Amo uejkaua, María yaya monamiktiti iuan se takat tein motokaytij José. Sayoj ika, keman yej kimatik ika María yaya kipiati se konet, amo kinekia iuan monamiktis. Yejika se iángel Dios kiiluij: ‘Amo ximomoujti tikselis María kemej monamik. Ta Dios kimakak konet tein kipia’. Yejika María uan José monamiktijkej, uan kichixtoyaj maj nemi Jesús.