Tanojnots 97
Jesús ajsik kemej tekiuaj
TEPITSIN satepan keman Jesús kinpajtij ome ixpopoyomej, yajtoya itech se altepekonet tein amo uejka moajsia Jerusalén. Uan kiniluij ome imomachtijkauan: ‘Xiyakan itech altepekonet uan nankiajsiskej se asnojkonet. Xiktomakan uan xinechualkuilikan’.
Keman kiuikilijkej, Jesús ipan motalij uan ika yajki Jerusalén tein amo uejka moajsia. Keman ajsitiayaya itech altepet, tel miakej taltikpakneminij kinamikitoj, uan sekin mokixtilijkej imin taken tein kiuikayaj pani uan kisoujkej ojti. Oksekin kitalijkej kuoujxiujmayit, uan kijtojkej chikauak: ‘¡Maj Dios kitiochiua tekiuaj tein uitse itokaykopa Jiova!’
Ne uejkauj itech Israel, yankuikej tekiuanij mopantaliayaj itech se asno uan kalakiaj Jerusalén, ijkon moteixmatiltiayaj imiuan israelitas. Uan yejua nejon kichiujtok Jesús. Uan nejin taltikpakneminij kinextijtokej ika kinekij maj Jesús mochiua imin tekiuaj. Sayoj ika amo nochin taltikpakneminij kinekiaj. Nejon ueli tikmatij, ika tein mochiuak keman Jesús yajki templo.
Itech templo Jesús kinpajtij tein sepoujtikej uan ixpopoyomej. Keman konemej kiitakej nejon, kiueyichiujkej Jesús. Sayoj ika tiopixkamej kualankej, uan kiiluijkej Jesús: ‘¿Tikaki toni kijtojtokej konemej?’
Jesús kijtoj: ‘Kemaj. ¿Amo keman nankixtajtoltiaj itech Biblia kampa kijtoua: “Dios kichiuas maj konemej taueyichiuakan?”’ Uan konemej kisentokakej kiueyichiujkej tekiuaj tein Dios kixtalij.
Tejuan tiknekij timochiuaskej kemej nejon konemej, ¿melauj? Acha sekin taltikpakneminij kinekiskej maj amo titajtokanok ika itekiuajyo Dios. Sayoj ika tejuan tiksentokaskej tikintapouiskej oksekin kuali tachiualismej tein Jesús kinchiuiliti taltikpakneminij.
Keman Jesús yetoya nikan Taltikpak ayamo ajsia tonal keman peuaskia tekiuajtiskia. ¿Kemanian eskia? Imomachtijkauan kimatisnekiaj. Maj tikixtajtoltikan nejon.