Tanojnots 112
Makiskej Malta
¡XIKITA, barco pankalaktok uan uejueliujtok! ¿Tikinita taltikpakneminij tein moatamotkej? Sekin ajsitokejya atenoj. ¿Ompa yetok Pablo? Maj tikitakan toni kipanotoya.
Xikelnamiki, Pablo kitsaktoyaj Cesarea ome xiuit. Ompa, yejua uan oksekin tein no tsaktoyaj kinkalakijkej itech barco tein yaya Roma. Keman moajsiaj Cretajkopa, se tal tein kiyoualoua ueyiat, peuak tetsaujkaejeka uan at kiniuiuitekia. Takamej amo ueliaj kinejnemiltiayaj barco. Uan amo ueliaj kiitayaj Tonaltsin tonayan niono sitalimej youak. Keman panok miak tonalmej, tein ompa yayaj moluiayaj ika amo makisaskiaj.
Yejika Pablo moajokuik uan kiniluij: ‘Niosemej nanmikiskej, sayoj barco uejueliuis. Porin tayouak se iángel Dios nechmonextilij uan nechiluij: “¡Amo ximomoujti Pablo! Moneki tiajsis iixpan César, tekiuaj romano. Uan Dios kinimakixtis nochin tein youij mouan”’.
¡Keman kiuikatoyaya 14 tonalmej ijkuak peuak tetsaujkaejeka, tajkoyoual kiitakej tein yayaj itech barco ika at amo tel uejkatan katka! Kemej kimouiliayaj maj motelo barco itech tet uan maj uejueliui, kipantamotkej teposmej tein ika kitsakuiliskiaj. Mostika kualkan kiitakej tal uan kinemilijkej kinejnemiltiskej barco ompa atenoj.
Keman motokijtiayajya atenoj, barco motokato itech xal. Kemej tel taejekaya, at kiuiuitekia barco, uan peuak kojkopini. Imin tayekankauj tajpianij, tein kinitaya tein tsaktoyaj, kijtoj: ‘Nochin tein nauelij naajkuij, xiajkuikan atenoj; uan tein amo, ximotamotakan satepan uan xikuikan barco kojkotol uan ika xiajkuikan’. Uan ijkon kichiujkej, 276 taltikpakneminij tein yetoyaj itech barco kuali ajsikej atenoj kemej motenkaujka ángel.
Tal tein kiyoualouaya ueyiat itokay katka Malta. Taltikpakneminij katkaj tel yolkualmej, uan kinpaleuijkej tein yayaj itech barco. Keman ejekat motamatilij, Pablo oksepa kikalakijkej itech okse barco uan kiuikakej Roma.