Tanojnots 114
Itamilis nochi tein amo kuali
¿TONI tikita nikan? Kemaj, tateuianij tein inpan uitsej istak caballos. Sayoj ika xikita kani ualeuaj. ¡Caballos kiskej iluikak, uan mixijtik moualpantalouaj! ¿Nemij caballos iluikak?
Amo, nejin amo melauj caballos. Tikmatij porin caballos amo uelij motalouaj mixijtik, ¿melauj? Sayoj ika Biblia kemaj ika tajtoua caballos ne iluikak. ¿Tikmati keyej?
Porin ne uejkauj kinkuiaj caballos uan ika yayaj moteuitij. Yejika Biblia kijtoua ika tein nemij iluikak pantemouaj ika caballos, uan ijkon kinextia ika Dios kipiati se neteuil imiuan taltikpakneminij. ¿Keniuj motokaytia? Armagedón, uan kiixpolos nochi tein amo kuali nikan Taltikpak.
Jesús yejua Akin kiixyekanas neteuil Armagedón. Xikelnamiki ika Jiova kijitak Jesús maj yejua mochiuani tekiuaj itech Itekiuajyo. Yejika kiuika se corona. Uan espada kinextia ika kinimiktiti nochin tein kiteltauelitaj Dios. ¿Moneki tikmojkaitaskej maj Dios kinixpolo nochin taltikpakneminij tein amo yolkualmej?
Xiktemo Tanojnots 10. ¿Toni tikita? Kemaj, se Tetsaujkakiouit tein kinixpoloj taltikpakneminij tein amo yolkualmej. ¿Akoni tel takiouiltij? Jiova Dios. Axkan xikita Tanojnots 15. ¿Toni mochiujtok ompa? Jiova kinixpoloj ika tit Sodoma uan Gomorra.
Xipano itech Tanojnots 33. Xikita tein kinpanotok caballos uan imin carros egipcios tein ika moteuiayaj. ¿Akoni kichiuak maj atsonpoliuinij? Jiova, uan ijkon kinpaleuij israelitas. Xiktemo Tanojnotsmej 36 uan 76. Ompa tikitas ika kemej israelitas amo katkaj yolkualmej, Jiova no kinkauak maj ixpoliuinij.
Yejika, maj amo tikmojkaitakan ijkuak Jiova kiniualtitanis iluikak tateuianij uan ijkon kitamis nochi tein amo kuali nikan Taltikpak. ¿Toni mochiuas satepan? Xikixkepa amat uan maj tikitakan.