Amokuali ejekamej kichiuaj maj taltikpakneminij no kiixnamikikan Dios
Seki uejkaujtalnamikilismej motaksaltiaj itech takajkayaualis ke mikemej uelij techitaj
Axkan, ¿keyej Satanás uan iamokuali ejekauan kitemouaj keniuj techkajkayauaskej? Porin kinekij maj amo no tiktakamatikan Dios. Kinekij maj tikiniueyichiuakan, maj tikneltokakan imin takajkayaualis uan maj tikchiuakan tein Jiova amo kipaktia. Miak tachiualismej tein kinekij maj tikchiuakan moteluika iuan uejkaujtalnamikilis ika mikemej.
Keman momikilia aksa akin tikteltasojtaj tinochin titeltayokoyaj, uan amo tepinaujtij maj tiknextikan. Jesús ‘peuak mochoktia’ satepan keman momikilij itasojikniuj Lázaro (Juan 11:35).
Moajsi tel miak taman uejkaujtalnamikilismej tein mouika iuan mikemej, uan itech nochi taltikpak mopata. Amo nochi nejin tachiualismej kitapanauilia tein kijtoua Biblia. Sayoj ke seki tachiualismej motaksaltia itech tanemilil ke mikemej yoltokej uan uelij kinitaj tein yoltokej. Kemej ijkuak moyoualkauaj (velorio), keman tel panouaya tsajtsij, uan keman kichiuaj miak taman tein moneki miak tomin, nochi kichiuaj porin kimouiliaj kiniyolkokoskej imin espíritus mikemej. Sayoj ke, kemej tikitakej, mikemej “amo kimatijok nionteyi”, yejika akin kichiuaj nejin kichiuaj maj momoyaua itakajkayaualis Satanás (Eclesiastés 9:5).
Okseki uejkaujtalnamikilismej motaksaltiaj itech takajkayaualis ke mikemej moneki se kinpaleuis
Okseki uejkaujtalnamikilismej uan tachiualismej, kichiuaj porin kineltokaj ke mikemej kinekij maj se kinpaleui uan uelis teijtakoskej komo amo se kiniyolseuia. Se tachiualis tein motelixmati, yejua keman tel miakej mosentiliaj keman panoua chiknaui tonal, se metstika, eyi metstika uan se xiujtika satepan ke aksa momikilia, uan ijkuak, takuaj uan kitatataujtiliaj maj kuali ‘ajsi’ kampa kijtouaj youi. Oksekin kinimakaj mikemej takual uan tayil, nejin okse taman tachiualis tein motelixmati.
Nejin tachiualismej tel amo kuali porin kichiuaj maj momoyaua itakajkayaualis Satanás tein mouika iuan mikemej. ¿Kiyolpaktiskia Jiova maj no tepitsin titeuantikan itech uejkaujtalnamikilismej, tein motaksaltiaj itech imin tamachtilis amokuali ejekamej? ¿Melauj ke amo? (2 Corintios 6:14-18.)
Itekitikauan Dios tein melauak amo teuantij nion tepitsin itech tachiualismej tein kipaleuiaj itakajkayaualis Satanás. Ta tein okachi kuali, ika netasojtalis mochikauaj kinpaleuiskej uan kiniyolchikauaskej akin yoltokej. Kimatij ke ijkuak aksa momikilia, sayoj Jiova ueli kipaleuia (Job 14:14, 15).
Dios amo nenken kiitalani naualot
Naualot iuantia nochi taman tachiualismej tein ika uelij tajtouaj imiuan amokuali ejekamej, eski imin selti oso ika inepaleuil se naual. Tetajtouilis, naualot, akin tapajtia ika naualot, akin kijtoua toni kipanos satepan se taltikpaknenkej, uan keman kintatajtaniaj mikemej, nochi nejin mochiua ika naualot.
Dios kitauelita nejon tachiualismej. Kineki maj sayoj yejua tikueyichiuakan (Éxodo 20:5)
Biblia kijtoua ke nejin tachiualismej amo kuali keman kijtoua: “Maj amo akin momachti kixejekos toni mochiuas satepan, niono maj ika naualot kijto maj mochiua teisa, niono maj momachti kitemos teisa tein kinextis tein mochiuas satepan, niono maj aksa mochiua tenaualuijkej, niono maj techiualti ika naualot tein kinekis, niono maj kiitati aksa akin tajtoua imiuan espíritus oso akin ueli kijtoua tein amo akin kimati, niono aksa maj kintatajtani mikemej. Porin Jiova amo kinitalani akin kichiuaj nochi nejin” (Deuteronomio 18:10-12).
¿Keyej techtelnejmachtia Jiova maj amo tikchiuakan nejin taman tachiualismej?
Jiova kineki maj kuali techyoui, yejika technejmachtia maj amo tikchiuakan nochi taman naualot. Yejuatsin tetasojtakej uan iminka motekipachoua taltikpakneminij, uan kimattok ke akin mokalakia imiuan amokuali ejekamej amo kuali kiyoui.
Nilda akin katka naual Brasil, yejua semej akin kipanok nejin porin tajtouaya imiuan espíritus. Amokuali ejekamej kitelmojmoujtiayaj uan kitajyouiltiayaj. Nilda kijtoj: “Amokuali ejekamej [...] notech kalakiaj uan nechchiualtiayaj tein yejuan kinekiaj. Iksa nikuatapolouaya uan iksa nitalnamikia, uan kemej ijkon nimoajsia, nechkauatoj kampa kinpajtiaj tein kuatapolojtokej. Kemej amokuali ejekamej amo nechkauayaj, nechmoujkakalakijkej. Nitayik pajti tein nechpaleuiskia, uan peuak niteltauana uan niteltachichina. Uan ijkon nikchiuak miak xiujmej”.
Akin kitekitiltiaj naualot nochipa amo kuali kiniyoui. Uelis moajsiskej temako, kipoloskej imin chankauan oso imin nemilis
Satepan, ika inepaleuil Jiova uan itekitikauan, Nilda mointapetskoltilij amokuali ejekamej uan axkan kipia se nemilis tel kualtsin uan paktok. Yejua kijtoua: “Nochin nikiniluia maj amo keman mokalakikan nion tepitsin imiuan espíritus [tein amo yolkualmej]”.