¿Ueli se kimati keniuj yolpakiskej kalyetouanij?

1. ¿Keyej motelneki maj kuali moajsikan kalyetouanij?

NEMILIS kemej kalyetouanij yejua tein okachi uejkaujya moajsi nikan taltikpak. Nochipa moitani ke ijkuak kuali moajsij kalyetouanij no kuali moajsij taltikpakneminij. Uan no nemilis kemej kalyetouanij yejua kampa okachi tapaleuia maj konemej kuali moskaltikan.

2-5. 1) Xikonmelaua keniuj momachilia konetsin keman kalyetouanij yolpakij. 2) ¿Toni kuejmolmej kipanouaj seki kalyetouanij?

² Keman kalyetouanij yolpakij nochin tel kuali momachiliaj uan yolseuij. Tepitsin xiontanemili itech kalyetouanij tein nochin kiuelitaskiaj kipiaskej. Keman takuaj youak, tetatmej tetasojtanij motaliaj iniuan ininkoneuan uan ika tajtouaj tein kipanokej nejon tonal. Konemej kijtouaj ika yolpakilis tein kipanokej kaltamachtiloyan. Nejon tein kisenchiuaj semi kinpaleuia nochin maj ueli kixikokan tein mostika kipanoskej kampa yetoskej.

³ Kampa kalyetouanij yolpakij, konetsin kimati ke itatuan kiyekpiaskej keman kokolispeuas, xa moixpapatatiyaskej youak, uan ijkon amo kikauaskej iselti. Kimati ke uelis kitajtanis imomaj oso ipopaj maj kiyolmajxiti uan maj kipaleui keman kipias se kuejmoltsin. Konetsin amo motekipachoua kalijtik, maski kalampa onkak miak tataman kuejmolmej.

⁴ Keman konemej uejueyiaj, monamiktiaj uan no kinpiaj konemej. Ompa Japón moijtoua ke aksa kiajsikamati nochi tein itatuan monekik kichiuaskej keman yejua no kipia se ikonetsin. Keman panoua nejon, konemej akin uejueykej kitemouaj kichiuaskej tein kinpaleuis maj yolpakikan kemej kalyetouanij porin motasojkamatij uan tetasojtaj, uan no kinyekpiaj inintatuan akin xiuejkejya, akin yolpakij iniuan yetoskej ininixuiuan.

⁵ Sayoj ke xa tikonnemilijtok: “Kemaj, nejua nikintasojta nochankauan, sayoj ke amo nikpanotok tein nikan moijtoua. Nonamik uan nejua tataman hora titekitij uan amo semi tisenyetokej. Keman timonojnotsaj, miakpa ika titajtouaj ke amo techajsi tomin”. Oso xa tikijtouaj: “Nokoneuan uan noixuiuan nemij itech okse altepet, uan amo keman nikinita”. Melauak ke miakpa panoua seki taman tein amo ueli tikpataj uan tonemilis kemej kalyetouanij amo ijkon kemej nochin kiuelitaskiaj kipiaskej. Maski ijkon, sekin yolpakij iniuan ininchankauan. ¿Keniuj kichiuaj? ¿Ueli se kimati toni kinpaleuia kalyetouanij maj yolpakikan? Kemaj. Sayoj ke achto ke tikitaskej, moneki tiknankiliskej okse netajtanil tein motelneki.

¿AKONIMEJ KALYETOUANIJ?

6. ¿Katiyejua kalyetouanij ininka titajtotij itech nejin amatajkuilol?

⁶ Itech miakej kalyetouanij pouij tepopaj, temomaj uan konemej. Teueyitatmej nemij ininchan komo uelijok moitaj ininselti. Maski kipiaj okseki ininchankauan, amo semi moneki ininka moteltekipachoskej. Itech nejin amatajkuilol ininka titajtotij kalyetouanij kampa pouij tetatmej uan konemej. Sayoj ke itech nejin xiujmej, no moajsij kalyetouanij kampa sayoj semej tetatmej moajsi, kampa kipiaj takpakonemej uan kampa tetatmej amo sennemij porin xa semej uejka tekiti.

7. ¿Keniuj nemij seki kalyetouanij?

⁷ Miakkan, miakej kalyetouanij nemij iniuan ininchankauan akin no kinpiaj ininchankauan. Konemej kisentokaj kintekipanouaj inintatuan akin xiuejkejya, uan ijkon kemej okachi miakiaj no moneki kinpaleuiskej ika tomin uan moneki kichiuaskej okachi tekit. Kemej neskayot, kalyetouanij tapaleuiaj keman kinixpanoltiaj ininsobrinos uan oksekin ininchankauan, kiniskaltiaj uan hasta kintaxtauiliaj kampa momachtiaj. Tein motayolmajxitia itech nejin amatajkuilol no kinpaleuia kalyetouanij akin ijkon nemij.

KALYETOUANIJ KIPANOUAJ OUIJKAYOMEJ

8, 9. ¿Toni kuejmolmej tein moita itech seki altepemej kinextia ke mopatatok kemej nemij kalyetouanij?

⁸ Axkan motelpatatok kemej nemij kalyetouanij, uan tetayokoltij tikijtoskej ke amo kinpaleuia, ta okachi kinijtakoua. Kemej neskayot, miakej siuamej nemij iniuan ichankauan inintakauj uan kalijtik kichiuaj tekit tein ompa kiniluiaj. Sayoj ke axkan se kinita ke miakej siuamej tetekitiliaj, maski mosentoka mochia maj no kichiuakan tekit tein ipa kichiuaj kalijtik. Itech miak altepemej motajtaniaj: ¿Moneki siuat akin tetekitilia okachi kichiuas tekit kalijtik ke okseki ichankauan?

⁹ Itech seki altepemej, kalyetouanij momattokej nemiskej iniuan ininchankauan akin no kinpiaj ininchankauan uan nochipa mosenpaleuiaj. Sayoj ke kemej kiitaj ke itech okseki altepemej amo ijkon kichiuaj uan kemej amo kinajsi tomin, mopatatok inintanemilil. Yejua ika miakej, ijkuak moneki kinyekpiaskej ininchankauan akin xiuejkejya kiitaj okachi kemej se tamamal uan amo kemej se taman tein moneki kichiuaskej oso tein ika kinextiskej ke motasojkamatij. Seki tetatmej akin xiuejkejya amo kintakachiuaj, uan itech miak altepemej kinchiuiliaj tein amo kuali oso kinsenkauaj.

10, 11. ¿Toni tein mochiujtok kinextia ke nemilis kemej kalyetouanij mopatatok miakkan?

¹⁰ Axkan okachi miakej namikuanij kitsayanaj amat ininixpan tekiuanij. Seki xiujmej achto, monamiktiayaj uan senyetoyaj hasta keman momikiliayaj. Sayoj ke axkan, miakej monamiktiaj uan sennemij sayoj seki xiujmej uan satepan kitsayanaj amat ininixpan tekiuanij uan kitemouaj okse akin iuan monamiktiskej. Sekin miakpa kichiuaj nejon. Uan no okachi se kinita kalyetouanij kampa sayoj semej tetatmej moajsi.

¹¹ Moitani ke miakej kalyetouanij amo nemijok kemej achto nemiaj. Sekin amo monamiktiaj, sayoj ke kinpiaj miakej konemej. Miakej amo kinekij monamiktiskej, ta sayoj sennemiskej. Nejin moita noyampa taltikpak.

12. ¿Keniuj kinijtakoua konemej kemej axkan nemij kalyetouanij?

¹² ¿Uan toni panoua iniuan konemej? Itech miak altepemej, miakiaj akin kinpiaj konemej maski amo kipiaj ininnamik, uan kemansa seki temomauan siuapipilok. Miakej ichpochmej kinpiaj konemej akin tataman ininpopaj. Noyampa taltikpak motematiltia ke tel miakej konemej amo kipiaj ininchan uan nentinemij kampa yeski; miakej kisaj porin kintelteuiayaj kalijtik, uan oksekin inintatuan kinkixtiaj porin amo uelijok kintekipanouaj.

13. ¿Toni kuejmolmej tein moita noyampa kichiua maj amo yolpakikan kalyetouanij?

¹³ Moyekita ke kalyetouanij semi amo kuali tein kinpanoua. Uan no panoua okseki taman tein kichiua maj amo yolpakikan: kemej ijkuak telpochmej uan ichpochmej taixnamikij, keman ininka mauiltiaj konemej, kiteuiaj ininnamik, tauanaj uan mochiua okseki uejueyi kuejmolmej. Yejua ika miakej telpochmej uan ichpochmej uan akin uejueykej amo kipiaj yolseuilis kemej kalyetouanij.

14. 1) ¿Toni miakej kijtouanij ke kichiua maj kalyetouanij amo kuali moajsikan? 2) ¿Keniuj Pablo kimelauak kemej tinemiskiaj axkan, uan keniuj nejon tein mochiujtok kinijtakouani kalyetouanij?

¹⁴ ¿Keyej axkan semi amo kuali tein kipanouaj kalyetouanij? Sekin kijtouaj ke porin siuat peuak tetekitilia; oksekin kijtouaj ke porin axkan amo monejnemiltiajok kemej achto, uan no porin mochiua okseki tamanok. Kemej ome mil xiuit achto, Pablo, se itatojtokakauj Cristo, kijtoj ke kalyetouanij kipiaskiaj miak kuejmolmej keman kijkuiloj ke itech itamian tonalmej semi ouij tinemiskiaj porin taltikpakneminij amo tetasojtaskiaj, sayoj kitelnejnekiskiaj tomin, moueyinekiskiaj, teuijuikaltiskiaj, amo kintakamatiskiaj inintatuan, amo motasojkamatiskiaj, tesenkauaskiaj, amo teikneliskiaj, tetakajkayauiliskiaj, tel amo yolkualmej yeskiaj. Uan no kijtoj: “Kitauelitstinemij nochi ten kuali. Uan yejuan nojonkes amo uelis se takuautamatis inuan porin sayo takajkayauaj. [...] Eliuistijtinemij san; uan mopoutinemij ke semi ueyi chiuanime. Uan yejuan sayo kitemojtinemij kenin moyolpaktijtinemiske pero amo kitemojtinemij kenin para kiyolpaktijtinemiske Dios” (2 Timoteo 3:1-4). ¿Melauj ke axkan mochiujtok nochi nejin? Ika nochi tein tikitaj ke mochiua, amo ouij tikmatij keyej kalyetouanij semi amo kuali tein kipanouaj.

KENIUJ UELIS YOLPAKISKEJ KALYETOUANIJ

15-17. ¿Toni amatajkuilol tapaleuia maj tikmatikan keniuj yolpakiskej kalyetouanij?

¹⁵ Miakej tayolmajxitiaj keniuj uelis se yolpakis kemej kalyetouanij. Itech seki altepemej, moajsij miak amaixmej tein ika tajtouaj nejon. Sayoj ke tein tayolmajxitiaj taltikpakneminij moixnamikij inintanemililuan, uan tein axkan motayolmajxitia satepan uelis kiitaskej ke amo tapaleuiaok.

¹⁶ Komo ijkon, ¿kani uelis tikajsiskej tayolmajxitilis tein yekmelauj techpaleuis? ¿Tikontemoskia itech se amatajkuilol tein motamiijkuiloj kemej ome mil xiuit achto? ¿Oso tikonnemiliskia ke se amatajkuilol kemej nejon senkis amo tapaleuiaok? Tein melauj, itech se amatajkuilol kemej nejon tikajsij keniuj uelis yekmelauj tiyolpakiskej kemej kalyetouanij.

¹⁷ Nejon amatajkuilol yejua Biblia. Nochi kinextia ke Dios kichiuak maj moijkuilo. Itech Biblia tikajsij nejin tajtolmej: “Nochi in Tajkuilolamatsitsin nochi yejuan Dios kichiuak ika ichikaualisuan. Ika ya nojon in Tajtoltsin de Dios uelis se kuitinemis para ika se tamachtijtinemis uan no para ika se kintaneltoktijtinemis in tagayot ma kikautiyakan nintajtakoluan [...,] para ika kinyolmelautiyas uan para ika se kinmachtijtiyas in taneltokani de keniu chipaukanemiske” (2 Timoteo 3:16). Itech nejin amatajkuilol timitsonyoleuaskej xikonita keniuj Biblia uelis ‘mitsonyolmelaujtiyas’ keman tikonpias ouijkayomej uan kuejmolmej tein axkan kintajyouiltia kalyetouanij.

18. ¿Keyej taixejekol maj itech Biblia moajsi tayolmajxitilis tein okachi kinpaleuia kalyetouanij?

¹⁸ Komo tikonnemilia ke Biblia xa amo melauj kinpaleuia kalyetouanij maj yolpakikan, xikonnemili nejin: akin kichiuak maj moijkuilo Biblia no kichiuak maj moajsikan kalyetouanij (Génesis 2:18-25). Biblia kijtoua ke motokaytia Jiova (Salmo 83:18). Yejuatsin akin kichijchiuak nochi tein tikitaj uan “toTajtsin, akin itech ualeua inintokay nochi kalyetouanij” (Efesios 3:14, 15, TNM). Ijkuak peuak nemij yekinika takat uan yekinika siuat uan hasta axkan, Jiova kiitani keniuj nemij kalyetouanij. Kimati toni kuejmolmej uelis kipiaskej uan kinyolmajxitia keniuj kiyektaliskej. Itech nochi xiujmej, akin ika nochi ininyolo kichiuanij tein Biblia kinyolmajxitia kalyetouanij, okachi yolpakij.

19-21. ¿Toni tein kinpanouani seki namikuanij kinextia ke Biblia ueli kinpaleuia maj kiyektalikan kuejmolmej tein kipiaj?

¹⁹ Kemej neskayot, se siuat akin kayot Indonesia semi mauiltiaya itech se taman neauiltilis ika tomin. Miak xiujmej kinsenkaujka eyi ikoneuan, uan semi motajtolteuiaya iuan itakauj. Se tonal peuak momachtia Biblia. Ijkon kemej panokej tonalmej, peuak kiajsikamati ke nochi tein Biblia tamachtia melauak. Kichiuak tein ompa tayolmajxitia uan okachi kuali mouikayaya iuan itakauj uan no kinyekpiaya ichankauan. Kemej mopatak, nochin kalyetouanij yolpakiajya.

²⁰ Se siuat kayot España kijtoua: “Sayoj se xiuit satepan ke timonamiktijkej peuak tikpiaj uejueyi kuejmolmej”. Nejin namikuanij semi tataman tanemiliayaj, uan amo semi monojnotsayaj, ta sayoj keman motajtolteuiayaj. Maski kipiayaj se siuapiltsin, kiixtalijkej mokauaskej uan kinixpantiliskej tekiuanij. Sayoj ke achto kinyolmajxitijkej maj kitemouanij nepaleuil itech Biblia. Momachtijkej tein Biblia kinyolmajxitia namikuanij uan peujkej kichiuaj tein momachtiayaj. Niman uelik peujkej kuali monojnotsaj uan nochin eyin yolpakiaj uan kuali mouikayaj.

²¹ Biblia no kinpaleuia akin xiuejkejya. Kemej neskayot, maj tikitakan tein kinpanok se takat uan se siuat namikuanij kayomej Japón. Takat semi tauel katka uan kemansa tateuiaya. Ininichpochuan peuak momachtiaj Biblia maski yejuan amo kinkauayaj. Satepan, tepopaj no peuak momachtia, sayoj ke temomaj kisentokaya amo kinekia. Sayoj ke ijkon kemej panokej xiujmej, temomaj kiitak keniuj kinpaleuiaya ichankauan tein Biblia tayolmajxitia. Iichpochuan kiyekpiayaj kemej monekia uan itakauj amo semi tauelok katka. Keman kiitak ke mopatakej, no kinekik momachtis Biblia, uan no semi kipaleuij. Nejin siuat akin xiuejya miakpa kijtoj: “Peuak yekmelauj kuali timouikaj kemej namikuanij”.

22, 23. ¿Keniuj Biblia kinpaleuia nochi tataman taltikpakneminij maj yolpakikan kemej kalyetouanij?

²² Moajsij tel miakejok akin kimatinij keniuj yolpakiskej kemej kalyetouanij. Kiselianij tein Biblia tayolmajxitia uan kitakamatinij. Semi melauak ke kisentokaj nemij nikan taltikpak kampa miakej semi tateuiaj, auilnemij uan no amo kinajsi tomin. Uan no tajtakolejkej; sayoj ke kipiaj yolpakilis porin kitemouaj kichiuaskej itanejnekilis akin kichiuak maj moajsikan kalyetouanij. Kemej kijtoua Biblia, Jiova Dios, yejuatsin “Akin mitsmachtia tein tejua mitspaleuis, Akin mitsixyekana itech ojti kampa moneki tinejnemis” (Isaías 48:17).

²³ Maski Biblia motamiijkuiloj kemej ome mil xiuit achtoya, tein tayolmajxitia semi tapaleuia axkan. Uan no, moijkuiloj kemej kinpaleuis nochin taltikpakneminij. Biblia amo kipia inintanemilil takamej. Jiova “kichijchiuak sanse tagat san uan [...] nochi tejuan timochiuakoj tiixuiuan”, uan no kiixmati keniuj tanemiliaj nochin taltikpakneminij maski seseko kayomej (Hechos 17:26). Tein tayolmajxitia Biblia techpaleuia tinochin. Komo tejuatsin tikontakamati, no tikonmatis keniuj tionyolpakis iniuan mochankauan.