Tamachtilis 5
¿Toni itanejnekilis Dios maj mochiua nikan Taltikpak?
¿Keyej kichijchiuj Jiova Taltikpak? (1, 2)
¿Keyej yekintsin Taltikpak amo se xochital? (3)
¿Toni kinpanos taltikpakneminij tein amo yolkualmej? (4)
Amo uejkaua, ¿toni kinchiuiliti Jesús kokoyanij?, ¿tein xiuejkejya?, ¿mikemej? (5, 6)
¿Toni moneki tikchiuas uan ijkon tikselis tatiochiualismej amo uejkaua? (7)
1. Jiova kichijchiuj nejin Taltikpak maj ompa nemiskiaj taltikpakneminij ika yolpakilis nochipaya. Yej kinekia maj pexontoni Taltikpak ika taltikpakneminij yolmelaujkej (Salmo 115:16; Isaías 45:18, NM). Taltikpak nochipa yetos; amo keman poliuis (Salmo 104:5; Eclesiastés 1:4).
2. Keman Dios ayamo kichijchiuaya takat, kijitak sentayoual tal, uan kichijchiuj se xochital kampa takualtsinkan uan kitokaytij xochital itech Edén. Kinkauj maj ompa nemikan yekinika takat Adán uan yekinika siuat Eva. Dios kinekia maj kinpianij konemej uan maj kipexontianij Taltikpak. Ajachichi kichiujtiaskiaj semanauak Taltikpak se xochital (Génesis 1:28; 2:8, 15).
3. Adán uan Eva motajtakolmakakej keman amo kitakamatkej itanauatiluan Dios maski kimattoyajya toni kinpanos. Yejika, Jiova kinkixtij itech xochital tein moajsia Edén uan ijkon poliuj xochital (Génesis 3:1-6, 23). Sayoj ika Jiova amo kielkaua itanejnekilis tein kichiuasneki nikan Taltikpak. Yej motenkaua ika kichiuas se xochital uan maj ompa nemikan taltikpakneminij nochipaya. ¿Keniuj kichiuas? (Salmo 37:29.)
4. Achtopa moneki maj ixpoliuikan taltikpakneminij tein tel amo yolkualmej uan ijkon Taltikpak uelis mochiuas se xochital (Colosenses 3:6). Nejin chiuis itech Armagedón, kijtosneki ineteuilis Dios kampa kitamis nochin tachiualismej tein tel amo kuali. Satepan, Satanás kitsakuaskej se mil xiujtika, tein kijtosneki ika amo akinok mokauas tein tel amo yolkuali maj kiijtakojto Taltikpak. Sayoj makisaskej itekitikauan Dios (Apocalipsis 16:14, 16; 20:1-3).
5. Ijkuakkopa Jesucristo peuas tekiuajtis se mil xiujtika ipan Taltikpak (Apocalipsis 20:6) uan ajachichi techijkuanilijtias tajtakol itech totanemililis uan itech tonakayo. Timochiuaskej tichipaujkej ijkon kemej katkaj Adán uan Eva keman ayamo tajtakouayaj. Itech nejon tonalmej amo onkasok kokolis, ueuentsiyot niono mikilis. Kokoyanij pajtiskej uan tein xiuejkejya oksepa mochiuaskej telpochmej uan ichpochmej (Job 33:25; Isaías 33:24; Apocalipsis 21:4).
6. Keman Jesús Tekiuajtitos se Mil Xiujtika, taltikpakneminij tein amo kikauaj Dios tekitiskej uan kichiuaskej semanauak Taltikpak se xochital (Lucas 23:43). No tel miakej mikemej moajokuiskej uan oksepa nemiskej nikan Taltikpak (Hechos 24:15). Komo kichiuaj tein Dios kichia maj kichiuakan, kisentokaskej nemiskej nochipaya nikan Taltikpak. Uan komo amo, senkis kinixpolos (Juan 5:28, 29; Apocalipsis 20:11-15).
7. Ijkon oksepa mochiuas itanejnekilis Dios nikan Taltikpak. ¿Tikuelitaskia tikselis tatiochiualismej tein mochiuati amo uejkaua? Komo ijkon, moneki tiksentokas timomachtijtos tein Jiova tamachtia uan tiksentokas tiktakamattos tein tajtani. Uelis mitspaleuis tikchiuas nejin komo tiouj nechikolmej tein mochiuaj itech Kali kampa monechikouaj iTaixpantijkauan Jiova kampa okachi achkatsin (Isaías 11:9; Hebreos 10:24, 25).
[Tajtolmej itech página 10]
Xochital tein poliuj
[Tajtolmej itech página 11]
Keman panosa Armagedón, Taltikpak mochiuas se xochital