Tamachtilis 9
Tein kitekitiliaj Dios moneki maj chipaujkej
¿Keyej moneki maj tichipaujkej itech nochi totachiualis? (1)
¿Toni kijtosneki maj tichipaujkej itech totaneltokalis? (2)
¿Uan maj tichipaujkej itech tonemilis? (3) ¿Uan maj tichipaujkej itech totanemililis? (4) ¿Uan maj tichipaujkej itech tonakayo uan kampa tinemij? (5)
¿Toni tataman tajtolmej tein pitsotikej uan texokoliaj maj amo tikijtokan? (6)
1. Jiova Dios yolchipauak uan yektik. Yej kichia ika tein tikueyichiuaj maj tichipaujkej itech totaneltokalis, tonemilis, totanemililis, itech tonakayo uan kampa tinemij (1 Pedro 1:16). Moneki tikchiuaskej se ueyi chikaujkayot uan ijkon uelis tiksentokaskej tichipaujkej iixpan Dios. Tinemij kampa pexontok tachiualismej tein pitsotikej. Uan no, kemej titajtakouanij nochipa tikchiuasnekij tein amo kuali. Sayoj, maj amo timotsinkixtikan.
2. Maj tichipaujkej itech totaneltokalis: Komo tiknekij tiktekitiliskej Jiova, amo uelis tiksentokaskej tikpixtoskej niose tamachtilis oso uejkaujtalnamikilis tein uitse itech taneltokalis tein amo melauak. Moneki tikisaskej itech taneltokalis tein amo melauak uan amo tikpaleuiskej nion tepitsin (2 Corintios 6:14-18; Apocalipsis 18:4). Keman timomachtiskejya tein melauak kijtoua Dios, moneki timopiaskej maj amo techkajkayauakan tein tamachtiaj ika tein amo melauak (2 Juan 10, 11).
3. Maj tichipaujkej itech tonemilis: Jiova kineki ika tein kiueyichiuaj maj nochipa chipaujkanemikan kemej tein yekmelauj kichiuaj kemej Cristo (1 Pedro 2:12). Yej kiita nochi tein tikchiuaj, uan no tein tikichtakachiuaj (Hebreos 4:13). Moneki tikixtopeuaskej auilnemilis uan okseki pitsotik tachiualismej tein mochiua nikan taltikpak (1 Corintios 6:9-11, NM).
4. Maj tichipaujkej itech totanemililis: Komo tikpexontiaj totsontekoj ika tanemililis tein chipauak uan yektik, totachiualis no eski chipauak (Filipenses 4:8). Sayoj komo achka titanemiliaj itech tachiualis tein pitsotik, ika tamis tikchiuaskej tein amo kuali (Mateo 15:18-20). Moneki tikixtopeuaskej tataman neixpetanilis tein uelis kipitsochiuas totanemililis. Komo timomachtiaj iTajtol Dios, tikpexontiskej itech totsontekoj tanemililis tein chipauak.
5. Maj timochipauakan itech tonakayo uan kampa tinemij: Semi motelneki tein titajtouaj itenkopa Dios maj timochipauakan itech tonakayo uan totaken. Keman tiyaskej nekalauiloyan satepan moneki maj timomajtekikan. Keman titakuaskej oso tikchiuaskej takual moneki maj achto timomajtekikan. Komo kampa tinemij amo tikpiaj nekalauiloyan moneki maj tikchijchiuakan (Deuteronomio 23:12, 13). Komo tichipaujkej techpaleuia maj amo tikokolispeuakan. Kampa tinemij moneki maj tachipaujkan, maj tayekyeto kalijtik uan kalampa. Moneki maj techitakan itech toaltepeuj ika titamamej, uan ijkon tikauaskej se kuali neskayot.
6. Chipauak tajtol: Tein kitekitiliaj Dios nochipa moneki kijtoskej tein melauak. Xolopijmej amo yetoskej itech iTekiuajyo Dios (Efesios 4:25; Apocalipsis 21:8). Tein kichiuaj kemej Cristo amo eliuistajtouaj. Amo kikakij niono monojnotsaj ika auilnemilis. Ika imin chipauak tajtol moixmatij ika tamamej itech tekit, itech kalnemachtiloyan uan kampa achka nemij (Efesios 4:29, 31; 5:3).
[Tajtolmej itech página 19]
Itekitikauan Dios moneki maj chipaujkej itech nochi imin tachiualis