Tamachtilis 10
Tachiualismej tein Dios kitauelita
¿Keniuj moneki tikitas tachiualismej tein Dios kijtoua ika amo kuali? (1)
¿Kemej toni tataman auilnemilis amo kuali? (2)
Tein kichiuaj kemej Cristo, ¿keniuj moneki kitaskej xolopijyot? (3) ¿Uan neauiltilis ika tomin? (3) ¿Uan tachtekilis? (3) ¿Uan tateuilis? (4) ¿Uan naualot? (5) ¿Uan tauanalis? (6)
¿Keniuj uelis se moajchiuilis tachiualismej tein amo kuali? (7)
1. Itekitikauan Dios kitasojtaj tein kuali, sayoj ika no moneki maj momachtikan kitauelitaskej tein amo kuali (Salmo 97:10, 1 Pedro 3:11). Nejin kijtosneki maj se kitauelita tachiualismej tein Dios kitauelita. ¿Kemej katiyejuan?
2. Auilnemilis: Keman se takat uan se siuat mosentekaj uan ayamo namikuanij, namikuanij tein auilnemij, tein auilnemi iuan se tapial, tein auilnemi iuan se ichankauj oso ika mauiltia se ichankauj tein konetok, uan tein auilnemi iuan se itakaikniuj, nochi nejin se ueyi tajtakol iixpan Dios (Levítico 18:6; Romanos 1:26, 27; 1 Corintios 6:9, 10). Komo se takat uan se siuat senemij uan ayamo namikuanij moneki maj mokauakan, uan komo amo, maj moijkuilokan iminixpan tekiuanij (Hebreos 13:4).
3. Xolopijyot, neauiltilis ika tomin uan tachtekilis: Jiova Dios amo ueli takajkayaua (Tito 1:2). Yejika taltikpakneminij tein kinekij kiyolpaktiskej maj amo xolopijtikan (Proverbios 6:16-19; Colosenses 3:9, 10). Nochi neauiltilis ika tomin uelis kichiuas maj tixijxikuimej. Yejika, tein kichiuaj kemej Cristo amo teuantij itech niose taman neauiltilis ika tomin, kemej kuakuejauiltilis, barajas oso okse neauiltilis kampa uelis kitaniskej oso kipoloskej tomin (Efesios 5:3-5). Niono tachtekij oso kikouaj teisa tein kimattokej tachtekil uan niono mokuiliajsaj teisa tein amo iminaxka (Éxodo 20:15; Efesios 4:28).
4. Eliuis kualanyot uan tateuilis: Eliuis kualanyot uelis techuikas itech tateuilis (Génesis 4:5-8; Santiago 1:19, 20). Tein motelkualantiaj uan tateuiaj amo uelis mochiuaskej itasojikniuan Dios (Salmo 11:5; Proverbios 22:24, 25). Amo kuali maj timomakepakan keman aksa techchiuilia teisa tein amo kuali (Proverbios 24:29; Romanos 12:17-21).
5. Naualot: Sekin taltikpakneminij kiitatij naual maj kinpaleui maj pajtikan. Oksekin kininaualuiaj tein kintauelitaj maj kokolispeuakan oso maj mikikan. Satanás kiolinijtok nochi nejin tachiualismej, yejika tein kichiuaj kemej Cristo maj amo kitekitiltikan naualot (Deuteronomio 18:9-13). Komo okachi timotokiaj iuan Jiova okachi uelis techpaleuis maj amo technaualuikan (Proverbios 18:10).
6. Tauanalis: Uelis se tayis tepitsin cervesa oso okse taman tayil (Salmo 104:15; 1 Timoteo 5:23). Sayoj ika Dios amo kiuelita maj se tel tayi niono maj se iuinti (1 Corintios 5:11-13; 1 Timoteo 3:8). Maj se tauana uelis techkokolispeualtis uan uelis techtakuejmoltalilis tokalijtik. No uelis ijsiujka tiuetsiskej itech tanejnekilismej tein amo kuali (Proverbios 23:20, 21, 29-35; Efesios 5:18).
7. Taltikpakneminij tein kichiuaj tachiualismej tein Dios kijtoua ika amo kuali amo yetoskej itech iTekiuajyo Dios (Gálatas 5:19-21). Komo yekmelauj tiktasojta Dios uan tikneki tikyolpaktis, uelis timoajchiuilis nejin tachiualismej (1 Juan 5:3). Ximomachti xiktauelita tein Dios kijtoua ika amo kuali (Romanos 12:9). Ximokui imiuan taltikpakneminij tein kichiuaj tein Dios kiuelita (Proverbios 13:20; Hebreos 6:12). Tokniuan tein chikaujkej ika nemachtil uelis techpaleuiskej (Santiago 5:14). Uan okachiok komo titakuaujtamati itech nepaleuil tein Dios mitsmaka ika netataujtilis (Filipenses 4:6, 7, 13).
[Tajtolmej itech página 20]
Dios kitauelita tauanalis, tachtekilis, neauiltilis ika tomin uan tateuilis