Keniuj tikajsiskej taneltokalis tein melauak

Komo tiknejneki timochiuas tiitasojikniuj Dios, moneki tikchiuas tachiualismej den taneltokalis tein Dios kiyolpaktia. Jesús kijtoj, nochin tein kinekij kiueyichiuaskej Dios, moneki kichiuaskej ika nochi imin yolo uan ika nochi imin tanemililis tein yekmelauak (Juan 4:23, 24). Sayoj se taman yetok tein kuali keniuj moneki se kiueyichiuas Dios (Efesios 4:4-6). Taneltokalis tein melauak teuika itech se nemilis nochipaya, uan taneltokalis tein amo melauak teuika itech poliuilis (Mateo 7:13, 14).

Uelis tikmatis katiyejua taneltokalis tein melauak, komo tikita imin tachiualisuan taltikpakneminij tein yetokej itech taneltokalis tein melauak. Kemej Jiova tel yolkuali, tein yekneli taueyichiuanij moneki maj mochiuakan taltikpakneminij yolkualmej. Ijkon kemej se xokokuouit kitemaka kuajkuali xokot, taneltokalis tein melauak kinchiua taltikpakneminij yolkualmej (Mateo 7:15-20).

Itasojikniuan Jiova kitelpoujkaitaj Biblia. Kimattokej ika Biblia itajtol Dios. Yejika, kikauaj maj kinojtokalti itech imin nemilis, maj kinkuejmolmelauili uan maj kinpaleui okachi kixmatikan Dios (2 Timoteo 3:16). No, mochikauaj kichiuaskej tein kijtouaj.

Itasojikniuan Jiova motasojtaj se iuan okse. Jesús kinextij keniuj kintasojtaya taltikpakneminij, yejika kinimachtij maj kixmatikan Dios uan kinpajtij kokoyanij. Tein kichiuaj tachiualismej den taneltokalis tein melauak, no kintasojtaj oksekin taltikpakneminij. Kichiuaj kemej Jesús, amo kinixtopeuaj tein amo tej kipiaj, niono tein chijchipaujkej oso maseualmej. Jesús kijtoj keniuj kimatiskiaj taltikpakneminij akonimej eskiaj imomachtijkauan, uan eskia ika netasojtalis tein mopialiskiaj se iuan okse (Juan 13:35).

Itasojikniuan Dios kitelpoujkaitaj Itokay: Jiova. Komo aksa amo kineki kijtos motokay, ¿eskia moteltasojikniuj? Amo. Keman tikpiaj se totasojikniuj, tiknotsaj ika itokay uan tikinojnotsaj oksekin ika ikuali tachiualisuan. Yejika, tein kinekij mochiuaskej itasojikniuan Dios moneki kikuiskej Itokay uan kininojnotsaskej oksekin taltikpakneminij tein Dios kijtoua. Jiova kineki maj ijkon tikchiuakan (Mateo 6:9; Romanos 10:13, 14).

Ijkon kemej Jesús kichiuj, itasojikniuan Dios no kinimachtiaj taltikpakneminij ika iTekiuajyo Dios. ITekiuajyo Dios se tayekanalis tein yetok iluikak, tein kichiuati semanauak Taltikpak se xochital. Itasojikniuan Dios kintapouiaj oksekin taltikpakneminij nejin kuali tanauatilmej ika iTekiuajyo Dios (Marcos 13:10).

Itaixpantijkauan Jiova mochikauaj mochiuaskej itasojikniuan. Kipoujkaitaj Biblia uan motasojtaj se iuan okse. No kikuij uan kipoujkaitaj itokay Dios uan kinimachtiaj oksekin taltikpakneminij ika iTekiuajyo Dios. Axkan itaixpantijkauan Jiova kichiuaj tachiualismej den taneltokalis tein melauak nikan Taltikpak.