TAMAJSIKAYOT
Tanauatijkej Daniel achtook kijtoj kemanian ejkoskia Mesías
TANAUATIJKEJ Daniel nemik kemej 500 xiujmej achtopa keman Jesús yoliskia. Sayoj ke Jiova kimatiltij kemanian kiixpejpenaskia, oso kitokaytiskia Jesús kemej Mesías oso Cristo. Daniel kiluijkej: “Moneki tikmatis uan tikajsikamatis ke keman kisas tajtol maj moyekchijchiua uan maj moyekachijchiua Jerusalén, uan keman ejkos Mesías Tayekankej panos chikome semanas, uan no eyi poual uan ome semanas” (Daniel 9:25).
Maj tikitakan keniuj ueliskia momatiskia kemanian monextiskia Mesías. Yekinika moneki tikmatiskej kemanian peuaskia mopouaskia semanas tein panoskia, uan teajxitiskia keman ejkoskia Mesías. Tein achtook moijtojka kinextia ke peuaskia keman ‘kisaskia tajtol maj moyekchijchiua uan maj moyekachijchiua Jerusalén’. ¿Kemanian ‘kisak tajtol’? Okse takat akin kijkuiloj Biblia, akin motokaytij Nehemías, kijtoua ke nejon tajtol, oso tanauatil maj oksepa kichijchiuanij tepamit tein kiyoualouaya Jerusalén, kisak “keman Artajerjes kiuikaya sempoual xiuit kemej tekiuaj” (Nehemías 2:1, 5-8). Oksekin tajkuilouanij no kijtouaj ke itekiuajyo Artajerjes peuak itech 475 achtopa itech totonaluan (a.i.t.). Tikitaj keman Artajerjes kiuikaya sempoual xiuit kemej tekiuaj, katka itech 455 a.i.t. Yejua ika, tein achtook kijtojka Daniel kemanian ejkoskia Mesías, peuak mochiua itech nejon xiuit: 455 a.i.t.
Daniel kinextia kanachi semanas panoskia, tein peuaskia mopouaskia itech 455 a.i.t. uan teajxitiskia keman ejkoskia “Mesías Tayekankej”. Tein achtook moijtojka kinextia ke panoskia “chikome semanas, uan no eyi poual uan ome semanas”, sennochiya yeskia 69 semanas. ¿Kanachi yekmelauj uejkauaskia nejon semanas? Ijkon kemej kinextiaj okseki Biblias, amo yeskia semanas tein kipia chikome tonal, ta semanas ika xiujmej. Yejua ika se semana kijtosneki chikome xiuit. Judíos akin nenkej ne uejkauj, kiyekmatiaj toni kijtosneki semanas ika xiujmej, oso chijchikome xiuit. Se neskayot, yejuan kiixseuiayaj chijchikome xiuit inintalpan itech neseuilis xiuit (Éxodo 23:10, 11). Yejua ika 69 semanas tein kijkuiloj Daniel kijtosneki 69 olochmej tein kipia chijchikome xiuit, oso sennochiya 483 xiujmej.
Axkan sayoj moneki tikpouaskej. Komo 483 xiujmej peua tikpouaj itech 455 a.i.t., tiajsij itech xiuit 29, uan nejon xiuit Jesús moauij uan mochiuak Mesías (Lucas 3:1, 2, 21, 22).a Nejin tein achtook kijtojka Biblia, ¿melauj ke semi se kimoujkakaki keniuj mochiuak ijkon kemej moijtojka?
a Komo tipeuaj itech 455 a.i.t., uan titamij itech xiuit 1 a.i.t., panoua 454 xiujmej. Uan komo tipeuaj itech xiuit 1 a.i.t. uan titamij itech xiuit 29, panoua 29 xiujmej. Komo tiksentiliaj nejin ome tapoualmej (454+29), senochia mochiua 483 xiujmej. Jesús “kitekkej” inemilis, oso kimiktijkej itech 33 keman yajtoya 70 semanas ika xiujmej (Daniel 9:24, 26). Komo tikonneki tikonmatis okachi, xikontemo itech icapítulo 11 itech Prestemos atención a las profecías de Daniel, uan no itech Perspicacia para comprender las Escrituras, vol. 2, itech páginas 1014-1017. Nejin ome amaixmej kichijchiujkej itaixpantijkauan Jiova.