Toni kijtosneki maj amo se poujto imiuan taltikpakneminij

1. ¿Toni kitelijtoj Jesús yaluatika youal keman momikiliskia?

YALUATIKA youal keman Jesús momikiliskia, kinextij ke kitelnekia maj imomachtijkauan kuali moajsinij. Yejika iminka motatataujtilij iuan iTajtsin: “Nimitsontajtanilia ke amo xikinajchiua nomomachtijkauan de nikan taltikpak. Ta, [...] xikinyekpixtinemi [...] para ke in amokuali Satanás maj amo kinkajkayaua. Uan ijkon kemej Nejuatsin amo nipoujtinemi nikan taltikpak, no ijkon nomomachtijkauan yejuan amo no poujtinemij nikan taltikpak” (Juan 17:15, 16). Itech nejin netataujtil tein Jesús kichiuak ika nochi iyolo, kinextij ke kinteltasojtaya. Uan no kinextij ke motelnekia tajtolmej tein nejon youak kiniluij seki imomachtijkauan: “Namejuan amo nanpoujtinemi[jok] iuan in taltikpakuanij” (Juan 15:19). Kemej tikitaj, Jesús kiitaya ke motelnekia maj itatojtokakauan amo poujtonij imiuan taltikpakneminij.

2. ¿Akonimej nejon taltikpakneminij tein Jesús kijtoj ke itatojtokakauan amo imiuan poujtinemiskiaj?

² ¿Akonimej nejon taltikpakneminij tein Jesús kijtoj ke itatojtokakauan amo imiuan poujtinemiskiaj? Yejuan oloch taltikpakneminij tein mouejkatilijtokej iuan Dios, uan akin kinyekana Satanás uan moueyinekij uan motasojtaj yejuansaj kemej Amokuali (Juan 14:30; Efesios 2:2; 1 Juan 5:19). Yejika kijtoua Biblia ke “ten kitasojtaj in tajtakolnemilis den nikan taltikpak, [...] motakualantaliliaj iuan Dios” (Santiago 4:4). Kemej tinochin tiknekij tiksentokaskej itech inetasojtalis Dios, motelneki timomachtiskej keniuj tinemiskej nikan taltikpak sayoj ke amo tipoujtoskej imiuan nejon taltikpakneminij. Maj tikitakan makuil taman tein techpaleuis maj amo tipoujtokan imiuan: 1) moneki tiksentokaskej tikpaleuiskej iTekiuajyo Dios tein moajsi imako Cristo, uan amo titeuantiskej itech política; 2) tikixnamikiskej talnamikilis tein poui nikan taltikpak; 3) timotakentiskej ika kuali taixejekolis; 4) tinemiskej ika amo miak taman, uan 5) tikuikatinemiskej manamikmej tein Dios techmaka.

MAJ TIKSENTOKAKAN TIKPALEUIKAN ITEKIUAJYO DIOS UAN MAJ AMO TITEUANTIKAN ITECH POLÍTICA

3. 1) ¿Mokalakij Jesús itech política tein onkaya itech nejon tonalmej? 2) ¿Keyej imomachtijkauan Jesús tein taixpejpenalmej, Biblia kintokaytia itanojnotskauan Cristo? (No xikonita nota.)

³ Jesús amo teuantik itech política, ta motemakak kitetapouis iTekiuajyo Dios, se taixyekanalis tein Dios kitaliskia satepan, kampa Jesús eskia Tekiuaj (Daniel 7:13, 14; Lucas 4:43; 17:20, 21). Yejika uelik kijtoj iixpan tekiuaj romano Poncio Pilato: “NoTekiuajyo amo poui nikan taltikpak” (Juan 18:36, NM). Tein nochipa tiktojtokaj Jesús no tikchiuaj kemej yejua. ¿Keniuj? Keman tiksentokaj tikpaleuiaj iTekiuajyo Dios uan itekiuaj, Jesucristo, uan tiksentokaj tikteixmatiltiaj nejin tekiuajyot kampa yeski (Mateo 24:14). Ijkon kijkuiloj tatitanil Pablo: “[Tejuan] tiitanojnotskauan de Cristo. Uan [...] ika in chikaualis den tokaytsin de Cristo tamechtataujtiaj ijkuin: [...] Ximotokikan iuantsin [Dios]” (2 Corintios 5:20).a

4. ¿Keniuj kinextiaj tein yekmelauj kichiuaj kemej Cristo ke kisentokaj kipaleuiaj iTekiuajyo Dios? (Xikonita recuadro itech “Yekinika itatojtokakauan Cristo amo teuantiaj itech política”.)

⁴ Itanojnotskauan se tekiuaj tajtouaj itenkopa nejon tekiuaj uan ialtepeuj. Yejika amo teuantij itech política niono itech okseki tachiualismej tein mochiua kampa youij kichiuatij se tekit. Sayoj ke kemaj kipaleuiaj tekiuajyot tein tajtouaj itenkopa. Taixpejpenalmej tein kichiuaj kemej Cristo, tein ‘poujtinemij ne iluikak’, ijkon kichiuaj (Filipenses 3:20). Uan kemej nejin itanojnotskauan Cristo kitetapouiaj iTekiuajyo Dios ika ueyi yoltanejnekilis, kinpaleuijtokej maj motokikan iuan Dios tel miakej millones tein moixmatij kemej ‘oksekin ichkamej’ tein iaxkauan Cristo (Juan 10:16; Mateo 25:31-40). Uan nejin ‘oksekin ichkamej’ tein Cristo kintitani maj tanojnotsatij, mochiuaj kemej imin tapaleuijkauan tokniuan taixpejpenalmej. Nejin ome olochmej mochiuaj sayoj se oloch ichkamej tein sentekitij, uan kipaleuiaj iTekiuajyo Dios tein moajsi imako Cristo, uan senkis amo teuantij itech política (xikonixtajtolti Isaías 2:​2-4).

5. ¿Keyej oloch tokniuan tein moajsij axkan amo ijkon moajsij kemej israelitas tein nenkej ne uejkauj, uan kemej ijkon moajsij, toni amo uelij kichiuaj itatojtokakauan Cristo?

⁵ Tein yekmelauj tikchiuaj kemej Cristo sayoj tikpaleuiaj iTekiuajyo Dios uan yejika amo titeuantij itech política. Sayoj ke moajsi okseki taman keyej ijkon tikchiuaj. Yekinika porin tejuan amo timoajsij kemej israelitas tein sayoj nemiaj itech se tal tein Dios kinimakaka. Tejuan tioloch tokniuan timoajsij itech nochi taltikpak (Mateo 28:19; 1 Pedro 2:9). Yejika, ¿toni panoskia komo tikpaleuiskiaj se partido político? Tikchiuaskiaj maj tioloch tokniuan timoxelokan, uan no, amo ueliskia tiktapouiskiaj akin yeski ke sayoj iTekiuajyo Dios kiualkuis tein kuali (1 Corintios 1:10). Uan ojpatika, keman onkaskia se neteuil, timoteuijtoskiaj imiuan tokniuan, tein Biblia technauatia maj tikintasojtakan (Juan 13:34, 35; 1 Juan 3:10-12). ¡Yejua ika Jesús kininauatij imomachtijkauan maj kikauanij tepos tein ika moteuiskiaj, uan maj kintasojtanij akin kintauelitayaj! (Mateo 5:44; 26:52; xikonita recuadro, “¿Amo niteuanti itech tachiualismej tein poui nikan taltikpak?”.)

6. Kemej timotemaktijtokej iuan Dios, ¿toni amo ueli tikmakaj César?

⁶ Uan no, tein yekmelauj kichiuaj kemej Cristo motemaktijtokej iuan Dios, amo iuan se taltikpaknenkej, se imin nechikol taltikpakneminij oso se ueyi altepet. Ijkon kijtoua 1 Corintios 6:19, 20: “Amo xiknemilikan ke namejuan san namechnamiki ya maj ximoyekantinemikan tech namonemilis. [...] Porin Dios namechkouako ya ika ueyi patiyot”. Yejika, maski kimakaj “César [oso tekiuaj]” tein kinamiki —kemej poujkaitalis, impuestos uan tatakamatilis tein tamachiujtoksaj—, okachi tayekantok maj kimakakan ‘Dios tein kinamiki maj kimakakan Dios’ (Marcos 12:17; Romanos 13:1-7). ¿Kemej toni? Kemej kiueyichiuaskej, kitasojtaskej ika nochi imin yolo, kitakamatiskej, amo kikauaskej, uan komo monekik, kitemakaskej imin nemilis (Lucas 4:8; 10:27; xikonixtajtolti Hechos 5:​29; Romanos 14:8).

MAJ TIKIXNAMIKIKAN “TALNAMIKILIS TEN POUI NIKAN TALTIKPAK”

7, 8. “Talnamikilis” tein poui nikan taltikpak, ¿toni kiniuika maj kichiuakan taltikpakneminij uan keniuj kinyoltekitilijtok akin taixnamikij?

⁷ ¿Toni okse taman moneki tikchiuaskej, tein techpaleuis maj amo tipouikan imiuan tein mouejkatilijtokej iuan Dios? Moneki tikixnamikiskej imin talnamikilis tein teijtakoua. Pablo kijkuiloj ke “Dios amo techtayokolia ne talnamikilis ten poui nikan taltikpak san. Ta, Yejuatsin techtayokolij in Yektikatsin Espíritu” (1 Corintios 2:12). No kiniluij itatojtokakauan Cristo tein nemiaj Éfeso, ke achto nentinemiaj “kemej in taltikpakuanij kichiujtinemij. Uan no [kitakamattinemiaj] ne tayekankej amokuali ejekat, [...] ten axkan takitskijtok [oso taixyekantok] ne ejekaixko uan nikan taltikpak. Uan ijkon ne Satanás kachi ok kinyoltekitilijtok nochi nekes ten axkan kixnamiktinemij Totajtsin Dios” (Efesios 2:2, 3).

⁸ Nejin “talnamikilis” tein poui nikan taltikpak, kiniuika taltikpakneminij maj amo kitakamatikan Dios, uan kiniskaltilia “tanejnekilis [...] ten eua itech in tonakayo; uan yejua ne taixnejnekilis [tein] kiyokolitaj in toixtololouan” (1 Juan 2:16; 1 Timoteo 6:9, 10). ¿Keyej talnamikilis kipia chikaualis itech taltikpakneminij? Porin okachi kichiua maj kinejnekikan tajtakoskej, uan ouij se kimati ox yejuaya, uan noyan moajsi. ¿Uan keniuj “kinyoltekitilijtok” akin taixnamikij? Kijtosneki ke kiniskaltilia tanemililmej tein Dios amo kiuelita, kemej motasojtaskej yejuansaj, moueyinekiskej, mochiuaskej ixkikismej, taixnamikiskej uan maj yejuansaj kitalikan tanauatilmej keniuj monejnemiltiskej.b Ika se ome eyi tajtolmej, nejin talnamikilis kichiua maj itanemililuan Amokuali, yolik moskalti itech imin yolo taltikpakneminij (Juan 8:44; Hechos 13:10; 1 Juan 3:8, 10).

9. ¿Keniuj talnamikilis tein poui nikan taltikpak uelis kalakis itech totanemilil uan toyolo?

⁹ ¿Uelis talnamikilis tein poui nikan taltikpak ixuas itech totanemilil uan toyolo? Komo amo timoyekpiaj kemaj uelis ixuas (xikonixtajtolti Proverbios 4:​23). Yekinika uelis peuas tikseliskej nejon talnamikilis tel ichtaka. Se neskayot, nejon talnamikilis uelis techpanoltiliskej tein pane kuali tasojiknimej, sayoj ke tein melauj amo kitasojtaj Jiova (Proverbios 13:20; 1 Corintios 15:33). No uelis tikseliskej itechkopa amaixmej tein amo yekkuali, Internet kampa moita auilnemilis oso moita imin tajtoluan tein kinekepilijtokej taneltokalis tein melauak, neixpetanilis tein amo yekkuali, neauiltilis tein mochiua ika eliuisyot, uan itechkopa aksa oso teisa tein kimoyaua itanemililuan Satanás uan tein iaxka.

10. ¿Keniuj uelis tikixnamikiskej talnamikilis tein poui nikan taltikpak?

¹⁰ ¿Keniuj uelis tikixnamikiskej talnamikilis tein kemej eskia tepajuia, uan tiksentokaskej itech inetasojtalis Dios? Sayoj komo senkis tikuij nochi tataman tein Jiova techmaka tein ika tikchikauaskej toyekuikalis iuan yejuatsin, uan achka tiktajtaniaj maj techmaka iyektikatsin espíritu. Maski Amokuali uan nochi tein iaxka tel chikaujkej, Jiova okachi chikauak (1 Juan 4:4). Yejika motelneki maj timotokikan iuan yejuatsin ika netataujtil.

MAJ TIMOTAKENTIKAN IKA KUALI TAIXEJEKOLIS

11. ¿Keniuj kiniuika maj motakentikan taltikpakneminij nejon talnamikilis tein poui nikan taltikpak?

¹¹ Se taltikpaknenkej moita ke kipia nejon talnamikilis itech ineketsalis, itaken uan komo amo mochipaua. Tetayokoltij tikijtoskej ke itech miak altepemej amo motakentiajok kemej moneki. Nejon kiuikak se akin tajtoua itech teposixyekauil maj kijtouani ke satepan, siuaauilneminij amo kimatiskejok toni taken motaliliskej tein ika kintilanaskej takamej, porin oksekin no ijkon motakentiajya. Itech se amat moijtoj ke nejin tachiualis tein moijtoua ika se ome eyi tajtolmej “tepitsin taken uan poliujtiuj pinaualis”, moita hasta itech siuapipilmejok. No motelita ke miakej motakentiaj tel sapitsotik uan tenkijkistok, tein ika kinextiaj ke taixnamikij uan amo tapoujkaitaj niono motasojtaj.

12, 13. ¿Toni principios moneki techyekanas keman timotakentiskej?

¹² Kemej tiitekitikauan Jiova, tiknekij tikpiaskej kuali toneketsalis, tein kijtosneki maj timotakentikan kemej moneki, maj chipauak, tein kuali kinimachililtis oksekin, uan tein kinamikis kampa timoajsiskej. Kampa yeski timoajsiskej, toneketsalis nochipa moneki kinextis kuali “taixejekolis”. Ika nejin uan ‘tochipaujkanemilis’ moitas ke ‘tiktakamatij Dios’. Amo tiktemouaj maj techitakan ke titamamej, ta tiknekij “[tiksentokaskej] itech inetasojtalis Dios” (1 Timoteo 2:9, 10; Judas 21, NM). Sayoj ke tokualneskayo tein okachi tayekantok yejua tein ualeujtok ‘itech toyolo’, tein “Dios kipoua semi kachi kipia ipatiuj” (1 Pedro 3:3, 4).

¹³ No moneki tikelnamikiskej ke ijkon kemej timotakentiskej uan timochijchiuaskej, taltikpakneminij kiniuikas maj kipialikan se tanemilil tein kuali oso amo taneltokalis tein melauak. Tajtol griego tein itech toBiblia mokepa kemej ‘kuali taixejekolis’, uan mokui keman ika motajtoua chipaujkanemilis, kijtosneki ke kipoujkaita tein kimachiliaj uan kinemiliaj oksekin. Yejika, motelneki maj achto titanemilikan iminka oksekin, uan amo tein timoluiaj ke technamiki maj tikchiuakan. Tejuan tikitaj ke tayekantok tikueyitaliskej Jiova uan inechikol, uan ika totachiualis tiknextiaj ke tiitekitikauan Dios. Kemaj, nochi tiknekij tikchiuaskej ‘sayoj para maj tikueyikualnextikan Totajtsin Dios’ (1 Corintios 4:9; 10:31; 2 Corintios 6:3, 4; 7:1).

14. ¿Toni moneki timotajtaniskej ika toneketsalis?

¹⁴ Keman titanojnotsatiuij oso tiyaskej nechikolmej kampa timomachtiaj itajtol Dios, okachiok moneki tiyaskej tichipaujkej uan maj kuali timochijchiuakan. Yejika moneki timotajtaniskej: “¿Nechsenitaj porin amo kuali noneketsalis oso porin amo nimochipaua? ¿Mopinaujmatij akin nouan moajsij? ¿Toni okachi niktayekanaltia: nimotakentis kemej nejua niknekis, oso nimotekitilis uan ijkon uelis nikselis se tekit itech nechikol?” (Salmo 68:6; Filipenses 4:5; 1 Pedro 5:6).

15. ¿Keyej Jiova amo kichiuak maj itech Biblia nochiasaj kijto toni taken timotaliliskej, keniuj timochijchiuaskej uan timochipauaskej?

¹⁵ Jiova amo kichiuak maj itech Biblia nochiasaj kijto toni taken timotaliliskej, keniuj timochijchiuaskej uan timochipauaskej. ¿Keyej? Porin amo kineki techmachililtis ke amo ueli titaixpejpenaj niono ueli tikixejekouaj teisa. Ta kineki maj timochiuakan tichikaujkej itech totakuaujtamatilis, uan keman tikitaskej principios itech Biblia, maj tikajsikamatikan tein moneki tikchiuaskej. Uan no kineki maj tiuelikan ‘tikixejekokan toni kuali tamachilis uan toni amo kuali tamachilis’ (Hebreos 5:14). Sayoj ke okachi kineki maj techyekana netasojtalis tein tikpialiaj Dios uan oksekin (xikonixtajtolti Marcos 12:​30, 31). Moajsi miak taman keniuj timotakentiskej uan timochijchiuaskej uan amo tiktapanauilijtoskej tein kijtoua Biblia. Komo tiyouij itech se ueyi nechikol tein kipiaj itaixpantijkauan Jiova, uelis tikitaskej ke nochin tein ompa moajsij tataman imin taken uan nochin yolpakij.

MAJ TINEMIKAN IKA AMO MIAK TAMAN

16. ¿Keniuj talnamikilis tein poui nikan taltikpak nion tepitsin ijkuitik kemej itamachtilis Jesús, uan toni moneki timotajtaniskej?

¹⁶ Talnamikilis tein poui nikan taltikpak tel tekajkayaua. Kiniuika maj tel miakej kitemokan yolpakilis itech tomin uan itech tein kipiaskej. Sayoj ke Jesús kijtoj ke “maski se kitelpias teisa, tonemilis amo ualeujtok itech tein tikpiaj” (Lucas 12:15, NM). Jesús amo tel tenpanok niono kijtoj maj se mosenkaua. Sayoj ke kemaj tamachtij ke kiajsiskej yekmelauj yolpakilis uan nemakixtilis sayoj “akin kimachiliaj ke moneki motokiskej iuan Dios”, uan nemij ika amo miak taman, tein kijtosneki ke kitayekanaltiaj kichiuaskej itekiyo Dios (Mateo 5:3, NM; 6:22, NM, nota). Yejika moneki timotajtaniskej: “¿Yekmelauj nikneltoka tein Jesús tamachtij, oso nechijtakojtok ‘tetat den nochi nekes ten xolopijtijtinemij’?” (Juan 8:44). “¿Toni nikteajsikamatiltia ika notajtoluan, tein nikixtalia nikchiuas, tein niktayekanaltia uan kemej ninemi?” (Lucas 6:45; 21:34-36; 2 Juan 6.)

17. Xikonijto toni kiseliaj tein kuali akin nemij ika amo miak taman.

¹⁷ Jesús kijtoj ke tamatilis “monextijtiyas tech in chipaujkanemilis” (Mateo 11:19). ¿Keniuj kinpaleuia akin nemij ika amo miak taman? Kiniualkuilia yekmelauj yolseuilis keman kichiuaj itekiyo Dios (Mateo 11:29, 30). Uan no kitayoualuiaj miak netekipacholmej, kuejmolmej uan tekokojkayot (xikonixtajtolti 1 Timoteo 6:​9, 10). Okachi uelij yetokej imiuan imin chankauan uan tokniuan, porin motasojkamatij sayoj kipiaskej tein ika moixpanoltiskej. Uan no hasta okachi kuali kochij (Eclesiastés 5:12). Okachi yolpakij, ta kikuij imin tomin uan imin tonal, uan ika kinpaleuiaj oksekin (Hechos 20:35). Uan no ‘moajsikapialiaj’ nechialis, uan kipiaj yolseuilis uan kuali momachiliaj (Romanos 15:13; Mateo 6:31, 32). Nejin tatiochiualismej amo teyi ijkuitik.

MAJ TIKUIKATINEMIKAN “MANAMIKMEJ TEN DIOS TECHMAKA”

18. ¿Keniuj kijtoua Biblia ke tamatij akin techtauelitaj, keniuj techixnamikij uan keniuj tamati neteuil tein tikpiaj imiuan?

¹⁸ Komo tiksentokaj itech inetasojtalis Dios, amo techijtakos Satanás akin kineki maj tikpolokan yolpakilis uan nemilis nochipaya (1 Pedro 5:8). Pablo kijtoj ke tejuan “timoteuijtinemij”, sayoj ke amo “iuan taltikpakuanij san. Ta, [...] iuan ne amokuali tayekananij uan iuan ne amokuali chiuanimej. [...] Iuan ne amokuali tanauatianij [...] kampa sayoj ongak tayouayanilot, [...] iuan nochi amokuali chikaujkaejekamej [...] tech [...] eluiyaktsinko” (Efesios 6:12). Tajtol griego tein mokepa kemej “timoteuijtinemij”, kiteajsikamatiltia ke timouilantinemij, uan amo ke uejka timoeujtokej uan ompa timoualteuijtokej iuan aksa. Uan no, amokuali ejekamej akin techtauelitaj, Pablo kintokaytij, “amokuali tayekananij”, “amokuali chiuanimej” uan “amokuali tanauatianij”. ¿Toni kijtosneki nejin? Ke amokuali ejekamej sentekitij uan kuali kinemiliaj keniuj techuetsiltiskej itech tajtakol.

19. Xikonijto keniuj chijchiujtok manamikmej tein Dios techmaka.

¹⁹ Maski titajtakouanij uan kemansa techuika maj tikchiuakan tein amo tiknekij, uan amo ueli tikchiuaj teisa kemej tiknekiskiaj, uelis titataniskej itech nejon neteuil. ¿Keniuj? Komo tikseliaj “manamikmej ten Dios techmaka” (Efesios 6:13). Itech Efesios 6:14-18 moijtoua keniuj chijchiujtok nejon manamikmej. Ompa kijtoua: ‘Maj tiyekyetokan. Uan maj timokemiloltikan ika in melauak Tajtoltsin de Dios ijkon kemej se soldado motajkoilpia ika ne kuetax. Uan no maj timokemiloltikan ne yolchipaualis, ijkon kemej se soldado motakentia ika coraza. Uan no maj timokemiloltikan ne kuali Tajtoltsin de Dios tein kiualkui ne yolseuilis iuan Dios. Nejin kemej eskia timotaliliaj tekakmej. Uan maj timokemiloltikan ne ueyi takuaujtamatilis. Uan ijkon uelis tikxikojtiyaskej nochi tataman kuejmololis tein ika in Satanás kineki techyolxokolis. Nejin kemej eskia se tepos youaltik. Uan maj tikselikan nemakixtilis tein tikchiaj. Nejin ijkuitik kemej ijkuak timokuataliliaj se tepos. Uan no maj timoaxkatilikan in Tajtoltsin de Dios. Porin nejin kemej eskia se machete tein techmaktilia in Yektikatsin Espíritu. Uan no maj timotatataujtilikan iuan Dios youalintonal’.

20. ¿Keyej tejuan amo timoajsij kemej soldados tein axkan nemij?

²⁰ Nejon manamikmej nochipa techpaleuis, ta yejuatsin Dios akin techmaka. Sayoj ke moneki nochipa tikuiskej. ¿Keyej? Porin tejuan amo timoajsij kemej soldados, tein kemansa uejkaua moseuiaj keman tami se neteuil uan amo niman peua okse neteuil. Tejuan tein tikchiuaj kemej Cristo tiksentokaj timoteuiaj maski uelis timomikiliskej. Uan nejin neteuilis tamis keman Dios kiixpolos nochi tein iaxka Satanás uan kitsakuaskej yejua uan iamokuali ejekauan (Apocalipsis 12:17; 20:1-3). Yejika komo tejuatsin tionmochikaujtok maj amo xionuetsi itech tajtakol uan tikonixnamiki amo kuali tanemililmej tein mitsonejko, xikonsentoka ijkon xikonchiujto. Tinochin moneki kemej eskia tikpeujtoskej tonakayo, ta sayoj ijkon uelis tiksentokaskej tiktekitilijtoskej Jiova (1 Corintios 9:27). Tel amo kuali eskia komo amo tiksentokaskiaj timoteuijtoskiaj.

21. ¿Keniuj uelis titataniskej itech neteuil espiritual?

²¹ Tikyekmatij ke amo uelis titataniskej ika tejuan tochikaualis. Yejika Pablo techelnamiktia ke moneki ‘timotatataujtiliskej iuan Dios youalintonal’. Uan no moneki tiktajtolkakiskej Jiova. ¿Keniuj? Keman timomachtiaj iTajtol uan timonechikouaj imiuan oksekin tokniuan tein no moteuijtokej kemej tejuan. Kemej tikitaj, amo toselti tiyetokej (Filemón 2; Hebreos 10:24, 25). Komo tikchiuaj tein tikitakej achto, amo sayoj techpaleuis maj titatanikan itech neteuil, ta no tikmatiskej tikpaleuiskej tein tikneltokaj nochipa keman techteuiliskej.

MAJ TIKYEKMATTOKAN KENIUJ TIKPALEUISKEJ TEIN TIKNELTOKAJ

22, 23. 1) ¿Keyej moneki achto kuali tiknemiliskej keniuj tikpaleuiskej tein tikneltokaj, uan toni moneki timotajtaniskej? 2) ¿Toni tikitaskej itech okse capítulo?

²² Jesús kijtoj: “In taltikpakuanij namechyoltauelitstinemij porin namejuan amo nanpoujtinemij ok iuan yejuan” (Juan 15:19). Yejika, tein tikchiuaj kemej Cristo, moneki achto kuali tiknemiliskej keniuj tikpaleuiskej tein tikneltokaj, uan tikchiuaskej ika poujkaitalis uan ika tajtolmej tein yemanik (xikonixtajtolti 1 Pedro 3:15). Yejika maj timotajtanikan: “¿Nikajsikamati keyej tiitaixpantijkauan Jiova kemansa tikchiuaj teisa tein amo moixmati? Nochipa ke monekis nikchiuas tein amo moixmati, ¿senkis nikmati ke tein kijtoua Biblia uan takeual takuaujtamach yejua tein melauak?” (Mateo 24:45; Juan 17:17). “Uan keman monekis niknextis ke niyetok itechkopa Jiova, ¿niknextia ke nion tepitsin niomeyoloua nimochiuas nitaman, uan no nechmaka miak pakilis nimochiuas ijkon?” (Salmo 34:2; Mateo 10:32, 33.)

²³ Tejuan tiknekij senkis tiktalkauiskej talnamikilis tein poui nikan taltikpak. Sayoj ke Satanás kineki techuetsiltis itech tajtakol, yejika kemansa kitemoua techuetsiltis okachi ichtakatsin. Se neskayot, kemej tikitakej achto, kineki techtanejnektis ika neixpetanilis tein teijtakoua. ¿Toni techpaleuis maj tikixpejpenakan neixpetanilis tein kuali, tein kuali techmachililtis, uan tein amo kichiuas maj techkuejmolo totanemilil? Tikitaskej nejin itech okse capítulo.