TAXELOL 6
Job amo keman kikauak Dios
Satanás taomeyolotij keman kijtoj ke Job amo kipiaya iyolo ajsitok iuan Dios, sayoj ke yejua amo keman kikauak Jiova
UELIS itekitikauan Dios mopiaskej melaujkej maski kipanoskej uejueyi ouijkayomej uan maski moitas ke nejon amo teyi kinpaleuis? Se takat tein motokaytij Job monekik kinextis nejon. Maj tikitakan toni kichiuak.
Job katka se ichankauj Abrahán tein nemia kampa axkan motatokaytia Arabia. Yejua nemik itech xiujmej keman israelitas moajsiaj Egipto. Se tonal, ángeles ne iluikak mosentilijkej iixpan Dios. Taixnamikkej Satanás no ompa yetoya. Jiova kijtoj imin ixpan nochin ke amo moajsia okse takat yolmelauak kemej Job. Ika nejin tajtolmej kinextij ke senkis itech takuaujtamatia. Sayoj ke Satanás kijtoj ke Job kitekitiliaya Dios porin kiseliaya tein kuali, kimakaya miak taman uan kiyekpiaya. Uan kiyekijtoj ke komo kipoloua nochi tein kipia, kinekepilis Jiova.
Dios kikauilij Amokuali maj kikuiliani Job nochi tein kipiaya, maj kinkuiliani ikoneuan uan maj kikokolispeualtiani. Job amo kimatia ke Satanás kichiuak maj kipiani nochi nejon tajyouilis, amo kiajsikamatia keyej Dios kikauaya maj pano nejon. Maski ijkon, amo keman kinekepilij Jiova.
Ompa, kikalpanotoj eyi takamej tein kijtouayaj ke katkaj itasojikniuan. Uan peuak tel ueuejkaua kinojnotsaj. Ika nejon tajtolmej tein pexontok itech amaix Job, kinekiaj maj Job kineltokani ke Dios kitatsakuiltijtoya porin ichtaka tajtakojtoya. Uan no kijtojkej ke Dios amo iminka motekipachoua itekitikauan niono imintech takuaujtamati. ¡Nejon nion tepitsin melauak! Job amo kineltokak tein kijtouayaj, uan kinyekiluij ke amo keman kikauaskia Dios hasta keman momikiliskia.
Maski ijkon, kipiak se nepolol, ta kijtoj tein amo kijtoskia keman motenpaleuij. Se telpoch tein motokaytij Elihú kikakik nochi, uan kimelauak porin okachi kitemouaya maj kuali ika tajtokan yejua uan amo itech itokay uan iueiyo Dios. Uan no, kinchikaujkatakakiltij nejon eyi takamej.
Ompa, yejua Jiova kimelauak Job. Ika iuejueyi tachijchiualis tein se kimoujkaita, kinextilij ke takat amo nesiki komo se kitamachiua iuan iueiyo Dios. Job moyolyemanij uan kiselij tein kiiluij. Uan Jiova akin “semi teyoliknelia uan teyoltasojta”, kipajtij Job uan kimakak okse achiok tein kipiaya uan okseki majtakti ikoneuan (Santiago 5:11). Kemej Job amo kikauak Dios maski kipanok miak ouijkayomej, senkis moitak ke amo melauak tein kijtoua Satanás, uan kinextij ke taltikpakneminij kemaj uelis kitakamatiskej Dios maski kipiaskej ouijkayomej.
(Motaksaltia itech amaix Job.)