Nekuikatilmej tein techmachtiaj uan techyolseuiaj

AMAIX okachi ueyi tein moajsi itech Biblia, kipia nekuikatilmej tein ika kiueyitaliaj Dios. Uejkaujkej kijkuilojkej kemej 1,000 xiujmej. Itech nekuikatilmej kikuikej kualtsitsin tajtolmej tein kinextia imin ueyi takuaujtamatilis tajkuilouanij. No kijkuilojkej nochi taman tein kimachilijkej, kemej yolpakilis uan tekokojkayot, tasojkamatilis uan neyolnonotsalis, taueyichiualis uan tayokol. Nochin nejin takamej kitasojtayaj Dios uan kipiayaj se kuali yekuikalis iuan. Maj tikitakan seki taman tein ika tajtoua amaix Salmos.

Jiova akin senkis Ueyi Taixyekankej itech iluikak uan taltikpak, kinamiki maj tikueyitalikan. Salmo 83:​18 kiyekijtoua: “Tejua motokay Jiova, tejuasaj ti Ueyichiujkej ipan nochi taltikpak”. Miak salmos kiueyitaliaj Dios porin kichijchiuak iluikak, sitalimej, techmakatok tonemilis uan porin se kimoujkaita kemej techchijchiuak (Salmos 8, 19, 139 uan 148). Okseki kiueyitaliaj porin kinyekpia uan kinmakixtia itekitikauan tein amo kikauaj (Salmos 18, 97 uan 138). Uan okseki kiuejkapantaliaj Jiova kemej Dios akin tekiti ika melaujkayot, tein kinpaleuia akin iminka mauiltiaj uan kintatsakuiltia akin amo yolkualmej (Salmos 11, 68 uan 146).

Jiova kinpaleuia uan kinyolseuia akin kitasojtaj. Uelis tikijtoskej ke salmo tein okachi moixmati yejua tapoual 23, kampa David kijtoua ke toTajtsin tamati kemej ichkatajpixkej tetasojtakej tein kinyekana, kinyekpia uan kinita iichkauan. Itech Salmo 65:2 techelnamiktia ke Jiova ‘kikaki netataujtilmej’. Uan no miakej tein tel amo kuali monejnemiltijkej, kinyolseuia keman kiitaj Salmos 39 uan 51, kampa David kinextij ke yekmelauj moyolnonotsaya ika itajtakoluan uan kiyekmatia ke Dios kitapojpoluiskia. Uan itech Salmo 55:​22 techyolchikaua maj titakuaujtamatikan iuan Jiova uan maj tikauakan maj techpaleui ika ouijkayot tein tikpiaj.

Jiova ika iTekiuajyo tein moajsi imako Mesías, tachipauas nikan taltikpak. Itech Salmos miakkan kijtoua tein itech mochiuaskia Mesías oso Tekiuaj tein moijtojka ualaskia. ¿Kemej katiyejua? Itech Salmo 2 kijtoua ke nejin Tekiuaj kiixpolos akin yeski tein kiixnamikis. Itech Salmo 72 kinextia ke kitamis mayan, tachichikouilis uan nochi taman teikamauiltilis. Itech Salmo 46:9, kijtoua ke Jiova ika iTekiuajyo tein moajsi imako Mesías, kitamis neteuilismej uan kikuechos nochi teposmej tein ika tateuiaj. Uan no itech Salmo 37 kijtoua ke Dios kinixpolos tein amo yolkualmej, uan tein yolmelaujkej nemiskej nochipaya uan kipiaskej yolseuilis uan kualtsin mouikaskej.

​(Motaksaltia itech amaix Salmos.)