David katka yolchikauak

¿Toni tikchiua keman timoui?... Xa tiyouj tiktemoti maj mitspaleui momomaj oso mopopaj. Sayoj ke onkak okse akin uelis mitspaleuis, uan amo moajsi okse okachi chikauak ke yejua. ¿Tikmati akoni?... Kemaj, Jiova. Nochipa uelis tiktajtanis maj mitspaleui. Yejua nejon tein kichiuak David. Katka se telpoch akin yolchikauak porin takuaujtamatia iuan Jiova. Tein kichiuak moajsi itech Biblia.

Keman David katka se konetsin, itatuan peujkej kimachtiaj maj kitasojta Jiova. Yejua ika amo mouia, maski kipanok seki taman tein temoujtia. Yejua kimatia ke Jiova kitasojtaya uan ke kipaleuiskia. Se tonal, keman David kinpixtoya seki ichkamej, ¡se ueyi tekuani ualaj uan kiuikak se ichkat! ¿Tikmati toni kichiuak David? ¡Kitokatiyajki tekuani uan nesi ke kimiktij ika imauan! Uan keman se oso kinekia kinkuas ichkamej, ¡David no kimiktij! ¿Akoni tiknemilia ke kipaleuij David maj amo moui?... Kemaj, Jiova.

Maj tikitakan okse tonal keman David oksepa kinextij ke katka yolchikauak. Israelitas moteuijtoyaj iniuan akin moixmatiaj kemej filisteos. Semej tateuianij filisteos katka se takat semi uejkapantik. Motokaytiaya Goliat. Nejon takat uejkapantik kinkejkelojtoya tateuianij israelitas uan no Jiova. Kinpejpeualtiaya tateuianij israelitas uan kiniluiaya: “¡Nikuelitaskia nikitas akoni kineki moteuis nouan!”. Sayoj ke nochin kimouiliayaj uan nion se kinekia iuan moteuis. Keman David kikakik tein kijtojtoya Goliat, kiluij: “¡Nejua nimoteuis mouan! ¡Jiova nechpaleuis uan nejua nimitstanis!”. ¿Melauj ke David katka yolchikauak?... Kemaj, amo mouia. ¿Uan toni panok satepan?

David kikuik iateuitats uan makuil tet tein alaxtikej, uan kiixnamikito Goliat. Keman Goliat kiitak ke David katka semi telpochok, mokejkeloj. Sayoj ke David kiluij: “Tejua tiuitse nouan ika se espada, ¡sayoj ke nejua niyouj mouan itokaykopa Jiova!”. Satepan motaloj kampa yetoya ueyi takat. Ompa kitalij se tet itech iateuitats uan kitamotilij tet. ¡Tet uetsito iixkuako Goliat! Uan nejon takat uejkapantik uetsik miket. Keman filisteos kiitakej tein panok, motelmoujtijkej uan cholojteujkej. ¡Se telpoch kemej David uelik kitanik se ueyi takat kemej Goliat! ¿Keyej uelik kitanik?... Porin Jiova kipaleuij, ¡uan Goliat amo katka okachi chikauak ke Jiova!

¿Toni techmachtia tein kichiuak David?... Ke amo akin okachi chikauak ke Jiova. Yejua ika, keman timouis, xikelnamiki: Jiova mitstasojta uan uelis mitspaleuis amo ximoui.