Jeremías amo motsakuilij kiteixmatiltis Jiova

Kemansa miakej techpinaujtiaj oso kualanij keman ika titajtouaj Jiova. Nejin kichiua maj amo kuali timomachilikan, ¿melauj? Xa tiknemiliskej: “Amo niksentokasok ika nitajtos Jiova”. ¿Kemansa mitspanouani nejon?... Biblia ika tajtoua se takat akin kitasojtaya Jiova, sayoj ke kikaujtoyaya kiteixmatiltis itokay yejuatsin. Motokaytiaya Jeremías. Maj tikitakan toni kipanok.

Keman Jeremías katka telpoch, Jiova kiluij ke monekia kitemakas se tanauatil tein motelnekia. Monekia kinnauatis oksekin maj amo kichiuakanok tein amo kuali. Kemej semi ouij katka, Jeremías mouik. Yejua ika, kiluij Jiova: “Amo nikmati toni nikijtos. Sayoj se niokichpil”. Sayoj ke Jiova kinankilij: “Amo ximoui, nejua nimitspaleuis”.

Yejua ika Jeremías peuak kiniluia oksekin: “Komo amo nankipataj tein nankichiuaj, Jiova namechtatsakuiltis”. ¿Kichiujkej tein Jeremías kiniluij?... Amo, ta sekin kipinaujtijkej uan oksekin tel kualankej. ¡Sekin hasta kinekiaj kimiktiskej! ¿Keniuj tiknemilia ke momachilij Jeremías?... Yejua tel mouik uan kijtoj: “Amo niknekiok ika nitajtos Jiova”. ¿Sayoj ke yekmelauj mosenkauak?... Amo. Kemej Jeremías kiteltasojtaya Jiova, amo uelik motsakuilij kiteixmatiltis yejuatsin. Uan kemej Jeremías amo mosenkauak, Jiova kimakixtij.

Kemej neskayot, se tonal seki takamej amo yolkualmej kipantamotkej itech se uejkatan talkoyok. Jeremías pankalaktoya, uan amo kipiaya toni kikuas nion toni tayis. ¡Nejon takamej kinekiaj maj Jeremías miki! Sayoj ke ¿momakixtij? Kemaj, porin Jiova kichiuak maj kipankixtikan.

Itech nejin tamachtilis tikitakejya ke maski Jeremías kemansa mouik, amo keman motsakuilij kiteixmatiltis Jiova. ¿Toni uelis mitsmachtis tein kipanok Jeremías?... Ke keman ika titajtos Jiova, sekin xa mitspinaujtiskej oso kualaniskej. Oso uelis timopinaujmatis oso hasta timouis. Sayoj ke amo keman xikaua ika titajtos Jiova. Xikelnamiki ke yejuatsin nochipa mitspaleuis, ijkon kemej kipaleuij Jeremías.