TAMACHTILIS 13
Timoteo kinekia kinpaleuis oksekin
Timoteo katka se telpoch akin yolpakia keman kinpaleuiaya oksekin. Yejua yajki miakkan tapaleuito. Yejua ika, tel yolpakia itech inemilis. ¿Tikneki maj okachi nimitstapoui tein kichiuak?...
Imomaj Timoteo uan iueyinan kimachtijkej akoni Jiova
Timoteo moskaltij itech se xolal tein motokaytiaya Listra. Imomaj motokaytiaya Eunice, uan iueyinan, Loida. Keman Timoteo katka konetok, yejuan peujkej kimachtiaj akoni Jiova. Yejua ika, ijkon kemej Timoteo moskaltiaya, kinekia kinpaleuis oksekin maj kiixmatikan Jiova.
Se tonal, keman Timoteo katka telpochya, Pablo kiluij: “Niyouj nitanojnotsati itech okseki xolalmej. ¿Tikneki nouan tiyas?”. Ika miak pakilis Timoteo kiluij: “¡Kemaj, nikneki niyas!”. Yejua kinekia kinpaleuis oksekin.
Timoteo iuan yajki Pablo itech se xolal itokay Tesalónica, tein poui Grecia. Monekik uejka nejnemiskej uan hasta yaskej itech se barco uan ijkon ajsiskiaj. Keman ajsikej, kinpaleuijkej miakej maj kiixmatikan Jiova. Sayoj ke sekin tel kualankej uan kinekiaj kinxokoliskej. Yejua ika, Pablo uan Timoteo monekik kisaskej uan tanojnotsaskej itech okseki xolalmej.
Timoteo kipiak yolpakilis itech inemilis
Seki metsti satepan, Pablo kiluij Timoteo maj mokepa Tesalónica. Kinekia kimatis keniuj yetoyaj tokniuan. Sayoj ke itech xolal Tesalónica sekin kintajyouiltijkaj tokniuan. ¡Timoteo monekia yeski yolchikauak uan ijkon mokepas itech nejon xolal! ¿Toni kichiuak Timoteo? Yejua yajki porin ininka motekipachouaya tokniuan akin ompa nemiaj. Keman mokepak, kiluij Pablo kuali tanauatilmej. Tokniuan kayomej Tesalónica kuali kitekitilijtoyaj Jiova.
Timoteo tekitik iuan Pablo miak xiujmej. Yejua ika, se tonal Pablo kijkuiloj: “Niktitaniti Timoteo maj kinpaleuiti tokniuan. Amo onkak okse okachi kuali takat kemej yejua. Timoteo kitasojta Jiova uan oksekin”.
Tejua no tikintasojta oksekin, ¿melauj? ¿Tikuelitaskia tikinpaleuis maj kiixmatikan Jiova?... Komo ijkon tikchiua, uelis titelyolpakis itech monemilis, ijkon kemej Timoteo.