¿Keyej niktelneki kuali nimoitas?

¿TEJUA TONI TIKCHIUASKIA?

Xiknemili nejin: keman Julia moita itech teskat, kinemilia ke moita semi tomauak. Yejua kinemilia: “Moneki nimopitsauas”. Maski tein melauj, itatuan uan akin kuali iniuan mouika kiluiaj ke tel pitsauak.

Julia uejkaujya kinemilijtok kichiuas seki taman maski ouij tein kipaleuis maj temo maski sayoj ome kilo. Sayoj moneki momayantis seki tonalmej...

Komo timomachiliskia kemej Julia, ¿toni tikchiuaskia?

XIMOTSAKUILI UAN XITANEMILI

Amo kijtosneki ke amo kuali yetok xikneki kuali timoitas. Tein melauj, Biblia kijtoua ke miakej takamej uan siuamej kuakualtsitsin katkaj, kemej Sara, Raquel, José, David uan Abigail. Kemej neskayot, moijtoua ke se siuat akin monotsaya Abisag “tel kuakualtsin katka” (1 Reyes 1:4).

Sayoj ke, miakej telpochmej uan ichpochmej kinteltekipachoua keniuj moitaj. Uan nejin uelis kinualkuilis uejueyi kuejmolmej. Xiknemili nejin:

• Itech seki netajtanilmej tein kinchiuilijkej seki ichpochmej, 58% kijtojkej ke tel tomaujkej katkaj, maski tein melauj sayoj 17% yekmelauj tomaujkej katkaj.

• Itech okseki netajtanilmej tein kinchiuilijkej seki siuamej akin tel pitsaujkej katkaj, 45% kinemiliayaj ke tomaujkej katkaj.

• Kemej seki telpochmej uan ichpochmej kitelnekij mopitsauaskej, kinkuini anorexia. Nejin se kokolis tein uelis kichiuas maj momikilikan porin amo takuajok.

Komo tikita ke xa tikpia anorexia oso okse kokolis kemej nejin, xitajtani maj mitspaleuikan. Xikinilui motatuan oso okse aksa akin ueyiya uan iuan titakuaujtamati. Biblia kijtoua: “Se yekmelauj tetasojikniuj nochipa tetasojta, uan mochiua se teikniuj keman se kipanoua tajyouilis” (Proverbios 17:17).

TEIN OKACHI KUALI TEIN UELIS TIKCHIUAS

Tein melauj, tein tikpiaj itech toyolo yejua tein kichiua maj yekmelauj timoitakan tikuakualtsitsin. Xikita keniuj kijtoua Biblia ke katka Absalón, ikonetsin tekiuaj David:

“Amo moajsik nion se takat maj kitelueyitalianij porin tel kuakualtsin katka [...], amo kipiaya nion teyi tein amo kuali.” (2 Samuel 14:25)

Sayoj ke motelueyinekia, kinejnekia tein amo iaxka uan katka takajkayaujkej. Yejua ika, Biblia amo kuali ika tajtoua, ta kinextia kemej se takat akin amo tetasojtak uan se temiktijkej akin tel tetauelitaya.

Yejua ika Biblia techyolmajxitia:

‘Ximoyankuikatakentikan ika ne chipauak talnamikilis.’ (Colosenses 3:10)

“Amo semi ximochijchiuakan ika ne kualneskayot ten nestinemi panian [...], ximokualnextikan tech namoyolijtik.” (1 Pedro 3:3, 4)

Maski kuali yetok xikneki kuali timoitas, okachi tayekantok ximochikaua tiknextis seki taman tein kualtsin. Satepan, taltikpakneminij okachi kiitaskej nejon tein kualtsin tein tiknextia uan amo kemej timoita tapani. Se ichpoch akin monotsa Phylicia kijtoua: “Komo tikuakualtsin, niman mitsitaskej, sayoj ke tein kichiuas maj taltikpakneminij mitselnamikikan ika netasojtalis yejua tein kualtsin tein tikpia itech moyolo, tein kualtsin tein tiknextia”.

XIKITA KENIUJ TIMOITA

¿Tiknemilia ke amo kuali timoita?

¿Kemansa tiknemiliani tiyas iuan se tapajtijkej maj kiyektali se taman itech monakayo oso tel amo titakuas porin tikneki tikpatas teisa tein amo timouelitilia?

¿Toni tikpataskia itech monakayo? (Xikyoualo.)

• MOTAMACHIUJ

• MOETIKKA

• MOTSON

• MOTAJKOYAN

• MOIXKO

• MOPANEUAYO

Komo tikyoualoj “kemaj” itech yekinika ome netajtanilmej uan tikixpejpenak eyi oso okachi itech expatika netajtanil, xiknemili nejin: oksekin xa amo mitsitaj kemej tejua timoita. Xikelnamiki ke uelis se motelpanoltis uan tel ika se motekipachos keniuj se moita (1 Samuel 16:7).