¿Keniuj uelis nikyektalis nonepololuan?

¿TEJUA TONI TIKCHIUASKIA?

Xiknemili nejin: Tim uan okseki okichpipil mauiltijtokej, uan maski amo kinekia, kitamota pelota itech se carro tein iaxka se takat akin ompakauin nemi, uan tapani teskat.

Komo tejua mitspanoskia tein kipanok Tim, ¿toni tikchiuaskia?

XIMOTSAKUILI UAN XITANEMILI

UELIS TIKCHIUAS EYI TAMAN:

1. Titsikuinteuas.

2. Tikpantis okse.

3. Tikiluis tein panok akin iaxka carro uan ke tikixtauas tein ika kiyektalis.

Xa tiknekis tikchiuas tein kijtoua yekinika taman. Sayoj ke nochipa okachi kuali xikijto ke timopoloj, itech tein yeski taman.

KEYEJ MONEKI TIKIJTOS KE TIMOPOLOJ

1. Yejua tein moneki tikchiuas.

   Biblia kijtoua: “Tikyolnejnektinemij ma tichipaukanentinemiske” (Hebreos 13:18).

2. Komo tikijtoua ke timopoloj, xa oksekin okachi kinekiskej mitstapojpoluiskej.

   Biblia kijtoua: “Akin kitatia itajtakoluan amo kuali kiyas, sayoj ke akin kijtoua itajtakoluan uan kikaua, kinextiliskej teiknelilis” (Proverbios 28:13).

3. Uan tein okachi moneki: tikyolpaktis Jiova.

   Biblia kijtoua: “Jiova amo kineki kiitas akin tel amo yolkuali, sayoj ke tel kuali mouika iniuan akin yolmelaujkej” (Proverbios 3:32).

Karina kinekik kitatilis ipopaj ke tekiuanij kitaxtaualtijkej porin kiteltsikuinaltij icarro, sayoj ke amo uelik kitatilij. Yejua kijtoua: “Kemej se xiuit satepan, nopopaj kiitak itech se amat kampa ixnesia notokay ke nechtaxtaualtijkaj porin nikteltsikuinaltijka carro. ¡Nimokuejmolkalakij!”.

¿Toni techmachtia tein kipanok? Karina kijtoua: “Komo se kitemoua se kitatis se inepololuan, kichiua maj okachi ueyia kuejmol. Ipa monekis titanankilis”.

XIKITA TONI MITSMACHTIAJ MONEPOLOLUAN

Biblia kijtoua: “Tinochin timotajtakolmakaj ika miak tataman” (Santiago 3:2). Keman niman tikijtoua ke timopoloj, tiknextia ke tiyolyemanik uan ke titamattokya.

Axkan, moneki tikitas toni mitsmachtiaj monepololuan. Se ichpoch akin monotsa Vera kijtoua: “Keman nimopoloua, nimochikaua nikajsikamatis tein moneki. Ika sejse nepolol uelis nikitas toni nechpaleuis maj okachi kuali nikchiua teisa. Ijkon, nikita keniuj amo oksepa nikchiuas nejon”. ¿Toni tikchiuaskia komo mitspanoskia nejin tein moijtoua taixpan?

Mokniuj mitstaneujtia ibicicleta uan tikuejuelouilia. ¿Toni tikchiuaskia?

• Amo teyi nikiluiskia; xa amo kimatis.

• Nikiluiskia nochi tein panok.

• Nikiluiskia tein panok, sayoj ke nikpantiskia okse.

Tikchiua se examen uan amo kuali titanankilij porin amo timomachtij. ¿Toni tikchiuaskia?

• Nikijtoskia ke tel ouij katka.

• Nikijtoskia ke nejua notajtakol porin amo nimomachtij.

• Nikijtoskia ke tamachtijkej amo kuali nechita.

Oksepa xikita nejin ome taman uan ximonemili ke tejua 1) timokniuj uan 2) timotamachtijkauj. ¿Toni kinemiliskiaj komo niman tikiniluiskia ke timopoloj? ¿Keniuj mitsitaskiaj komo tikintatiliskia?

Axkan xiknemili teisa tein amo kuali tikchiuak itech xiuit tein panok uan xiknankili nejin netajtanilmej:

¿Toni ika timopoloj? ¿Toni tikchiuak satepan?

• Niktemoj niktatis.

• Nikpantij okse.

• Niman nikijtoj tein panok.

Komo amo tikijtoj ke timopoloj, ¿keniuj timomachilij satepan?

• ¡Tel kuali! Amo momatik.

• Amo kuali. Monekia nikijtos tein melauak.

¿Toni okachi kuali maj nikchiuani?

¿Toni mitsmachtij monepolol?

¿KENIUJ TIKITA?

¿Keyej kemansa teouijmaka se kijtos ke se mopoloj?

¿Keniuj mitsitaskej oksekin komo nochipa tiktemoua tiktatis monepololuan? Sayoj ke ¿keniuj mitsitaskej komo tikijtoua ke timopoloj? (Lucas 16:10.)