Dios kichijchiua yekinika takat uan yekinika siuat

Jiova kichijchiuak se xochital itech se tal tein motokaytiaya Edén. Ompa onkayaj miak xochimej, koujmej uan tapialmej. Satepan, Dios kichijchiuak yekinika takat, Adán. Kichijchiuak ika tal uan ompa kiyekapitsak. ¿Tikmati toni panok? ¡Takat peuak mijyotia! Jiova kiluij Adán maj kiyekpiani xochital uan maj kintaliliani tapialmej inintokay.

Jiova kimakak Adán se tanauatil tein motelnekia. Kiluij: “Uelis tikuas itakilo tein yeski kouit, sayoj se amo, se tein nikxeloj. Komo tikua itakilo nejon kouit, timikis”.

Satepan, Jiova kijtoj: “Nikchijchiuiliti Adán se itapaleuijkauj”. Yejua ika kichiuak maj Adán tel kochi uan ika se ielchikiuj kichijchiuilij se siuat. Motokaytiaya Eva. Adán uan Eva katkaj yekinika kalyetouanij. ¿Keniuj momachilij Adán keman kiitak inamik? Kemej semi yolpaktoya, kijtoj: “¡Xikita tein Jiova kichijchiuak ika se noelchikiuj! ¡Axkan kemaj moajsi aksa kemej nejua!”.

Jiova kiniluij Adán uan Eva maj kinpianij miakej konemej uan maj momoyauanij itech nochi taltikpak. Kinekia maj sentekitinij ika yolpakilis keman kichiuaskiaj maj nochi taltikpak mochiuani se xochital. Tel takualtsinkan yeskia, kemej xochital tein moajsia Edén. Sayoj ke amo ijkon panok. ¿Keyej amo? Tikitaskej itech okse tamachtilis.